ଅନଲାଇନ୍‌ ଗେମ୍‌କୁ ଖେଳିବାକୁ ବାପା ମାଆ ବାରଣ କରିବାରୁ ଜୀବନ ହାରିଲେ ୩ ଭଉଣୀ

Updated: Wednesday, February 4, 2026, 12:40 [IST]

ଉତ୍ତର ପ୍ରଦେଶ ଗାଜିଆବାଦରେ ଜୀବନ ହାରିଲେ ୩ ନାବାଳିକା ଭଉଣୀ। ଆପାର୍ଟମେଣ୍ଟର ନବମ ମହଲାରୁ ଡେଇଁ ୩ ଭଉଣୀ ଜୀବନ ହାରିଲେ । ୧୨, ୧୪ ଓ ୧୬ ବର୍ଷୀୟା ୩ ଭଉଣୀଙ୍କ ଆତ୍ମହତ୍ୟା। ଅନଲାଇନ୍‌ ଗେମ୍‌କୁ ବାପା ମାଆ ଆକଟ କରିବାରୁ ଚରମ ପଦକ୍ଷେପ। କୋରିଆନ୍ ଲଭ୍ ଗେମ୍ ନାମକ ଅନଲାଇନ୍ ଟାସ୍କରେ ୩ ଜଣ ମାତିଥିଲେ। ଅନଲାଇନ୍‌ ଗେମ୍‌ ପାଇଁ ସବୁଦିନ ସ୍କୁଲ ମଧ୍ୟ ଯାଉ ନଥିଲେ। ଯାହାକୁ ନେଇ ବାପା ମାଆ ଆକଟ କରିବାରୁ ଚରମ ପଦକ୍ଷେପ ନେଇଛନ୍ତି ।

ଟିଲା ମୋଡ ଥାନା ଅଞ୍ଚଳ ଅନ୍ତର୍ଗତ ଭାରତ ସିଟି ସୋସାଇଟିରେ ଏହି ଘଟଣା ଘଟିଛି। ତିନି ଜଣ ରାତି ୨ଟାରେ ଏହି ଭୟଙ୍କର ପଦକ୍ଷେପ ନେଇଥିଲେ। ସେମାନେ ଅନଲାଇନ ଟାସ୍କ-ଭିତ୍ତିକ ଖେଳ କୋରିଆନ ଲଭ ଗେମ୍‌ ଖେଳୁଥିବାର ଜଣାପଡ଼ିଥିଲା। ଆତ୍ମହତ୍ୟା ପରେ ଅଞ୍ଚଳରେ ଆତଙ୍କ ଖେଳିଯାଇଛି। ଭଉଣୀମାନେ ନିଶିକା (୧୬), ପ୍ରାଚୀ (୧୪) ଏବଂ ପାଖି (୧୨) ବୋଲି ଚିହ୍ନଟ ହୋଇଛନ୍ତି।

ଏହା ମଧ୍ୟ କୁହାଯାଉଛି ଯେ, ତିନି ଭଉଣୀ ଗାଧୋଇବା, ଖାଇବା, ସ୍କୁଲ ଯିବା ଏବଂ ଶୋଇବା ସମେତ ସବୁକିଛି ଏକାଠି କରୁଥିଲେ। ସେମାନେ ସବୁବେଳେ ଏକାଠି ରହୁଥିଲେ। ସେମାନଙ୍କ ମୃତ୍ୟୁରେ ପରିବାର ମର୍ମାହତ।

ତିନି ଭଉଣୀ ପିତା ଚେତନ କୁମାର କହିଛନ୍ତି, COVID-19 ମହାମାରୀ ସମୟରେ ତିନି ଝିଅ ମୋବାଇଲ ଗେମ ପ୍ରତି ଏକପ୍ରକାର ନିଶାଗ୍ରସ୍ତ ହୋଇଯାଇଥିଲେ। ତିନି ଜଣ ଟାର୍ଗେଟ ଗେମ ଖେଳିଥିଲେ। କିନ୍ତୁ ଆମେ ଜାଣିନାହୁଁ ଯେ, ସେମାନେ ଏପରି କାହିଁକି କରିଥିଲେ। ପୋଲିସ ଅନୁଯାୟୀ, ସେମାନଙ୍କର ସ୍କୁଲ ପାଠପଢ଼ା ନିୟମିତ ନ ଥିଲା।

ପୋଲିସ କହିଛି, ସମ୍ପୂର୍ଣ୍ଣ ଘଟଣାଟି ପ୍ରାୟ ରାତି ୨ଟା ସମୟରେ ଭାରତ ସିଟି ବି-୧ ଟାୱାରର ଫ୍ଲାଟ ନମ୍ବର ୯୦୭ରେ ଘଟିଥିଲା। ସ୍ଥାନୀୟ ଲୋକମାନେ କହିଛନ୍ତି ଯେ, ବିଳମ୍ବିତ ରାତିରେ ଏକ ଜୋରରେ ଶବ୍ଦ ଶୁଣି ସେମାନେ ସମସ୍ତେ ବାହାରକୁ ଆସିଥିଲେ। ସମସ୍ତ ଦିଗର ତଦନ୍ତ କରାଯାଉଛି। ଡିଜିଟାଲ କାର୍ଯ୍ୟକଳାପ, ନିକଟବର୍ତ୍ତୀ ସିସି ଟିଭି ଫୁଟେଜ ଏବଂ ମୋବାଇଲ ଫୋନ ଡାଟାର ଫରେନସିକ ଯାଞ୍ଚ କରାଯିବ।