ବଦଳି ଗଲା କି ପ୍ଲାନ୍ ? ହେବ ନାହିଁ ଆଗୁଆ ନିର୍ବାଚନ !

ଭୁବନେଶ୍ୱର: ଗତ କିଛି ଦିନ ହେବ ରାଜ୍ୟରେ ଆଗୁଆ ନିର୍ବାଚନ ନେଇ ଚର୍ଚ୍ଚା ଜୋର୍ ଧରିଥିଲା । ସେପ୍ଚେମ୍ବରରେ ହେବାକୁ ଥିବା ମୌସୁମୀ ଅଧିବେଶନରେ ବିଧାନସଭା ଭାଙ୍ଗିବା ଓ ରାଜ୍ୟରେ ଆଗୁଆ ନିର୍ବାଚନକୁ ନେଇ ଆଲୋଚନା ହେଉଥିଲା । ମୌସୁମୀ ଅଧିବେଶନରେ ବିଳମ୍ବ ଏହି ଚର୍ଚ୍ଚାକୁ ଖୋରାକ୍ ଯୋଗାଇଥିଲା ।

ଏପରିକି ଏ ନେଇ ରାଜନୈତିକ ଦଳମାନେ ମଧ୍ୟ ବୟାନବାଜି କରୁଥିଲେ । ବିରୋଧୀ ଏହାକୁ ସମାଲୋଚନା କରିବା ସହ ଆଗୁଆ ନିର୍ବାଚନ ପାଇଁ ସରକାର ମୌସୁମୀ ଅଧିବେଶନରେ ବିଳମ୍ବ କରୁଛନ୍ତି ବୋଲି ଅଭିଯୋଗ ଆଣିଥିଲେ କଂଗ୍ରେସ ବିଧାୟକ ତାରା ବାହିନୀପତି । ଏହା ସହ ବିଜେପି ସାଂସଦ ପ୍ରତାପ ଷଡ଼ଙ୍ଗୀ ମଧ୍ୟ ଏହି ଚର୍ଚ୍ଚାକୁ ନେଇ ସରକାର ଉପରେ ବର୍ଷିଥିଲେ ।

କିନ୍ତୁ ଗତକାଲି ନବାନ ନିବାସରେ ହୋଇଥିବା ବିଜେଡ଼ିର ବୈଠକ ପରେ ଏ ଥିରେ ନୂଆ ମୌଡ଼ ଆସିଛି । ରାଜ୍ୟରେ ଆଗୁଆ ନିର୍ବାଚନ ହେବ ନାହିଁ ବୋଲି ମୁଖ୍ୟମନ୍ତ୍ରୀ କହିଥିବା ସୂଚନା ମିଳୁଛି । ବିଜେଡ଼ି ଆଗୁା ନିର୍ବାଚନ ପାଇଁ ପ୍ରସ୍ତୁତି କରୁନାହିଁ ବୋଲି ମଧ୍ୟ କୁହାଯାଉଛି ।

କିନ୍ତୁ ଯଦି କେନ୍ଦ୍ର ସରକାର ଆଗୁଆ ନିର୍ବାଚନ କରିବେ, ତେବେ ବିଜେଡି ମଧ୍ୟ ସେହି ସମୟରେ ନିର୍ବାଚନ ପାଇଁ ପ୍ରସ୍ତୁତ ହେବ । ଏହି କଥା ରାଜ୍ୟରେ ଆଗୁଆ ନିର୍ବାଚନ ହେବ ନାହିଁ ବୋଲି ସଙ୍କେତ ଦେଉଛି ।

କିଛି ଦିନ ତଳେ ଅଚାନକ ଗସ୍ତରେ ଆସିଥିଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା । ଏହା ପରେ ରାଜ୍ୟରେ ଆଗୁଆ ନିର୍ବାଚନ ଉପରେ ଆଲୋଚନା ଆରମ୍ଭ ହୋଇଥିଲା । ଏପରିକି ସମସ୍ତ ଦଳ ନିଜ ନିଜର ସଙ୍ଗଠନ ମଜବୁତ କରୁଥିବା ମଧ୍ୟ ସ୍ପଷ୍ଟ ଜଣାପଡ଼ୁଥିଲା । କିନ୍ତୁ ପରେ ଚର୍ଚ୍ଚା ହେଲା ରାଜ୍ୟରେ ଆଗୁଆ ନିର୍ବାଚନ ପାଇଁ କେନ୍ଦ୍ର ପ୍ରସ୍ତୁତ ନୁହେଁ । ଦିଲ୍ଲୀ ଯାଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଧାନମନ୍ତ୍ରୀଙ୍କୁ ସାକ୍ଷାତ କରିପାରନ୍ତି ବୋଲି ମଧ୍ୟ ଚର୍ଚ୍ଚା ହେଉଥିଲା ।

ସଂସଦରେ ଅନାସ୍ଥା ପ୍ରସ୍ତାବ ବିରୋଧରେ ବିଜେଡିର ସମର୍ଥନ ପରେ ରାଜ୍ୟର ଦାବି କେନ୍ଦ୍ର ମାନିନେବ ବୋଲି କୁହାଯାଉଥିଲା । ରାଜ୍ୟରେ ଆଗୁଆ ନିର୍ବାଚନ ହୋଇଥିଲେ ଅନ୍ୟ 5 ରାଜ୍ୟ ସହ ଡିସେମ୍ବରରେ ନିର୍ବାଚନକୁ ଓହ୍ଲାଇଥାନ୍ତା ଓଡିଶା । ପରେ ଲୋକସଭା ନିର୍ବାଚନ ହୋଇଥିଲେ ସୁବିଧାଜନକ ସ୍ଥିତିରେ ରହିଥାନ୍ତା ବିଜେଡି ।

କିନ୍ତୁ ହଠାତ୍ କେନ୍ଦ୍ରର ସରକାରଙ୍କ ଆଭିମୁଖ୍ୟ ବଦଳିଯାଇଛି । ଗୋଟିଏ ଦେଶ ଗୋଟିଏ ନିର୍ବାଚନ ନେଇ ମୋଦୀ ସରକାର ଚର୍ଚ୍ଚା ବଢାଇବା ପରେ ରାଜ୍ୟରେ ଆଗୁଆ ନିର୍ବାଚନକୁ ନେଇ ପ୍ରଶ୍ନ ଉଠିଛି ।

English summary

No possibility of early Election In Odisha