ଅକ୍ସିଜେନ୍ ଅଭାବୀ ମୃତ୍ୟୁ : ପ୍ରଥମେ ମନା କଲା କେନ୍ଦ୍ର, ଏବେ ରାଜ୍ୟକୁ ମାଗିଲା ଅକ୍ସିଜେନ ଅଭାବ ମୃତ୍ୟୁ ରିପୋର୍ଟ

କିନ୍ତୁ ଆଜି ପୁଣି କରୋନା କାଳରେ ଅକ୍ସିଜେନ୍ ଅଭାବରୁ ହୋଇଥିବା ମୃତ୍ୟୁ ରିପୋର୍ଟ ଦାଖଲ କରିବାକୁ ସମସ୍ତ ରାଜ୍ୟକୁ କହିଛି କେନ୍ଦ୍ର ।

Updated: Tuesday, July 27, 2021, 20:49 [IST]

ନୂଆଦିଲ୍ଲୀ : କରୋନା କାଳରେ ଅକ୍ସିଜେନ୍ ଅଭାବରୁ ଦେଶରେ କୌଣସି ମୃତ୍ୟୁ ହୋଇନାହିଁ । ଏନେଇ କିଛି ଦିନ ପୂର୍ବରୁ ମୌସୁମୀ ଅଧିବେଶନରେ ରାଜ୍ୟସଭାରେ ବିବୃତ୍ତି ରଖିଥିଲେ କେନ୍ଦ୍ର ସ୍ୱାସ୍ଥ୍ୟ ରାଜ୍ୟମନ୍ତ୍ରୀ ଭାରତୀ ପ୍ରବୀଣ ପାୱାର । ସେ କହିଥିଲେ ଏପରି କୌଣସି ରିପୋର୍ଟ ନାହିଁ, ଯେଉଁଥିରୁ ଜଣାପଡ଼ିବ ରାଜ୍ୟ କିମ୍ବା କେନ୍ଦ୍ର କେନ୍ଦ୍ର ଶାସିତ ସରକାର ମୃତ୍ୟୁସଂଖ୍ୟାକୁ ଲୁଚାଇ ରଖିଛନ୍ତି ଏବଂ ଅମ୍ଳଜାନ ଅଭାବ ହେତୁ କୌଣସି ମୃତ୍ୟୁ ହୋଇ ନାହିଁ । କେତେକ ରାଜ୍ୟ ମୃତ୍ୟୁ ହାରକୁ ନିଶ୍ଚିତ ରୂପେ ସଂଶୋଧନ କରିଛନ୍ତି । କରୋନାଙ୍କ ମୃତ୍ୟୁ ସଂଖ୍ୟାକୁ ଲୁଚାଇ ରଖିଥିବା ବିରୋଧୀଙ୍କ ଅଭିଯୋଗରେ ଭାରତୀ ପାୱାର ଏହି ଉତ୍ତର ରଖିଥିଲେ । ଏହାପରେ ଏହାକୁ ନେଇ ଆରମ୍ଭ ହୋଇଥିଲା ରାଜନାତିକ ତୁମ୍ବିତୋଫାନ ।

କିନ୍ତୁ ଆଜି ପୁଣି କରୋନା କାଳରେ ଅକ୍ସିଜେନ୍ ଅଭାବରୁ ହୋଇଥିବା ମୃତ୍ୟୁ ରିପୋର୍ଟ ଦାଖଲ କରିବାକୁ ସମସ୍ତ ରାଜ୍ୟକୁ କହିଛି କେନ୍ଦ୍ର ।

ଗଣମାଧ୍ୟମ ରିପୋର୍ଟ ସୂତ୍ରରୁ ପ୍ରକାଶ ଯେ ମେଡିକାଲ ଅମ୍ଳଜାନ ଅଭାବ ହେତୁ ହୋଇଥିବା ମୃତ୍ୟୁ ସଂଖ୍ୟାକୁ ଅଗଷ୍ଟ 13 ରେ ସଂସଦର ମୌସୁମୀ ଅଧିବେଶନ ଶେଷ ହେବା ପୂର୍ବରୁ ଉଭୟ ଗୃହରେ ଭାରତ ସରକାର ଉପସ୍ଥାପନ କରିବେ ।

ଦେଶରେ କରୋନା ଦ୍ୱିତୀୟ ଲହର ଯେତିକି ଭୟାନକ ହୋଇଥିଲା, ତା ଠାରୁ ଅଧିକ ଭୟାନକ ଥିଲା ମେଡ଼ିକାଲ ଅକ୍ସିଜେନ୍, ଔଷଧ ଏବଂ ଶଯ୍ୟା ଅଭାବରୁ ପ୍ରାଣ ହରାଇଥିବା ରୋଗୀଙ୍କ ସଂଖ୍ୟା । ବିଭିନ୍ନ ରାଜ୍ୟ ଅକ୍ସିଜେନ୍ ଅଭାବ ନେଇ କେନ୍ଦ୍ର ନିକଟରେ ଅଭିଯୋଗ କରୁଥିବା ବେଳେ ଅକ୍ସିଜେନ୍ ଅଭାବ ନଥିବା ଦାବି କରିଥିଲେ କେନ୍ଦ୍ର ସରକାର । କିନ୍ତୁ ବିଭିନ୍ନ ଗଣମାଧ୍ୟମରେ ଶିରୋନାମା ପାଲଟିଥିଲା ଅକ୍ସିଜେନ୍ ଅଭାବଜନିତ ମୃତ୍ୟୁ । ତେବେ ବର୍ତ୍ତମାନ କେନ୍ଦ୍ର ସରକାର ସମସ୍ତ ରାଜ୍ୟକୁ କରୋନା ସମୟରେ ଅକ୍ସିଜେନ୍ ଅଭାବରୁ ହୋଇଥିବା ମୃତ୍ୟୁର ରିପୋର୍ଟ ମାଗିଛନ୍ତି ।