ବିଧାନସଭା ନିର୍ବାଚନ ଲଢିପାରନ୍ତି ପ୍ରିୟଙ୍କା ଗାନ୍ଧୀ, ଆମେଠୀ କିମ୍ବା ରାୟବରେଲୀରୁ ହୋଇପାରନ୍ତି ପ୍ରାର୍ଥୀ

କଂଗ୍ରେସ ସାଧାରଣ ସମ୍ପାଦକ ତଥା ଉତ୍ତରପ୍ରଦେଶ ଦାୟିତ୍ୱରେ ଥିବା ପ୍ରିୟଙ୍କା ଗାନ୍ଧୀ ଆଗାମୀ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିପାରନ୍ତି । କେବଳ ଏତିକି ନୁହେଁ ପ୍ରିୟଙ୍କା ଗାନ୍ଧୀ ଆମେଠୀ କିମ୍ବା ରାୟବରେଲୀ ଆସନରୁ ଛି଼ଡା ହୋଇପାରନ୍ତି ।

Published: Wednesday, September 15, 2021, 17:01 [IST]

ଲକ୍ଷ୍ନୌ : ଆସନ୍ତା ବର୍ଷ ହେବାକୁ ଥିବା 2022 ଉତ୍ତରପ୍ରଦେଶ ବିଧାନସଭା ନିର୍ବାଚନ ପାଇଁ କଂଗ୍ରେସ ଅଣ୍ଟା ଭିଡ଼ିଛି । ସମସ୍ତ ରାଜନୈତିକ ଦଳ ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଛନ୍ତି । ଏହି ସମୟରେ ରାଜନୈତିକ କରିଡ଼ରରେ ଆଲୋଚନା ହେଉଛି ଯେ କଂଗ୍ରେସ ସାଧାରଣ ସମ୍ପାଦକ ତଥା ଉତ୍ତରପ୍ରଦେଶ ଦାୟିତ୍ୱରେ ଥିବା ପ୍ରିୟଙ୍କା ଗାନ୍ଧୀ ଆଗାମୀ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିପାରନ୍ତି ।

କେବଳ ଏତିକି ନୁହେଁ ପ୍ରିୟଙ୍କା ଗାନ୍ଧୀ ଆମେଠୀ କିମ୍ବା ରାୟବରେଲୀ ଆସନରୁ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଥିବା ନେଇ ମଧ୍ୟ କଳ୍ପନାଜଳ୍ପନା ଚାଲିଛି । ଯଦି ତାହା ହୁଏ, ସେ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଥିବା ଗାନ୍ଧୀ ପରିବାରର ପ୍ରଥମ ସଦସ୍ୟ ହେବେ । ଏହାପୂର୍ବରୁ ଗାନ୍ଧୀ ପରିବାରର ସମସ୍ତ ସଦସ୍ୟ କେବଳ ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଛନ୍ତି ।

ଗଣମାଧ୍ୟମର ରିପୋର୍ଟ ଅନୁଯାୟୀ, କୁହାଯାଉଛି ଯେ କଂଗ୍ରେସ ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀଙ୍କ ପ୍ରଥମ ପସନ୍ଦ ହେଉଛି ଆମେଠୀ ବିଧାନସଭା ନିର୍ବାଚନମଣ୍ଡଳୀ । କାରଣ ଏହି ଆସନ କଂଗ୍ରେସର ଗଡ଼ ରହି ଆସିଛି । ଯଦିଓ ରାୟବରେଲୀ ଆସନ ମଧ୍ୟ କଂଗ୍ରେସର ଏକ ଗଡ଼, କିନ୍ତୁ ଆମେଠୀ ଆସନରେ ବିଜେପି ଠାରୁ ରାହୁଲ ଗାନ୍ଧୀଙ୍କ ପରାଜୟର ପ୍ରତିଶୋଧ ନେବାକୁ ସେ ଆମେଠୀକୁ ପସନ୍ଦ କରୁଥିବା କୁହାଯାଉଛି । ଏକାସାଙ୍ଗରେ, ପ୍ରିୟଙ୍କା 2024 ଲୋକସଭା ନିର୍ବାଚନରେ ସ୍ମୃତି ଇରାନୀଙ୍କୁ ଚ୍ୟାଲେଞ୍ଜ କରିବା ପାଇଁ ଆମେଠୀରେ ହେବାକୁ ଥିବା ଲୋକସଭା ନିର୍ବାଚନ ପାଇଁ ମଧ୍ୟ ପ୍ରସ୍ତୁତ କରିବେ ।

କହିବାକୁ ଗଲେ, ଉତ୍ତରପ୍ରଦେଶ ନିର୍ବାଚନରେ କଂଗ୍ରେସ ଦଳ ନିଜକୁ ପ୍ରକୃତ ବିକଳ୍ପ ଭାବରେ ପ୍ରମାଣ କରିବାକୁ ସମ୍ପୂର୍ଣ୍ଣ ପ୍ରସ୍ତୁତି ସହ କ୍ଷେତ୍ରକୁ ପ୍ରବେଶ କରିବାକୁ ପ୍ରସ୍ତୁତ ହେଉଛି । ତେଣୁ କଂଗ୍ରେସ ଛାଡି ଅନ୍ୟ ଦଳକୁ ଯାଇଥିବା ଲୋକଙ୍କୁ ଫେରାଇ ଆଣିବା ପାଇଁ ପ୍ରିୟଙ୍କା ଗାନ୍ଧୀ ସମସ୍ତ ଉଦ୍ୟମ କରିବାକୁ ନିର୍ଦ୍ଦେଶ ଦେଇଛନ୍ତି । ମିଡିଆ ରିପୋର୍ଟ ଅନୁଯାୟୀ ପ୍ରିୟଙ୍କା ଗାନ୍ଧୀ କହିଛନ୍ତି ଯେ ଯଦି ଆବଶ୍ୟକ ହୁଏ ତେବେ ସେ ନିଜେ ସେହି ନେତାଙ୍କ ଘରକୁ ଯିବେ କିମ୍ବା ଫୋନରେ ସେମାନଙ୍କ ସହ କଥା ହେବେ ।

Published On September 15, 2021