ଶେଷ ହେଲା ରାଷ୍ଚ୍ର ମଞ୍ଚର ବୈଠକ : ଦେଶର ପ୍ରସଙ୍ଗ ଉପରେ ପରାମର୍ଶ ଦେବା ପାଇଁ ଗଠନ ହେବ ଟିମ୍
ସମାଜବାଦୀ ପାର୍ଟି ନେତା ଘନଶ୍ୟାମ ତିୱାରୀ କହିଛନ୍ତି ଯେ, ଆଜିର ବୈଠକର ସାରାଂଶ ହେଉଛି ଦେଶରେ ଏକ ବିକଳ୍ପ ଦୃଷ୍ଟିକୋଣ ପ୍ରସ୍ତୁତ କରିବାର ଆବଶ୍ୟକତା ରହିଛି, ଯାହା ସାଧାରଣ ଲୋକଙ୍କ ସହ ଜଡିତ ସମସ୍ୟାର ସମାଧାନ ପାଇଁ ଜରୁରୀ ।
ନୂଆଦିଲ୍ଲୀ : ଜାତୀୟତାବାଦୀ କଂଗ୍ରେସ ପାର୍ଟି (ଏନସିପି) ମୁଖ୍ୟ ଶରଦ ପାୱାରଙ୍କ ବାସଭବନରେ ମଙ୍ଗଳବାର ଅନୁଷ୍ଠିତ ହୋଇଥିବା ରାଷ୍ଟ୍ର ମଞ୍ଚ ବୈଠକ ଶେଷ ହୋଇଛି । ବିଭିନ୍ନ ବିରୋଧୀ ଦଳର ନେତା ତଥା ଅନ୍ୟ ବିଶିଷ୍ଟ ବ୍ୟକ୍ତିତ୍ୱମାନେ ପୁଣି ଥରେ ଗୋଟିଏ ଛାତ ତଳେ ଏକାଠି ହୋଇ ଦେଶର ସାମ୍ପ୍ରତିକ ପରିସ୍ଥିତି ଏବଂ କେନ୍ଦ୍ର ସରକାରଙ୍କ ନୀତି ଉପରେ ଆଲୋଚନା କରିଥିଲେ । ଏହି ବୈଠକରେ ବରିଷ୍ଠ ଆଡଭୋକେଟ୍ କେଟିଏସ୍ ତୁଲସୀ, ପୂର୍ବତନ ମୁଖ୍ୟ ନିର୍ବାଚନ କମିଶନର ଏସ.ୟୁ କୁରେଶି, ପୂର୍ବତନ ହାଇ କମିଶନର କେ.ସି ସିଂହ, ଚଳଚ୍ଚିତ୍ର ନିର୍ମାତା ପ୍ରୀତୀଶ ନନ୍ଦୀ ଏବଂ ଅନ୍ୟାନ୍ୟ ବିଶିଷ୍ଟ ବ୍ୟକ୍ତିମାନ ଉପସ୍ଥିତ ଥିଲେ । ଗତ ସୋମବାର ପ୍ରଶାନ୍ତ କିଶୋର ଏବଂ ଶରଦ ପାୱାରଙ୍କ ବୈଠକ ପରେ ରାଷ୍ଟ୍ର ମଞ୍ଚର ବୈଠକରେ ତୃତୀୟ ସାମ୍ମୁଖ୍ୟ ନେଇ କଳ୍ପନାଜଳ୍ପନା କରାଯାଇଥିଲା । ତେବେ ତୃତୀୟ ଫ୍ରଣ୍ଟ ସହିତ ବୈଠକର କୌଣସି ସମ୍ପର୍କ ନାହିଁ ବୋଲି ଶରଦ ପାୱାର ସ୍ପଷ୍ଟ କରିଥିଲେ ।
ବୈଠକ ଶେଷ ହେବା ପରେ ସମସ୍ତ ନେତା ସାମ୍ବାଦିକ ସମ୍ମିଳନୀରେ ଅଂଶଗ୍ରହଣ କରିଥିଲେ ଏବଂ ଗଣମାଧ୍ୟମ ବ୍ୟକ୍ତିବିଶେଷଙ୍କ ପ୍ରଶ୍ନର ଉତ୍ତର ମଧ୍ୟ ଦେଇଥିଲେ । 2018 ମସିହାରେ ମୋଦୀ ସରକାରଙ୍କ ନୀତି ବିରୁଦ୍ଧରେ ରାଷ୍ଟ୍ର ମଞ୍ଚ ଗଠନ କରିଥିବା ଟିଏମସିର ଉପାଧ୍ୟକ୍ଷ ଯଶୱନ୍ତ ସିହ୍ନା କହିଛନ୍ତି ଯେ ରାଷ୍ଟ୍ର ମଞ୍ଚର ବୈଠକ ପ୍ରାୟ ଅଢେଇ ଘଣ୍ଟା ଧରି ଚାଲିଥିଲା ଏବଂ ଅନେକ ପ୍ରସଙ୍ଗ ଉପରେ ଆଲୋଚନା କରାଯାଇଥିଲା । ଏହି ବୈଠକରେ ଯୋଗ ଦେଇଥିବା ଏନସିପି ନେତା ମାଜିଦ୍ ମେମନ୍ କହିଛନ୍ତି, "ରାଷ୍ଟ୍ର ମଞ୍ଚ ମୁଖ୍ୟ ଯଶୱନ୍ତ ସିହ୍ନା ଏବଂ ରାଷ୍ଟ୍ର ମଞ୍ଚର ସମସ୍ତ ପ୍ରତିଷ୍ଠାତା ସଦସ୍ୟ ତଥା କର୍ମଚାରୀଙ୍କ ସହାୟତାରେ ଏହି ବୈଠକ ଡକାଯାଇଥିଲା । କୁହାଯାଉଛି ଯେ ଶରଦ ପାୱାର ସାହେବ ଏକ ବଡ ରାଜନୈତିକ ପଦକ୍ଷେପ ନେବାକୁ ଯାଉଛନ୍ତି ଏବଂ କଂଗ୍ରେସକୁ ବହିଷ୍କାର କରାଯାଇଛି, ଏହା ଭୁଲ ଅଟେ । ମୁଁ ନିଜେ କପିଲ ସିବଲ, ଅଭିଷେକ ମନୁ ସିଂଭି, ମନୀଷ ତିୱାରୀଙ୍କୁ ନିମନ୍ତ୍ରଣ କରିଥିଲି ।
#WATCH | Leaders of different Opposition parties and other eminent personalities hold a meeting at the residence of NCP chief Sharad Pawar in New Delhi pic.twitter.com/vEdfXnmqPX
— ANI (@ANI) June 22, 2021
କଂଗ୍ରେସ ନେତାଙ୍କୁ ମଧ୍ୟ କରାଯାଇଥିଲା ନିମନ୍ତ୍ରଣ
ମାଜିଦ୍ ମେମନ୍ ଆହୁରି କହିଛନ୍ତି ଯେ ଏହି ସଭା ଏକ ରାଜନୈତିକ ବୈଠକ ନୁହେଁ । ରାଷ୍ଟ୍ର ମଞ୍ଚର ଆଦର୍ଶ ଅନୁସରଣ କରୁଥିବା ସମସ୍ତ ରାଜନୈତିକ ଦଳର ନେତା ମାାନଙ୍କୁ ଆମନ୍ତ୍ରଣ କରାଯାଇଛି । କୌଣସି ରାଜନୈତିକ ଭେଦଭାବ ନାହିଁ । ମୁଁ ବ୍ୟକ୍ତିଗତ ଭାବେ କଂଗ୍ରେସ ସଦସ୍ୟମାନଙ୍କୁ ନିମନ୍ତ୍ରଣ କଲି । କଂଗ୍ରେସକୁ ଛାଡି ଏକ ବଡ ବିରୋଧୀ ମଞ୍ଚ ପ୍ରସ୍ତୁତ ହେବା ନେଇ ଥିବା ଧାରଣା ଭୁଲ । ନିମନ୍ତ୍ରିତ ହୋଇଥିବା କଂଗ୍ରେସ ନେତାମାନେ କିଛି ସମସ୍ୟା ହେତୁ ବୈଠକରେ ଯୋଗ ଦେଇପାରିନଥିଲେ ।
ସାଧାରଣ ଲୋକଙ୍କ ସହ ଜଡିତ ପ୍ରସଙ୍ଗ ଉପରେ ଧ୍ୟାନ ଦିଆଯିବ
ଏଥି ସହିତ ସମାଜବାଦୀ ପାର୍ଟି ନେତା ଘନଶ୍ୟାମ ତିୱାରୀ କହିଛନ୍ତି ଯେ, ଆଜିର ବୈଠକର ସାରାଂଶ ହେଉଛି ଦେଶରେ ଏକ ବିକଳ୍ପ ଦୃଷ୍ଟିକୋଣ ପ୍ରସ୍ତୁତ କରିବାର ଆବଶ୍ୟକତା ରହିଛି, ଯାହା ସାଧାରଣ ଲୋକଙ୍କ ସହ ଜଡିତ ସମସ୍ୟାର ସମାଧାନ ପାଇଁ ଜରୁରୀ । ରାଷ୍ଟ୍ର ମଞ୍ଚ ଦେଶର ନାଗରିକ ତଥା ସଂଗଠନକୁ ଧ୍ୟାନରେ ରଖି ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଏକ ଦୃଢ ଦୃଷ୍ଟିକୋଣ ଦେବା ପାଇଁ ଆମେ ଏକ ଦଳ ଗଠନ କରିବାକୁ ଯଶୱନ୍ତ ସିହ୍ନାଙ୍କୁ ଅନୁମତି ଦେଇଛୁ ।
ପେଟ୍ରୋଲ ଏବଂ ଡିଜେଲ ମୂଲ୍ୟ ଉପରେ ହୋଇଛି ଆଲୋଚନା
ସେ ଆହୁରି ମଧ୍ୟ କହିଛନ୍ତି, ରାଷ୍ଟ୍ର ମଞ୍ଚ ଏପରି ଏକ 'ଫୋରମ୍' ହେବ ଯେଉଁଥିରେ ଦେଶର ବିକାଶ ତଥା ଭବିଷ୍ୟତ ପାଇଁ ଦୂରଦୃଷ୍ଟି ଥିବା ସମସ୍ତ ରାଜନୈତିକ ଦଳ, ସାମାଜିକ ସଂଗଠନ କିମ୍ବା ବ୍ୟକ୍ତି ଏଥିରେ ସାମିଲ ହୋଇପାରିବେ । ଦେଶ ବିଷୟରେ ଚିନ୍ତା କରୁଥିବା ଭାରତ ତଥା ବିଦେଶର ଲୋକମାନେ ମଧ୍ୟ ରାଷ୍ଟ୍ର ମଞ୍ଚରେ ଅଂଶଗ୍ରହଣ କରିପାରିବେ । ପେଟ୍ରୋଲ ଏବଂ ଡିଜେଲର ମୂଲ୍ୟ କୃଷକ ଏବଂ ମଧ୍ୟବିତ୍ତଙ୍କୁ କିପରି ପ୍ରଭାବିତ କରୁଛି ତାହା ଉପରେ ମଧ୍ୟ ଆଲୋଚନା କରିଛୁ । ରାଷ୍ଟ୍ର ମଞ୍ଚ ଏପରି ଏକ ସ୍ଥାନ ହେବ ଯେଉଁଠାରେ ସମସ୍ତେ ଏକାଠି ହୋଇ ସରକାରଙ୍କ ନିକଟରେ ବାର୍ତ୍ତା ରଖିପାରିବ । ପରବର୍ତ୍ତୀ ବୈଠକରେ ଅଧିକ ଲୋକଙ୍କୁ ସାମିଲ କରିବା ଉପରେ ଧ୍ୟାନ ଦିଆଯିବ ।
Click it and Unblock the Notifications
Sign in with Google