କଂଗ୍ରେସ ବିନା ହୋଇ ପାରିବ ନାହିଁ ରାଜନୈତିକ ସାମ୍ମୁଖ୍ୟ, KCR ଙ୍କ ଅଛି ନେତୃତ୍ୱର ଦକ୍ଷତା : ସଞ୍ଜୟ ରାଉତ

ବରିଷ୍ଠ ଶିବସେନା ନେତା ସଞ୍ଜୟ ରାଉତ ସ୍ପଷ୍ଟ କରିଛନ୍ତି ଯେ କଂଗ୍ରେସ ବିନା କୌଣସି ପ୍ରକାରର ରାଜନୈତିକ ସାମ୍ମୁଖ୍ୟର ଆଲୋଚନା ହେଉ ନାହିଁ ।

Published: Monday, February 21, 2022, 13:30 [IST]

ନୂଆଦିଲ୍ଲୀ : ନିକଟରେ ତେଲେଙ୍ଗାନା ମୁଖ୍ୟମନ୍ତ୍ରୀ କେସିଆର ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଏବଂ ଏନସିପି ମୁଖ୍ୟ ଶରଦ ପାୱାରଙ୍କୁ ଭେଟିଥିଲେ । ଏହା ପରେ କୁହାଯାଉଛି ବିଜେପି ବିରୋଧରେ ଏକ ନୂତନ ମହାସଂଘର ମୂଳଦୁଆ ପକାଯାଉଛି, କିନ୍ତୁ କଂଗ୍ରେସ ଏହି ସମସ୍ତ ଘଟଣାରୁ ଦୂରରେ ଥିବା ଦେଖିବାକୁ ମିଳୁଛି । କିନ୍ତୁ ଏସବୁ ମଧ୍ୟରେ ବରିଷ୍ଠ ଶିବସେନା ନେତା ସଞ୍ଜୟ ରାଉତ ସ୍ପଷ୍ଟ କରିଛନ୍ତି ଯେ କଂଗ୍ରେସ ବିନା କୌଣସି ପ୍ରକାରର ରାଜନୈତିକ ସାମ୍ମୁଖ୍ୟର ଆଲୋଚନା ହେଉ ନାହିଁ ।

ସଞ୍ଜୟ ରାଉତ କହିଛନ୍ତି ଯେ ଆମେ କେବେ କହି ନାହୁଁ ଯେ କଂଗ୍ରେସ ବିନା କୌଣସି ରାଜନୈତିକ ଫ୍ରଣ୍ଟ ଗଠନ ହେବ । ଯେତେବେଳେ ମମତା ବାନାର୍ଜୀ ଏକ ରାଜନୈତିକ ସାମ୍ମୁଖ୍ୟର ପରାମର୍ଶ ଦେଇଥିଲେ, ସେତେବେଳେ ଶିବସେନା ପ୍ରଥମ ଦଳ ଯିଏକି କଂଗ୍ରେସକୁ ନେବାକୁ କହିଥିଲା । ସମସ୍ତଙ୍କୁ ସାଙ୍ଗରେ ନେଇ ଚାଲିବାରେ KCR ଙ୍କ ନିକଟରେ କ୍ଷମତା ଅଛି । ସେ ସାମ୍ନାରୁ ନେତୃତ୍ୱ ନେଇପାରନ୍ତି ।
ଆପଣଙ୍କୁ କହି ରଖୁଛୁ KCR ରବିବାର ମୁମ୍ବାଇରେ ଉଦ୍ଧବ ଠାକରେଙ୍କୁ ଭେଟିଛନ୍ତି । ଏହି ସମୟରେ ସଞ୍ଜୟ ରାଉତ ଏବଂ ଅଭିନେତା ପ୍ରକାଶ ରାଜ ମଧ୍ୟ ଉପସ୍ଥିତ ଥିଲେ ।

ସୂଚନାଯୋଗ୍ୟ ଯେ ମହାରାଷ୍ଟ୍ରରେ ଶିବସେନା, କଂଗ୍ରେସ ଏବଂ ଏନସିପିର ଏକ ମିଳିତ ସରକାର ଅଛି ଏବଂ ଏହି ମିଳିତ ମଞ୍ଚ ଶିବସେନା ଦ୍ୱାରା ପରିଚାଳିତ ହେଉଛି । ଏହାପୂର୍ବରୁ ଶିବସେନା ମୁଖପାତ୍ର ସାମ୍ନାରେ ପ୍ରକାଶିତ ଏକ ଆର୍ଟିକିଲରେ କୁହାଯାଇଛି ଯେ ଭାରତୀୟ ଜନତା ପାର୍ଟି ବିରୋଧରେ ଜାତୀୟ ସ୍ତରରେ ରାଜନୈତିକ ଏକତା ବିଷୟରେ ଆଲୋଚନା ହୋଇଛି । ଏହା ସହିତ ଗତ କିଛି ଦିନ ଧରି କେ ଚନ୍ଦ୍ର ଶେଖର ରାଓ ବିଜେପି ସରକାର ବିରୋଧରେ ସ୍ୱର ଉତ୍ତୋଳନ କରି କ୍ରମାଗତ ଭାବରେ କେନ୍ଦ୍ର ସରକାରଙ୍କୁ ଟାର୍ଗେଟ୍ କରୁଛନ୍ତି ।

ନିକଟରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ପିତା ରାଜୀବ ଗାନ୍ଧୀଙ୍କ ବିଷୟରେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଯେଉଁଭଳି ଭାବରେ ବିବୃତ୍ତି ଦେଇଥିଲେ, ଏହାକୁ ନେଇ କେସିଆର ତାଙ୍କ ଉପରେ ଘୋର ଆକ୍ରମଣ କରିଛନ୍ତି । ଏହାପରେ କେସିଆର ଖୁବ୍ ଶୀଘ୍ର ମମତା ବାନାର୍ଜୀଙ୍କୁ ମଧ୍ୟ ଭେଟିପାରନ୍ତି ବୋଲି କୁହାଯାଉଛି । ନିକଟରେ କେସିଆର କହିଥିଲେ ଭାରତୀୟ ଜନତା ପାର୍ଟିକୁ ଦେଶରୁ ବାହାର କରିଦିଆଯିବା ଉଚିତ୍, ନଚେତ୍ ଦେଶ ନଷ୍ଟ ହୋଇଯିବ ।

Published On February 21, 2022