ଅନ୍ତିମ ଟ୍ବେଣ୍ଟି୨୦ ଆଜି : ମୂଳପୋଛରୁ ବର୍ତ୍ତିବା ଲକ୍ଷ୍ୟରେ ଭାରତ

Published: Saturday, July 11, 2026, 16:22 [IST]

ଭାରତ ଓ ଇଂଲଣ୍ଡ ମଧ୍ୟରେ ଚାଲିଥିବା ୫ ମ୍ୟାଚ ବିଶିଷ୍ଟ ଟ୍ବେଣ୍ଟି୨୦ ଶୃଙ୍ଖଳାର ପଞ୍ଚମ ତଥା ଅନ୍ତିମ ମ୍ୟାଚ ଶନିବାର ସାଉଥହମ୍ପଟନର ରୋଜ୍‌ବାୱେଲ ଷ୍ଟାଡ଼ିୟମରେ ଖେଳାଯିବ। ଘରୋଇ ଇଂଲଣ୍ଡ ଶୃଙ୍ଖଳାକୁ ୩-୦ରେ ଆଗୁଆ ବିଜୟୀ ହୋଇ ସାରିଥିବାରୁ ଶେଷ ମ୍ୟାଚକୁ ଜିତି ମୂଳପୋଛ ଲକ୍ଷ୍ୟ ରଖିଛି। ଶ୍ରେୟସ ଆୟରଙ୍କ ନେତୃତ୍ବାଧିନ ଭାରତ କ୍ରମାଗତ ଦ୍ବିତୀୟ ଟ୍ବେଣ୍ଟି୨୦ ଶୃଙ୍ଖଳାରେ ପରାଜିତ ହୋଇଥିବାବେଳେ ଇଂଲଣ୍ଡ ବିପକ୍ଷ ଅନ୍ତିମ ମ୍ୟାଚକୁ ଜିତି ସମ୍ମାନ ରକ୍ଷ‌ା କରିବାକୁ ଉଦ୍ୟମ କରିବ।

ଭାରତ ଉକ୍ତ ଶୃଙ୍ଖଳାରେ ଉଭୟ ବ୍ୟାଟିଂ ଓ ବୋଲିଂରେ ବିଫଳ ହୋଇଛି। ବିଶେଷ କରି ଶେଷ ଦୁଇ ମ୍ୟାଚରେ ଭାରତ ଅତ୍ୟାନ୍ତ ନୈରାଶ୍ୟଜନକ ପ୍ରଦର୍ଶନ କରିଥିଲା। ତୃତୀୟ ମ୍ୟାଚରେ ୭୬ରନରେ ଅଲ୍‌ଆଉଟ୍‌ ହୋଇଥିବାବେଳେ ଚତୁର୍ଥ ମ୍ୟାଚରେ ୯ ୱିକେଟରେ ପରାଜିତ ହୋଇଥିଲା। ଶ୍ରେୟସ ଆୟରଙ୍କ ଦୁଇଟି ଓ ଅଭି‌େ‌ଷକ ଶର୍ମାଙ୍କ ଗୋଟିଏ ଅର୍ଦ୍ଧଶତକକୁ ବାଦ୍‌ ଦେଲେ ଅନ୍ୟ କୌଣସି ବ୍ୟାଟ୍‌ସମ୍ୟାନ ବଡ଼ ସ୍କୋର କରିବାରେ ବିଫଳ ହୋଇଛନ୍ତି। ଯୁବ ଓପନର ବୈଭବ ସୂର୍ଯ୍ୟବଂଶୀ ୩ଟି ମ୍ୟାଚ ଖେଳି ୧୪, ୧୩ ଓ ୧୫ରନ କରିଛନ୍ତି। ବୈଭବଙ୍କ ସ୍ଥାନରେ ଶେଷ ମ୍ୟାଚରେ ସଞ୍ଜୁ ସାମସନ ଖେଳିବା ନେଇ ସମ୍ଭାବନା ରହିଛି। ତିଳକ ବର୍ମା, ଈଶାନ କିଷନ, ଶିବମ ଦୁବେ ରନ କରିବାକୁ ସଂଘର୍ଷ କରୁଛନ୍ତି। ଯାହା ଭାରତ ପାଇଁ ବଡ଼ ଚିନ୍ତ‌ାର ବିଷୟ। ବୋଲିଂ ବିଭାଗରେ ମଧ୍ୟ ଭାରତ ଅସ୍ଥିର ପ୍ରଦର୍ଶନ କରୁଛି। ଅର୍ଶଦୀପ୍‌ ସିଂହ, ପ୍ରସିଦ୍ଧ କୃଷ୍ଣ, ପ୍ରିନ୍‌ସ ଯାଦବ ଦ୍ରୁତ ବୋଲିଂରେ ସେଭଳି ପ୍ରଭାବ ପକାଇ ପାରୁନାହାନ୍ତି। ଅକ୍ଷର ପଟେଲ, ୱାଶିଂଟନ ସୁନ୍ଦର ସ୍ପିନର ଭାବେ ଏପର୍ଯ୍ୟନ୍ତ ସଫଳ ହୋଇପାରିନାହାନ୍ତି। ଶେଷ ମ୍ୟାଚରେ ଅକ୍ଷରଙ୍କ ସ୍ଥାନରେ କୁଳଦୀପ୍‌ ଯାଦବ ଖେଳିବାର ସମ୍ଭାବନା ରହିଛି। ଅନ୍ୟପକ୍ଷରେ ହ୍ୟାରୀ ବ୍ରୁକ୍‌ଙ୍କ ନେତୃତ୍ବାଧିନ ଇଂଲଣ୍ଡ ଉଭୟ ବ୍ୟାଟିଂ ଓ ବୋଲିଂରେ ଭଲ ପ୍ରଦର୍ଶନ କରୁଛି। ଫିଲ୍‌ ସଲ୍‌ଟ, ଜୋଶ ବଟ୍‌ଲର, ଜ୍ୟାକବ ବିଥେଲ, ୱିଲ ଜ୍ୟାକ୍‌ସ, ହ୍ୟାରୀ ବ୍ରୁକ୍‌, ସାମ କୁରାନ ରନ କରୁଛନ୍ତି। ଯାହା ଦଳ ପାଇଁ ବିଜୟ ସହଜ ହେଉଛି। ବୋଲିଂ ବିଭାଗରେ ଜୋଫ୍ରା ଆର୍ଚର, ଜୋଶ ଟଙ୍ଗ, ୱିଲ୍‌ ଜ୍ୟାକ୍‌ସ, ଆଦିଲ ରସିଦ ୱିକେଟ ହାସଲ କରିବା ସହିତ ଭାରତୀୟ ବ୍ୟାଟ୍‌ସମ୍ୟାନଙ୍କୁ ରୋକିବାରେ ସଫଳ ହେଉଛନ୍ତି। ଇଂଲଣ୍ଡ ଉଭୟ ବିଭାଗରେ ଭଲ ପ୍ରଦର୍ଶନ କରୁଥିବାରୁ ଶେଷ ମ୍ୟାଚକୁ ଜିତିବା ନେଇ ମଧ୍ୟ ଦୃଢ ଆଶାବାଦୀ ରହିଛି। ୫ ମ୍ୟାଚ ବିଶିଷ୍ଟ ଶୃଙ୍ଖଳାର ପ୍ରଥମ ମ୍ୟାଚ ବର୍ଷା ପାଇଁ ବାତିଲ ହୋଇଯାଇଥିବାବେଳେ ଇଂଲଣ୍ଡ ଦ୍ବିତୀୟ ମ୍ୟାଚକୁ ୪ ୱିକେଟରେ, ତୃତୀୟ ମ୍ୟାଚକୁ ୧୨୫ରନ ଓ ଚତୁର୍ଥ ମ୍ୟାଚକୁ ୯ ୱିକେଟରେ ଜିତିଥିଲା। ସୂଚନାଯୋଗ୍ୟ, ଇଂଲଣ୍ଡ ବିପକ୍ଷ ଟ୍ବେଣ୍ଟି୨୦ ଶୃଙ୍ଖଳା ପୂର୍ବରୁ ଭାରତ ଆୟରଲାଣ୍ଡ ନିକଟରୁ ଟ୍ବେଣ୍ଟି୨୦ ଶୃଙ୍ଖଳାରେ ପରାଜିତ ହୋଇଥିଲା।

Published On July 11, 2026