କିଏ ସମ୍ଭାଳିବେ ଏନସିପି କମାଣ, କିଏ ହେବେ ଶରଦ ପାୱାରଙ୍କ ଉତ୍ତରାଧିକାରୀ ?

ମୁମ୍ବାଇ : ଏନସିପି ସୁପ୍ରିମୋ ଶରଦ ପାୱାର ମଙ୍ଗଳବାର ଦିନ ଦଳର ସଭାପତି ପଦରୁ ଇସ୍ତଫା ଦେବେ ବୋଲି ଘୋଷଣା କରିଛନ୍ତି । ଏହା ପରେ ମହାରାଷ୍ଟ୍ର ରାଜନୀତିରେ ଆଲୋଡ଼ନ ସୃଷ୍ଟି ହୋଇଛି । ଏବେ କଳ୍ପନାଜଳ୍ପନା ଆରମ୍ଭ ହୋଇଛି ଯେ ତାଙ୍କ ପରେ ଦଳର କମାଣ କିଏ ସମ୍ଭାଳିବେ, କାହା କାନ୍ଧରେ ରହିବ ଏନସିପି ଭାର ?

ଶରଦ ପାୱାର କେବଳ ଏନସିପିର ସର୍ବେସର୍ବା ନୁହଁନ୍ତି, ମହାରାଷ୍ଟ୍ରର ମୁଖ୍ୟ ବିରୋଧୀ ଦଳ ମହା ବିକାଶ ଅଘାଡ଼ିର ସବୁଠାରୁ ବଡ କାର୍ଯ୍ୟକର୍ତ୍ତା । ଏବେ ପ୍ରଶ୍ନ ଉଠୁଛି ତାଙ୍କ ପରେ ଶରଦଙ୍କ ଉତ୍ତରାଧିକାରୀ କିଏ ହେବେ ? କାରଣ, ପାୱାରଙ୍କ ଉତ୍ତରାଧିକାରୀ କେବଳ ଏନସିପି ପାଇଁ ନୁହେଁ, ରାଜ୍ୟର ବିରୋଧୀ ରାଜନୀତି ପାଇଁ ମଧ୍ୟ ଗୁରୁତ୍ୱପୂର୍ଣ୍ଣ ।

ଯେଉଁମାନେ ଏନସିପିର ଆଭ୍ୟନ୍ତରୀଣ ରାଜନୀତିକୁ ବୁଝନ୍ତି, ସେମାନେ ଜାଣନ୍ତି ଯେ ଦଳର କାର୍ଯ୍ୟକଳାପ ସଂପର୍କରେ ପାୱାରଙ୍କ ପରିବାରରେ ସବୁକିଛି ଠିକ ଚାଲି ନାହିଁ । ମୁଖ୍ୟତଃ ଦୁଇଜଣ ମୁଖ୍ୟ ପ୍ରତିଯୋଗୀଙ୍କୁ ତାଙ୍କର ଉତ୍ତରାଧିକାରୀ ଭାବରେ ବିବେଚନା କରାଯାଉଛି ।

ପ୍ରଥମ ପ୍ରତିଯୋଗୀ ହେଉଛନ୍ତି ଶରଦ ପାୱାରଙ୍କ ଏକମାତ୍ର ଝିଅ ତଥା ଏନସିପି ସାଂସଦ ସୁପ୍ରିୟା ସୁଲେ । ଦ୍ୱିତୀୟ ପ୍ରତିଯୋଗୀଙ୍କ ମଧ୍ୟରେ ବରିଷ୍ଠ ଏନସିପି ନେତା ତଥା ପୱାରଙ୍କ ପୁତୁରା ଅଜିତ ପାୱାରଙ୍କ ନାମ ଆସୁଛି । କିନ୍ତୁ, ଅଜିତ ପାୱାରଙ୍କର ନିଜର ଏକ ରାଜନୈତିକ କ୍ୟାରିୟର ରହିଛି ଏବଂ ସମ୍ପର୍କୀୟ ସୁପ୍ରିୟା ସୁଲେଙ୍କ ସହ ତାଙ୍କର ରାଜନୈତିକ ସମ୍ପର୍କ ଭଲ ନୁହେଁ ବୋଲି ସର୍ବସାଧାରଣରେ ଚର୍ଚ୍ଚା ହେଉଛି ।

2019 ମହାରାଷ୍ଟ୍ର ବିଧାନସଭା ନିର୍ବାଚନ ପରେ ଅଜିତ ପାୱାର ହଠାତ୍ ଉପମୁଖ୍ୟମନ୍ତ୍ରୀ ଭାବରେ ବିଜେପିର ଦେବେନ୍ଦ୍ର ଫଡନାଭିସଙ୍କ ସହ ଶପଥ ଗ୍ରହଣ କରିବା ପରେ ପୱାର ପରିବାରରେ ମତଭେଦ ସାର୍ବଜନୀନ ହୋଇଥିଲା । ସୁପ୍ରିୟା ସୁଲେ ତାଙ୍କ କାର୍ଯ୍ୟକଳାପକୁ ନେଇ ଅସନ୍ତୋଷ ପ୍ରକାଶ କରିଥିଲେ ।
କେବଳ ଏତିକି ନୁହେଁ, ଅତୀତରେ ଅଜିତ ପାୱାର ମୁଖ୍ୟମନ୍ତ୍ରୀ ପଦ ପାଇଁ ନିଜର ଅଭିଳାଷକୁ କିପରି ପ୍ରକାଶ କରିଛନ୍ତି ଏବଂ ହଠାତ୍ ପାୱାର ଦଳର ମୁଖ୍ୟ ପଦ ଛାଡିଛନ୍ତି, ତାହାକୁ ନେଇ ସନ୍ଦେହ ଉପୁଜିଛି ।

ଏହା ମଧ୍ୟ ସତ ଯେ ଶରଦ ପାୱାର ସୁପ୍ରିୟା ସୁଲେଙ୍କୁ ଜାତୀୟ ରାଜନୀତିରେ ଆଣିଛନ୍ତି । ମହାରାଷ୍ଟ୍ରରେ ବିଜେପି ସହ ଯିବା ଭୁଲ୍ କୁ ଅଣଦେଖା କରିବା ପରେ ମଧ୍ୟ ସେ ଅଜିତ ପାୱାରଙ୍କୁ ଉଦ୍ଧବ ଠାକରେ ସରକାରରେ ଡେପୁଟି ସିଏମ ହେବାର ସୁଯୋଗ ଦେଇଛନ୍ତି ।

ପୱାରଙ୍କ ପରିବାରର ଏହି ରାଜନୈତିକ ପୃଷ୍ଠଭୂମିକୁ ଦେଖିଲେ ଏହା ବର୍ତ୍ତମାନ ସମୟରେ ଲାଗୁଛି ଯେ ଯଦି ଶରଦ ପାୱାର ଦଳର କୌଣସି ସଦସ୍ୟଙ୍କୁ ଦଳର ଜାତୀୟ ସଭାପତି ଭାବରେ ଆଶୀର୍ବାଦ ଦେବାକୁ ଚାହାଁନ୍ତି, ତେବେ ଏହା କେବଳ ତାଙ୍କ ଝିଅ ସୁପ୍ରିୟା ସୁଲେ ହୋଇପାରିବେ । ଅଜିତ ପାୱାର ଜାତୀୟ ରାଜନୀତିରେ କୌଣସି ବିଶେଷ ଆଗ୍ରହ ପ୍ରକାଶ କରିନାହାଁନ୍ତି ।
ଉଲ୍ଲେଖଥାଉ କି, ଶରଦ ପାୱାର ଜଣେ ଅଭିଜ୍ଞ ରାଜନେତା ଏବଂ ତାଙ୍କର ଶେଷ ନିଷ୍ପତ୍ତି କ'ଣ ହେବ ତାହା ଏକ ବଡ଼ ପ୍ରଶ୍ନ । ତେବେ ଏହି ସମୟରେ ତାଙ୍କ ନିଷ୍ପତ୍ତି ମହାରାଷ୍ଟ୍ର ରାଜନୀତିରେ ଏକ ନୂଆ ମୋଡ଼ ଆଣିଛି ।

English summary

Who Will Be successor Of Sharad Pawar In the NCP