ପଞ୍ଜାବ ବିଧାନସଭା ନିର୍ବାଚନରେ ଅକାଳୀ ଦଳ ଏବଂ ବିଏସପିମଧ୍ୟରେ ଗଠବନ୍ଧନ, 20 ଟି ଆସନରେ ଲଢିବ ମାୟାବତୀଙ୍କ ଦଳ
ପଞ୍ଜାବରେ ଆସନ୍ତା ବର୍ଷ ତଥା 2022 ରେ ବିଧାନସଭା ନିର୍ବାଚନ ଅନୁଷ୍ଠିତ ହେବ । ଏନେଇ ଶିରୋମଣି ଅକାଳୀ ଦଳ (SAD) ଏବଂ ବହୁଜନ ସମାଜ ପାର୍ଟି (ବିଏସପି) ମିଳିତ ମଞ୍ଚରେ ଲଢେଇ କରିବେ ।
ଚଣ୍ଡିଗଡ଼ : ପଞ୍ଜାବରେ ଆସନ୍ତା ବର୍ଷ ତଥା 2022 ରେ ବିଧାନସଭା ନିର୍ବାଚନ ଅନୁଷ୍ଠିତ ହେବ । ଏନେଇ ଶିରୋମଣି ଅକାଳୀ ଦଳ (SAD) ଏବଂ ବହୁଜନ ସମାଜ ପାର୍ଟି (ବିଏସପି) ମିଳିତ ମଞ୍ଚରେ ଲଢେଇ କରିବେ । ଉଭୟ ଦଳର ଗଠବନ୍ଧନ ନେଇ ଘୋଷଣା କରି ଶିରୋମଣି ଅକାଳୀ ଦଳ ସଭାପତି ସୁଖବୀର ସିଂ ବାଦଲ କହିଛନ୍ତି ଯେ ପଞ୍ଜାବ ରାଜନୀତିରେ ରାଜନୀତିରେ ଏହା ଏକ ନୂଆ ଦିନ, ଶିରୋମଣି ଅକାଳୀ ଦଳ (SAD) ଏବଂ ବହୁଜନ ସମାଜ ପାର୍ଟି (ବିଏସପି) 2022 ପଞ୍ଜାବ ବିଧାନସଭା ନିର୍ବାଚନ ଏବଂ ଭବିଷ୍ୟତରେ ନିର୍ବାଚନ ଲଢିବା ପାଇଁ ଏକାଠି ହୋଇଛନ୍ତି । ସୁଖବୀର ସିଂ ବାଦଲ କହିଛନ୍ତି ଯେ ପଞ୍ଜାବର 117 ବିଧାନସଭା ଆସନ ମଧ୍ୟରୁ ବହୁଜନ ସମାଜ ପାର୍ଟି (ବିଏସପି) 20 ଟି ଆସନ ଏବଂ ଶିରୋମଣୀ ଅକାଳୀ ଦଳ (SAD) ବାକି 97 ଟି ଆସନରେ ପ୍ରତିଦ୍ୱନ୍ଦ୍ୱିତା କରିବ ।
ଚଣ୍ଡିଗଡ଼ର ଶିରମଣୀ ଅକାଳୀ ଦଳ ବିଧାୟକ ଏନ.କେ ଶର୍ମା କହିଛନ୍ତି, ଶିରୋମଣି ଅକାଳୀ ଦଳ ଏବଂ ବିଏସପି ପୁଣି ଥରେ ଏକାଠି ହେଉଛନ୍ତି । ଆମେ ପଞ୍ଜାବରେ ନିର୍ବାଚନ ଜିତିବାକୁ ଯାଉଛୁ । ସେ କହିଛନ୍ତି ଯେ ପଞ୍ଜାବ ନିର୍ବାଚନରେ ଆମେ ନିର୍ଦ୍ୱନ୍ଦରେ ବହୁମତ ହାସଲ କରିବୁ ।
1996 ଲୋକସଭା ନିର୍ବାଚନରେ ଅକାଳୀ ଦଳ ଏବଂ ବିଏସପି ଶେଷ ଥର ପାଇଁ ଏକାଠି ପ୍ରତିଦ୍ୱନ୍ଦ୍ୱିତା କରିଥିଲେ । ଗତ ବର୍ଷ ଶିରୋମଣି ଅକାଳୀ ଦଳ କେନ୍ଦ୍ରର ବିବାଦୀୟ କୃଷି ବିଲ୍ କୁ ବିରୋଧ କରି ଭାରତୀୟ ଜନତା ପାର୍ଟି (ବିଜେପି) ସହିତ ସମ୍ପର୍କ ଛିନ୍ନ କରି ଏନଡିଏରୁ ଅଲଗା ହୋଇଥିଲା ।