ରାଜ୍ୟରେ ଅକ୍ସିଜେନ୍ ଅଭାବ ନାହିଁ ; ଟିକା ଆସିଲେ ଆରମ୍ଭ ହେବ ତୃତୀୟ ପର୍ଯ୍ୟାୟ ଟୀକାକରଣ : ସ୍ୱାସ୍ଥ୍ୟ ସଚିବ

ରାଜ୍ୟରେ ଅକ୍ସିଜେନ୍ ଅଭାବ ନାହିଁ । ଏହାସହିତ ଇଞ୍ଜେକସନ୍‌ର ମଧ୍ୟ ଅଭାବ ନାହିଁ । ବର୍ତ୍ତମାନ ରାଜ୍ୟରେ ଦୈନିକ 12 ଶହ ରେମଡିସିଭିର ଇଞ୍ଜେକସନ୍‌ର ଆବଶ୍ୟକ ପଡ଼ୁଥିବା ବେଳ 43 ହଜାର ଇଞ୍ଜେକସନ୍ ମହଜୁଦ୍ ରହିଛି । ଆସନ୍ତାକାଲି ଆଉ 21 ହଜାର ଇଞ୍ଜେକସନ୍ ଆସି ପହଞ୍ଚିବ

Published: Friday, April 30, 2021, 17:37 [IST]

ଭୁବନେଶ୍ବର : ରାଜ୍ୟରେ ଅକ୍ସିଜେନ୍ ଅଭାବ ନାହିଁ । ଏହାସହିତ ଇଞ୍ଜେକସନ୍‌ର ମଧ୍ୟ ଅଭାବ ନାହିଁ । ବର୍ତ୍ତମାନ ରାଜ୍ୟରେ ଦୈନିକ 12 ଶହ ରେମଡିସିଭିର ଇଞ୍ଜେକସନ୍‌ର ଆବଶ୍ୟକ ପଡ଼ୁଥିବା ବେଳ 43 ହଜାର ଇଞ୍ଜେକସନ୍ ମହଜୁଦ୍ ରହିଛି । ଆସନ୍ତାକାଲି ଆଉ 21 ହଜାର ଇଞ୍ଜେକସନ୍ ଆସି ପହଞ୍ଚିବ । ରେମଡିସିଭିରର ଅଭାବ ନେଇ ଯେଉଁ ଖବର ପ୍ରକାଶିତ ହୋଇଥିଲା ତାହା ଘରୋଇ ହସ୍ପିଟାଲ ସମ୍ପର୍କିତ । କିନ୍ତୁ ଆମେ ସରକାରୀ କୋଟାରୁ ଘରୋଇ ହସ୍ପିଟାଲକୁ ଏବେ ରେମଡିସିଭିର ଯୋଗାଇ ଦେଉଛୁ । ସେହିଭଳି ଫାବିଫଇରାବିର ମଧ୍ୟ ପର୍ଯ୍ୟାପ୍ତ ପରିମାଣର ରହିଛି । ପାଖାପାଖି ସାଢ଼େ 6 ଲକ୍ଷ ବଟିକା ରହିଥିବା ବେଳେ ଆଉ 20 ଲକ୍ଷ ବଟିକା ନେଇ ଅର୍ଡର ଦିଆଯାଇଛି । ଏହା ବ୍ୟତୀତ ଆଉ 3 ଲକ୍ଷ ରେମଡିସିଭର ନେଇ ମଧ୍ୟ ଅର୍ଡର ଦିଆଯାଇଛି । ରାଜ୍ୟରେ ଆସନ୍ତା ଦୁଇ ମାସ ପାଇଁ ଆବଶ୍ୟକ ସାମଗ୍ରୀ ପିପିଇ କିଟ୍, ମାସ୍କ ମଧ୍ୟ ମହଜୁଦ ରହିଛି ବୋଲି ସୂଚନା ଦେଇଛନ୍ତି ସ୍ୱାସ୍ଥ୍ୟ ସଚିବ ପ୍ରଦୀପ୍ତ ମହାପାତ୍ର ।

ଏହା ସହିତ କରୋନା ସ୍ଥିତି ସମ୍ପର୍କରେ ରାଜ୍ୟବାସୀଙ୍କୁ ସୂଚନା ଦେଇ ସେ କହିଛନ୍ତି, ତୃତୀୟ ପର୍ଯ୍ୟାୟରେ 1 କୋଟି 92 ଲକ୍ଷ ଲୋକ ଟିକା ନେବେ । ଟିକା ପାଇଁ ଦୁଇ କମ୍ପାନି ସେରମ ଇନଷ୍ଟିଚ୍ୟୁଟ ଓ ଭାରତ ବାୟୋଟେକ ସହ ଯୋଗାଯୋଗ ଜାରି ରହିଛି । ତେବେ ଟିକା କେବେ ଆସିବ ତାହା ଜଣାପଡ଼ିନାହିଁ । ଟିକା ଆସିଲେ ହିଁ ଟୀକାକରଣ ଆରମ୍ଭ ହେବ । ଦୁଇ କମ୍ପାନି ଟିକା ଯୋଗାଇବାକୁ ପ୍ରତିଶୃତି ଦେଇଛନ୍ତି । ତା ପୂର୍ବରୁ ସମସ୍ତେ ପଞ୍ଜୀକରଣ କରାନ୍ତୁ । ଟିକା ପହଞ୍ଚିବା ପରେ ଟୀକାକରଣ ସମ୍ପର୍କରେ ଜଣାଇଦିଆଯିବ ବୋଲି କହିଛନ୍ତି ଶ୍ରୀ ମହାପାତ୍ର ।

ଏହା ସହିତ ମେ ପହିଲାରୁ ସାରା ଦେଶରେ 18 ବର୍ଷରୁ ଉର୍ଦ୍ଧ୍ବ ବର୍ଗର ଲୋକମାନଙ୍କ ଟୀକାକରଣ ଆରମ୍ଭ ହେଉଥିବାବେଳେ ଓଡ଼ିଶାରେ ସପ୍ତାହାନ୍ତ ସଟଡାଉନ ଯୋଗୁଁ ଟୀକାକରଣ ହେବ ନାହିଁ ବୋଲି ରାଜ୍ୟ ସ୍ବାସ୍ଥ୍ୟ ସଚିବ ପ୍ରଦୀପ୍ତ ମହାପାତ୍ର କହିଛନ୍ତି ।

ଅନ୍ୟପକ୍ଷରେ ରାଜ୍ୟରେ ଏପର୍ଯ୍ୟନ୍ତ ମୋଟ 57 ଲକ୍ଷ 76 ହଜାର ଡୋଜ ଦିଆଯାଇଛି । ଆମ ରାଜ୍ୟରେ ମାଇନସ୍ 2.7 ପ୍ରତିଶତ ଟିକା ନଷ୍ଟ ହୋଇଛି । ରାଜ୍ୟରେ ପ୍ରତିଦିନ 18 ହଜାର ଆରଟି-ପିସିଆର ଟେଷ୍ଟ ହେଉଛି । ବର୍ତ୍ତମାନ ରାଜ୍ୟରେ 40 ହଜାର ଅକ୍ସିଜେନ୍ ସଂଲଗ୍ନ ବେଡ୍ ରହିଛି । ଏହାସହିତ 8ହଜାର 436 ଜେନେରାଲ ବେଡ୍ ଥିବାବେଳେ 2063ଟି ଆସିୟୁ ବେଡ୍ ରହିଛି । ପ୍ରତ୍ୟେକ ଜିଲ୍ଲାରେ ଦ୍ୱିତୀୟ ଡୋଜ୍ ନେବାକୁ ଥିବା ଲୋକମାନଙ୍କୁ ପ୍ରାଥମିକତା ଦିଆଯାଉଛି । ଏଣୁ ସେମାନଙ୍କୁ ଆଗ ସୁଯୋଗ ଦେବାକୁ ସେ ଲୋକମାନଙ୍କୁ ଅନୁରୋଧ କରିଛନ୍ତି ।

ଗଣମାଧ୍ୟମକୁ ସୂଚନା ଦେଇ ଶ୍ରୀ ମହାପାତ୍ର କହିଛନ୍ତି, ଲୋକମାନେ ଭୟଭୀତ ହୋଇ ହସ୍ପିଟାଲରେ ଭର୍ତ୍ତି ହେଉଛନ୍ତି । ରାଜ୍ୟରେ ବର୍ତ୍ତମାନ 61 ହଜାର 698 ସକ୍ରିୟ ମାମଲା ରହିଥିବା ବେଳେ 89 ପ୍ରତିଶତ ଲୋକେ ହୋମ୍ ଆଇସୋଲେସନ୍‌ରେ ରହିଛନ୍ତି । ସଂକ୍ରମିତଙ୍କ ମଧ୍ୟରୁ ପ୍ରାୟ 95 ପ୍ରତିଶତ ଲୋକ ଘରେ ରହି ଚିକିତ୍ସିତ ହୋଇପାରିବେ ବୋଲି ବରିଷ୍ଠ ବିଶେଷଜ୍ଞମାନଙ୍କ ମତ ରହିଛି ବୋଲି ସେ କହିଛନ୍ତି ।

Published On April 30, 2021