ଘୁଞ୍ଚିଲା ପଞ୍ଜାବ ବିଧାନସଭା ନିର୍ବାଚନ, ପେବୃଆରୀ 20 ରେ ହେବ ମତଦାନ

ପଞ୍ଜାବ ନିର୍ବାଚନ ସମ୍ପର୍କରେ ନିର୍ବାଚନ ଆୟୋଗ ଏକ ବଡ ନିଷ୍ପତ୍ତି ନେଇଛନ୍ତି । ବର୍ତ୍ତମାନ ସମସ୍ତ ବିଧାନସଭା ଆସନ ପାଇଁ 14 ଫେବୃଆରୀ ପରିବର୍ତ୍ତେ 20 ଫେବୃଆରୀରେ ଭୋଟ୍ ଗ୍ରହଣ ହେବ ।

ନୂଆଦିଲ୍ଲୀ : ପଞ୍ଜାବ ନିର୍ବାଚନ ସମ୍ପର୍କରେ ନିର୍ବାଚନ ଆୟୋଗ ଏକ ବଡ ନିଷ୍ପତ୍ତି ନେଇଛନ୍ତି । ବର୍ତ୍ତମାନ ସମସ୍ତ ବିଧାନସଭା ଆସନ ପାଇଁ 14 ଫେବୃଆରୀ ପରିବର୍ତ୍ତେ 20 ଫେବୃଆରୀରେ ଭୋଟ୍ ଗ୍ରହଣ ହେବ । ନିର୍ବାଚନ ତାରିଖ ନେଇ ଘୋଷଣା ପରଠାରୁ ବିଜେପି, କଂଗ୍ରେସ ସମେତ ଅନେକ ଦଳ ଏହାକୁ ପରିବର୍ତ୍ତନ କରିବାକୁ ଦାବି କରିଥିଲେ । ସମସ୍ତଙ୍କ ସହମତି ଅନୁଯାୟୀ ନିର୍ବାଚନ ଆୟୋଗ ମଧ୍ୟ ଏ ବାବଦରେ ଏକ ନିର୍ଦ୍ଦେଶ ଦେଇଛନ୍ତି । କିନ୍ତୁ ଭୋଟ୍ ଗଣତି ତାରିଖ ଅପରିବର୍ତ୍ତିତ ରହିଛି, ଅର୍ଥାତ୍ ନିର୍ଦ୍ଧାରିତ ତାରିଖ ମାର୍ଚ୍ଚ 10 ରେ ଭୋଟ୍ ଗଣତି ହେବ ।

ବାସ୍ତବରେ ସର୍ବପ୍ରଥମେ ମୁଖ୍ୟମନ୍ତ୍ରୀ ଚରଣଜିତ ସିଂହ ଚନ୍ନୀ ମତଦାନ ତାରିଖ ପରିବର୍ତ୍ତନ କରିବାକୁ ଦାବି କରିଥିଲେ । ଏଥିପାଇଁ ସେ ନିର୍ବାଚନ ଆୟୋଗଙ୍କୁ ଏକ ଚିଠି ମଧ୍ୟ ଲେଖିଛନ୍ତି । ସିଏମ୍ ଚନ୍ନୀଙ୍କ ଅନୁଯାୟୀ, ଫେବୃଆରୀ 16 ରେ ରବିଦାସ ଜୟନ୍ତୀ ଅଛି । ଯେଉଁଥିପାଇଁ ରାଜ୍ୟର ଦଳିତ ସମ୍ପ୍ରଦାୟର ଅନେକ ଲୋକ ଏହା ପୂର୍ବରୁ ବାରାଣସୀ ଯିବେ । ଏଭଳି ପରିସ୍ଥିତିରେ ବହୁ ସଂଖ୍ୟକ ଲୋକ ମତଦାନରୁ ବଞ୍ଚିତ ହେବେ, ତେଣୁ ନିର୍ବାଚନ ତାରିଖରେ ପରିବର୍ତ୍ତନ କରିବାକୁ ଚରଣଜିତ୍ ସିଂହ ଚନ୍ନୀ ଦାବି କରିଥିଲେ । ଏହା ପରେ ବିଜେପି ମଧ୍ୟ ତାଙ୍କ ଦାବିକୁ ସମର୍ଥନ କରିଥିଲା ।
ଏହି ଘଟଣାର ଗମ୍ଭୀରତାକୁ ବିଚାରକୁ ନେଇ ନିର୍ବାଚନ ଆୟୋଗ ଏକ ବୈଠକ କରିଥିଲେ । ଏଥିସହ ବିଜେପି-କଂଗ୍ରେସର ଦାବିକୁ ବିଚାରକୁ ନେଇ ଫେବୃଆରୀ 14 ରୁ ଫେବୃଆରୀ 20 କୁ ମତଦାନର ତାରିଖ ପରିବର୍ତ୍ତନ କରାଯାଇଛି । ସେହି ଦିନ ସମସ୍ତ 117 ଟି ଆସନରେ ଭୋଟ୍ ଗ୍ରହଣ କରାଯିବ । କମିଶନଙ୍କ କହିବାନୁସାରେ, ଜାନୁଆରୀ 25 ରେ ବିଜ୍ଞପ୍ତି ପ୍ରକାଶ ପାଇବ, ଫେବୃଆରୀ 1 ନାମାଙ୍କନ ପତ୍ର ଦାଖଲର ଶେଷ ତାରିଖ । ଫେବୃଆରୀ 4 ରେ, ପ୍ରାର୍ଥୀମାନେ ସେମାନଙ୍କର ନାମାଙ୍କନ ପ୍ରତ୍ୟାହାର କରିପାରିବେ । ଏହା ପରେ ଫେବୃଆରୀ 20 ରେ ମତଦାନ ଅନୁଷ୍ଠିତ ହେବ । ତେବେ ମାର୍ଚ୍ଚ 10 ରେ, ସମସ୍ତ ପାଞ୍ଚଟି ରାଜ୍ୟର ଫଳାଫଳ ଏକାଠି ପ୍ରକାଶ ପାଇବ ।

English summary

Punjab Assembly election 2022 Will be held On 20th February