ପଞ୍ଜାବ ସରକାର ବିରୋଧରେ ଟିକା ବିକ୍ରି ଅଭିଯୋଗ, ଫେରାଇ ନେଲେ ଘରୋଇ ଡାକ୍ତରଖାନାକୁ ଦିଆଯାଇଥିବା ଟିକା
ବିରୋଧୀ ଶିରୋମଣି ଅକାଳୀ ଦଳ ଅଭିଯୋଗ କରିଛି ଯେ, ପଞ୍ଜାବରେ କରୋନା ଟୀକାକରଣରେ ଏକ ବଡ ଘୋଟାଲା ଚାଲିଛି । ପଞ୍ଜାବ ସରକାର ଘରୋଇ ଡାକ୍ତରଖାନାଗୁଡ଼ିକୁ କରୋନା ଟିକା ବିକ୍ରି କରୁଛନ୍ତି ।
ଚଣ୍ଡିଗଡ଼ : ବର୍ତ୍ତମାନ ପଞ୍ଜାବରେ ଶାସକ କଂଗ୍ରେସ ଦଳ ମଧ୍ୟରେ ଅନ୍ତଃକନ୍ଦଳ ଲାଗି ରହିଥିବା ଦେଖିବାକୁ ମିଳୁଛି । ଏହି ସମୟରେ ସରକାର ଉପରେ ଆସିଛି ଗମ୍ଭୀର ଅଭିଯୋଗ । ବିରୋଧୀ ଶିରୋମଣି ଅକାଳୀ ଦଳ ଅଭିଯୋଗ କରିଛି ଯେ, ପଞ୍ଜାବରେ କରୋନା ଟୀକାକରଣରେ ଏକ ବଡ ଘୋଟାଲା ଚାଲିଛି । ପଞ୍ଜାବ ସରକାର ଘରୋଇ ଡାକ୍ତରଖାନାଗୁଡ଼ିକୁ କରୋନା ଟିକା ବିକ୍ରି କରୁଛନ୍ତି । ଏସବୁ ମଧ୍ୟରେ ପଞ୍ଜାବ ସରକାର ଘରୋଇ ଡାକ୍ତରଖାନାକୁ ଟିକା ବିକ୍ରୟ ନିଷ୍ପତ୍ତି ପ୍ରତ୍ୟାହାର କରି ନେଇଛନ୍ତି ।
ପଞ୍ଜାବ ସରକାର 18 ରୁ 44 ବର୍ଷ ବୟସରେ ଟୀକାକରଣ ପାଇଁ ଘରୋଇ ଡାକ୍ତରଖାନାକୁ ଏହି ଟିକା ବିକ୍ରୟ କରିବାକୁ ନିଷ୍ପତ୍ତି ନେଇଥିଲେ । ନୂଆ ନିର୍ଦ୍ଦେଶରେ ରାଜ୍ୟ ସରକାର ସମସ୍ତ ଘରୋଇ ଡାକ୍ତରଖାନାକୁ ଟିକା ଫେରସ୍ତ କରିବାକୁ କହିଛନ୍ତି । ପଞ୍ଜାବ ସ୍ୱାସ୍ଥ୍ୟମନ୍ତ୍ରୀ ବଲବୀର ସିଂ ସିଦ୍ଧୁ କହିଛନ୍ତି ଯେ ଘରୋଇ ଡାକ୍ତରଖାନାକୁ ମୋଟ 42,000 ଟିକା ଦିଆଯାଇଥିଲା, ଯାହାକୁ ଆମେ ସେମାନଙ୍କଠାରୁ ଫେରାଇ ଆଣିଛୁ । ମୁଖ୍ୟମନ୍ତ୍ରୀ ତୁରନ୍ତ ଘଟଣା ସମ୍ପର୍କରେ ସମୀକ୍ଷା କରି ନିଷ୍ପତ୍ତି ପ୍ରତ୍ୟାହାର କରିନେଇଛନ୍ତି । ଯେଉଁମାନେ ଟୀକାକରଣର ଅତିରିକ୍ତ ମୂଲ୍ୟ ଦେଇଛନ୍ତି ସେମାନଙ୍କୁ କ୍ଷତିପୂରଣ ଦିଆଯିବ ବୋଲି କୁହାଯାଇଛି ।
ଗୁରୁବାର ସନ୍ଧ୍ୟାରେ ଅକାଳୀ ଦଳ ମୁଖ୍ୟ ସୁଖବୀର ବାଦଲ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ପଞ୍ଜାବ ସରକାର କମ୍ପାନୀଗୁଡିକରୁ 400 ଟଙ୍କାରେ କିଣୁଥିବା ଟିକାକୁ ଘରୋଇ ଡାକ୍ତରଖାନାକୁ 1060 ଟଙ୍କାରେ ବିକ୍ରି କରି ଲାଭ କରୁଛନ୍ତି । ଏହା ପରେ ଡାକ୍ତରଖାନାଗୁଡ଼ିକ ଏହି ଡୋଜ ପାଇଁ ଲୋକଙ୍କଠାରୁ 1700 ଟଙ୍କା ପର୍ଯ୍ୟନ୍ତ ଚାର୍ଜ କରୁଛନ୍ତି । ଟୀକାକରଣ କେନ୍ଦ୍ରରେ ଟିକା ଅଭାବ ଦେଖାଯାଉଛି ଏବଂ ଏପଟେ ସରକାର ଜନସାଧାରଣଙ୍କ ଉପରେ ଦାଉ ସାଧୁଛନ୍ତି ।
ପଞ୍ଜାବର ମୁଖ୍ୟ ସଚିବ ଭିନି ମହାଜନଙ୍କ ଏକ ଟ୍ୱିଟ୍ ଦେଖାଇ ବାଦଲ କହିଛନ୍ତି ଯେ, ଘରୋଇ ଡାକ୍ତରଖାନାରେ 900 ଏବଂ 1200 ଦେଇ ଟିକା ପାଇବା ପାଇଁ ସେ ମଧ୍ୟ ଓକିଲାତି କରୁଛନ୍ତି । ବାଦଲ କହିଛନ୍ତି ଯେ ଏହା ଏକ ବଡ ଘୋଟାଲା ଏବଂ ଯଦି ଏହାକୁ ବନ୍ଦ ନକରାଯାଏ ତେବେ ଆମେ ହାଇକୋର୍ଟଙ୍କ ନିକଟକୁ ଯାଇ ତଦନ୍ତ ଦାବି କରିବୁ ।
ସ୍ୱାସ୍ଥ୍ୟମନ୍ତ୍ରୀ କହିଛନ୍ତି ତଦନ୍ତ ହେବ
ପଞ୍ଜାବ ସ୍ୱାସ୍ଥ୍ୟମନ୍ତ୍ରୀ ବଲବୀର ସିଦ୍ଧୁ କହିଛନ୍ତି ଯେ ସୁଖବୀର ବାଦଲ ମିଛ କହୁଛନ୍ତି । ରାଜ୍ୟରେ ଟୀକାର ଅଭାବ ରହିଛି ଏବଂ ଏହା ସମସ୍ତଙ୍କୁ ଜଣା । ତେଣୁ ଏଭଳି ଅଭିଯୋଗରେ କୌଣସି ସତ୍ୟତା ନାହିଁ । ତେବେ ସେ କହିଛନ୍ତି ଯେ ଯଦି ସୁଖବୀର ସିଂ ଅଭିଯୋଗ କରିଛନ୍ତି ତେବେ ଆମେ ଘଟଣାର ତଦନ୍ତ କରିବୁ ।
ବିଜେପି ମଧ୍ୟ ଟାର୍ଗେଟ କରିଛି
ବିଜେପି ନେତା ତଥା କେନ୍ଦ୍ର ମନ୍ତ୍ରୀ ପ୍ରକାଶ ଜାଭେଦକର ମଧ୍ୟ ଏହି ପ୍ରସଙ୍ଗରେ କଂଗ୍ରେସକୁ ଘେରିଛନ୍ତି । ସେ କହିଛନ୍ତି, ରାହୁଲ ଗାନ୍ଧୀ ଟିକା ବିଷୟରେ ଦିନରାତି ଆଲୋଚନା କରନ୍ତି କିନ୍ତୁ କଂଗ୍ରେସ ଶାସିତ ରାଜ୍ୟଗୁଡ଼ିକରେ କ'ଣ ଘଟୁଛି ତାହା ସେ ଦେଖନ୍ତି ନାହିଁ । ପଞ୍ଜାବକୁ 400 ଟଙ୍କା ହାରରେ 1.4 ଲକ୍ଷ ଟିକା ଦିଆଯାଇଥିଲା, ଯାହା ରାଜ୍ୟ ସରକାର 20 ଟି ଘରୋଇ ଡାକ୍ତରଖାନାକୁ 1000 ଟଙ୍କାରେ ବିକ୍ରି କରିଥିଲେ । ରାହୁଲ ଏହା ଉପରେ ନୀରବ ରହିଛନ୍ତି ।
Click it and Unblock the Notifications
Sign in with Google