WesT Bengal Assembly Election : ପଶ୍ଚିମବଙ୍ଗ ଗସ୍ତରେ ବିଜେପି ଅଧ୍ୟକ୍ଷ ଜେ ପି ନଡ୍ଡା : ଆରମ୍ଭ କରିବେ ‘ପରିବର୍ତ୍ତନ ଯାତ୍ରା’

ଶନିବାର ବିଜେପିର ରାଷ୍ଚ୍ରୀୟ ଅଧ୍ୟକ୍ଷ ଜେ ପି ନଡ୍ଡା ପଶ୍ଚିମବଙ୍ଗ ଗସ୍ତା କରିଛନ୍ତି । ସେ ଆଜିଠାରୁ ପଶ୍ଚିମବଙ୍ଗରେ ‘ପରିବର୍ତ୍ତନ ଯାତ୍ରା' ଆରମ୍ଭ କରିବେ ।

Updated: Saturday, February 6, 2021, 18:06 [IST]

କୋଲକାତା : ଆଉ କିଛି ମାସ ପରେ ପଶ୍ଚିମବଙ୍ଗରେ ହେବ ବିଧାନସଭା ନିର୍ବାଚନ । ଏହା ପୂର୍ବରୁ ରାଜନୈତିକ ଦଳ ମାନେ ଏଥିଲାଗି ପ୍ରସ୍ତୁତି କରିବା ସହ ନିର୍ବାଚନୀ ପ୍ରଚାର ଆରମ୍ଭ କରିଦେଇଛନ୍ତି । ବିଶେଷ କରି ପଶ୍ଚିମବଙ୍ଗରେ ଶାସନାଧିନ ତୃଣମୂଳ କଂଗ୍ରେସ ଓ ଭାରତୀୟ ଜନତା ପାର୍ଟି ମଧ୍ୟରେ କଡ଼ା ଟକ୍କର ଲାଗି ରହିଥିବା ଦେଖିବାକୁ ମିଳିଛି । ବିଜେପି ପଶ୍ଚିମବଙ୍ଗରେ ନିଜର ପତିଆରା ବଢାଇବା ସହ ଟିଏମସିକୁ ପଛରେ ପକାଇବା ପାଇଁ ଜୋରଦାର ପ୍ରୟାସ କରୁଛି । ଏହି ସମୟ ମଧ୍ୟରେ ଶନିବାର ବିଜେପିର ରାଷ୍ଚ୍ରୀୟ ଅଧ୍ୟକ୍ଷ ଜେ ପି ନଡ୍ଡା ପଶ୍ଚିମବଙ୍ଗ ଗସ୍ତ କରିଛନ୍ତି । ସେ ଆଜିଠାରୁ ପଶ୍ଚିମବଙ୍ଗରେ 'ପରିବର୍ତ୍ତନ ଯାତ୍ରା' ଆରମ୍ଭ କରିବେ । ଏହାପୂର୍ବରୁ ନଡ୍ଡା ମାଳଦାରେ ଏକ ସାଧାରଣ ସଭାକୁ ସମ୍ବୋଧିତ କରିବା ସମୟରେ ମମତା ବାନାର୍ଜୀଙ୍କୁ ଟାର୍ଗେଟ କରିଛନ୍ତି ।

ସାଧାରଣ ସଭାକୁ ସମ୍ବୋଧିତ କରି ନଡ୍ଡା କହିଛନ୍ତି, 'ଜାନୁଆରୀ 10 ରେ ମୁଁ କୃଷକ ସହଯୋଗ ଏବଂ ସୁରକ୍ଷା ଅଭିଯାନ ଆରମ୍ଭ କରିଥିଲି । ଆମେ କହିଥିଲୁ ଯେ ପ୍ରାୟ 40 ହଜାର ଗାଁରେ ଆମର ଏହି କାର୍ଯ୍ୟକ୍ରମ ହେବ । ମୁଁ ଖୁସି ଯେ ଆଜି 35 ଲକ୍ଷ କୃଷକ ଏହି କୃଷକ ସୁରକ୍ଷା ଅଭିଯାନରେ ଯୋଗ ଦେଇଛନ୍ତି ।'

ସେ ଆହୁରି ମଧ୍ୟ କହିଛନ୍ତି, 'ପଶ୍ଚିମବଙ୍ଗର ଚାଷୀଙ୍କୁ ପ୍ରଧାନମନ୍ତ୍ରୀ କିଷାନ୍ ସମ୍ମାନ ନିଧି ଯୋଜନାର ଲାଭରୁ ବଞ୍ଚିତ କରାଯାଇଛି । ବର୍ତ୍ତମାନ ନିର୍ବାଚନ ପାଖେଇ ଆସୁଥିବାରୁ ମମତା ବାନାର୍ଜୀ ପଶ୍ଚିମବଙ୍ଗର ଚାଷୀଙ୍କୁ ପ୍ରଧାନମନ୍ତ୍ରୀ କିସାନ ସମ୍ମାନ ନିଧି ଯୋଗାଇଦେବାକୁ କହୁଛନ୍ତି । ଆମେ ତାଙ୍କୁ ଅଟକାଇବୁ ନାହିଁ । ଏହା ବ୍ୟତୀତ ସେ ମମତାଙ୍କୁ ଟାର୍ଗେଟ୍ କରି କହିଛନ୍ତି, 'ଦିଦି, ପକ୍ଷୀ କ୍ଷେତକୁ ଗ୍ରାସ କଲାପରେ କ'ଣ ତୁମେ ବର୍ତ୍ତମାନ ଅନୁତାପ କରୁଛ କି ?'

ଏହାବ୍ୟତୀତ ନଡ୍ଡା ଆହୁରି କହିଛନ୍ତି, ଏଥର ପଶ୍ଚିମବଙ୍ଗରେ ନିଶ୍ଚିତ ଭାବରେ ପଦ୍ମ ଫୁଟିବ ଏବଂ ରାଜ୍ୟରେ ବିଜେପି ସରକାର ଗଠନ କରିବ । ପଶ୍ଚିମବଙ୍ଗର ଲୋକମାନେ ମମତା ଦିଦିଙ୍କୁ ଶାସନ ଗାଦିରୁ ବିଦା କରିବାକୁ ନିଷ୍ପତ୍ତି ନେଇସାରିଛନ୍ତି ବୋଲି ସଭାରେ କହିଛନ୍ତି ।

ଅନ୍ୟପକ୍ଷରେ ଆଜିଛୁ ପଶ୍ଚିମବଙ୍ଗରେ ଜନ ସମର୍ଥନ ଯାତ୍ରାର ଶୁଭାରମ୍ଭ କରିଛି ତୃଣମୂଳ କଂଗ୍ରେସ । ପଶ୍ଚିମବଙ୍ଗର ନଦିଆ ଜିଲ୍ଲାରୁ ଦୁଇ ଦିନିଆ ଜନ ସମର୍ଥନ ଯାତ୍ରା କରିଛି ତୃଣମୂଳ କଂଗ୍ରେସ । ଏହି ଜନ ସମର୍ଥନ ଯାତ୍ରା ଛପ୍ରାରୁ ଆରମ୍ଭ ହୋଇ ତ୍ରିବେଣୀ, କୃଷ୍ଣନଗର ଦେଇ ପଲାଶିରେ ଶେଷ ହେବ ।