ଭବାନୀପୁର ଆସନରୁ ଇସ୍ତଫା ଦେଲେ ଟିଏମସି ବିଧାୟକ, ମମତା ବାନାର୍ଜୀ ଲଢିବେ ଉପ-ନିର୍ବାଚନ

ମମତାଙ୍କ ଚିରାଚରିତ ଆସନରୁ ବିଧାୟକ ଭାବେ ନିର୍ବାଚିତ ହୋଇଥିବା ଟିଏମସିର ଶୋଭନଦେବ ଚଟ୍ଟୋପାଧ୍ୟାୟ ଇସ୍ତଫା ଦେଇଛନ୍ତି । ବର୍ତ୍ତମାନ ଟିଏମସି ସୁପ୍ରିମୋ ଏହି ଆସନରୁ ଉପ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ।

Published: Friday, May 21, 2021, 16:31 [IST]

କୋଲକାତା : ପଶ୍ଚିମବଙ୍ଗ ବିଧାନସଭା ନିର୍ବାଚନ ପରେ ଏବେ ପୁଣି ସରଗରମ ହେବ ବଙ୍ଗଳାର ରାଜନୈତିକ ପାଣିପାଗ । ତୃଣମୂଳ କଂଗ୍ରେସ ବହୁମତ ପାଇବା ପରେ ମଧ୍ୟ ମମତା ବାନାର୍ଜୀ ନନ୍ଦିଗ୍ରାମ ନିର୍ବାଚନରେ ହାରିଛନ୍ତି । ଏଭଳି ପରିସ୍ଥିତିରେ ନିର୍ବାଚନରେ ଜିତିବା ଏବଂ ଛ ମାସ ମଧ୍ୟରେ ବିଧାନସଭାରେ ପହଞ୍ଚିବା ଆବଶ୍ୟକ, ନଚେତ୍ ତାଙ୍କ ହାତରୁ ଚାଲିଯିବ ମୁଖ୍ୟମନ୍ତ୍ରୀ ପଦ । ଏହା ମଧ୍ୟରେ ଶୁକ୍ରବାର ଦିନ ବଙ୍ଗଳାରେ ଦେଖାଦେଇଛି ଏକ ରାଜନୈତିକ ଆଲୋଡ଼ନ । ମମତାଙ୍କ ଚିରାଚରିତ ଆସନରୁ ବିଧାୟକ ଭାବେ ନିର୍ବାଚିତ ହୋଇଥିବା ଟିଏମସିର ଶୋଭନଦେବ ଚଟ୍ଟୋପାଧ୍ୟାୟ ଇସ୍ତଫା ଦେଇଛନ୍ତି । ବର୍ତ୍ତମାନ ଟିଏମସି ସୁପ୍ରିମୋ ଏହି ଆସନରୁ ଉପ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ।.

ସୂଚନାଯୋଗ୍ୟ, ବଙ୍ଗଳାର କିଛି ଆସନରେ ନିର୍ବାଚନ ହେବା ବାକି ଅଛି । କିନ୍ତୁ ଟିଏମସିର କେତେକ ବରିଷ୍ଠ ନେତା ଚାହୁଁଛନ୍ତି ଯେ ମମତା ବାନାର୍ଜୀ ସେସମସ୍ତ ଆସନ ଛାଡ଼ି ଭବାନୀପୁରରୁ ଲଢନ୍ତୁ । ଏଭଳି ପରିସ୍ଥିତିରେ ଭବାନୀପୁରରୁ ପ୍ରତିଦ୍ୱନ୍ଦ୍ୱିତା କରିବାକୁ ଟିଏମସି ସୁପ୍ରିମୋ ମଧ୍ୟ ନିଷ୍ପତ୍ତି ନେଇଛନ୍ତି । ଏହା ପରେ ବିଧାୟକ ଶୋଭନଦେବ ଶୁକ୍ରବାର ଦିନ ବାଚସ୍ପତି ବିମାନ ବାନାର୍ଜୀଙ୍କ ନିକଟରେ ପହଞ୍ଚି ତାଙ୍କ ଇସ୍ତଫା ପତ୍ର ଦାଖଲ କରିଛନ୍ତି । ଏହି ପ୍ରସଙ୍ଗରେ ବାଚସ୍ପତି କହିଛନ୍ତି ଯେ 'ମୁଁ ବିଧାୟକଙ୍କୁ ପଚାରିଥିଲି ଯେ ସେ ସ୍ବେଚ୍ଛାକୃତ ଭାବରେ ଇସ୍ତଫା ଦେଉଛନ୍ତି ନା ତାଙ୍କ ଉପରେ କୌଣସି ପ୍ରକାରର ଚାପ ପ୍ରୟୋଗ କରାଯାଇଛି । ଯେଉଁଥିରେ ଶୋଭନଦେବ ସ୍ୱେଚ୍ଛାକୃତ ଭାବେ ଇସ୍ତଫା ଦେଉଛନ୍ତି ବୋଲି କହିଥିଲେ । ଏହି କାରଣରୁ ତାଙ୍କ ଇସ୍ତଫା ଗ୍ରହଣ କରାଯାଇଛି ।'

ଇସ୍ତଫା ଦେବା ପରେ ଗଣମାଧ୍ୟମକୁ ସୂଚନା ଦେଇ ଶୋଭନଦେବ କହିଛନ୍ତି ଯେ, ଭବାନୀପୁରରୁ ମୁଖ୍ୟମନ୍ତ୍ରୀ ଦୁଇଥର ନିର୍ବାଚନ ଜିତିଛନ୍ତି । ମୁଁ ଦଳର ସମସ୍ତ ନେତାଙ୍କଠାରୁ ଶୁଣିଥିଲି ଯେ ମମତା ବାନାର୍ଜୀ ସେଠାରୁ ପ୍ରତିଦ୍ୱନ୍ଦ୍ୱିତା କରିବାକୁ ଚାହୁଁଛନ୍ତି । ତେଣୁ ମୁଁ ନିଜେ ଆସନ ଛାଡିବାକୁ ସ୍ଥିର କଲି । ତାଙ୍କ ଉପରେ କୌଣସି ଚାପ ନାହିଁ ବୋଲି ସେ ସ୍ପଷ୍ଟ କରିଛନ୍ତି । ଏଥିସହ ସରକାର ଚଳାଇବାକୁ ଅନ୍ୟ କୌଣସି ନେତାଙ୍କର ସାହସ ନାହିଁ, ସେହି ଆସନ ମମତା ବାନାର୍ଜୀଙ୍କ ଥିଲା, ସେ କେବଳ ତାଙ୍କୁ ସୁରକ୍ଷା ଦେଉଥିଲେ ବୋଲି ଶୋଭନଦେବ କହିଛନ୍ତି ।

Published On May 21, 2021