ମହାରାଷ୍ଟ୍ର ରାଜନୈତିକ ସଙ୍କଟ : MNS ମୁଖ୍ୟ ରାଜ ଠାକରେଙ୍କ ସହ ଯୋଗାଯୋଗ କଲେ ବିଦ୍ରୋହୀ ଏକନାଥ ସିନ୍ଦେ

ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ବିରୁଦ୍ଧରେ ବିଦ୍ରୋହ କରିଥିବା ଶିବସେନା ବିଧାୟକ ଏକନାଥ ସିନ୍ଦେ ମହାରାଷ୍ଟ୍ର ନବନିର୍ମାନ ସେନା (MNS) ମୁଖ୍ୟ ରାଜ ଠାକରେଙ୍କ ସହ ଯୋଗାଯୋଗ କରିଛନ୍ତି ।

Updated: Monday, June 27, 2022, 13:32 [IST]

ମୁମ୍ବାଇ : ଶିବେସେନାର ବିଦ୍ରୋହୀ ବିଧାୟକ ଏବଂ ଶିବସେନା ମଧ୍ୟରେ ଚାଲିଥିବା ବିବାଦକୁ ନେଇ ମହାରାଷ୍ଟ୍ରର ରାଜନୈତିକ ସଙ୍କଟ ବଢିବାରେ ଲାଗିଛି । ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ବିରୁଦ୍ଧରେ ବିଦ୍ରୋହ କରିଥିବା ଶିବସେନା ବିଧାୟକ ଏକନାଥ ସିନ୍ଦେ ମହାରାଷ୍ଟ୍ର ନବନିର୍ମାନ ସେନା (MNS) ମୁଖ୍ୟ ରାଜ ଠାକରେଙ୍କ ସହ ଯୋଗାଯୋଗ କରିଛନ୍ତି । MNS ମୁଖ୍ୟ ରାଜ ଠାକରେଙ୍କ ସହ ଏକନାଥ ସିନ୍ଦେ ମହାରାଷ୍ଟ୍ରର ବର୍ତ୍ତମାନର ରାଜନୈତିକ ବିକାଶ ବିଷୟରେ ଆଲୋଚନା କରିଥିବା ନେଇ ଖବର ରହିଛି ।

ଏହି ସମୟରେ ମହାରାଷ୍ଟ୍ରର ରାଜନୈତିକ ନାଟକ ସୁପ୍ରିମକୋର୍ଟରେ ପହଞ୍ଚିଛି । 16 ଜଣ ବିଧାୟକଙ୍କ ଅଯୋଗ୍ୟତା ଘୋଷମା ନିଷ୍ପତ୍ତି ମାମଲାରେ ସୁପ୍ରିମକୋର୍ଟରେ ଏକ ପିଟିସନ ଦାଖଲ କରାଯାଇଛି । ଶିବସେନା ବିଧାୟକ ଅଜୟ ଚୌଧୁରୀଙ୍କୁ ଶିବସେନା ବିଧାନସଭା ଦଳର ନେତା ଭାବରେ ମନୋନୀତ କରିବାକୁ ନିଷ୍ପତ୍ତି ନିଆଯାଇଛି ।

ରିପୋର୍ଟ ଅନୁଯାୟୀ, ଜୁନ୍ 27 ସୋମବାର ଦିନ ଜଣେ MNS ନେତା ଏକନାଥ ସିନ୍ଦେ ଏବଂ ରାଜ ଠାକରେଙ୍କ ସହ ଯୋଗାଯୋଗରେ ଥିବା ନିଶ୍ଚିତ କରିଛନ୍ତି । MNS ନେତା କହିଛନ୍ତି ଯେ ସିନ୍ଦେ ରାଜ ଠାକରେଙ୍କ ସହ ଦୁଇଥର ଫୋନରେ କଥା ହୋଇଥିଲେ ଏବଂ ତାଙ୍କ ସ୍ୱାସ୍ଥ୍ୟ ବିଷୟରେ ମଧ୍ୟ ପଚାରିଥିଲେ ।
ସୁପ୍ରିମକୋର୍ଟରେ ପହଞ୍ଚିଥିବା ଆବେଦନକାରୀ ଏକନାଥ ସିନ୍ଦେ ବିଧାୟକ ଡିଫେକ୍ସନ୍ ନିୟମର ନିୟମ 6 ଅନୁଯାୟୀ ଅଯୋଗ୍ୟତା ଆବେଦନ ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକରିବାକୁ ନିବେଦନ କରିଛନ୍ତି । ବିଦ୍ରୋହୀ ବିଧାୟକଙ୍କ ଅଯୋଗ୍ୟତା ଉପରେ କୌଣସି ପଦକ୍ଷେପ ନ ନେବାକୁ ଉପ ବାଚସ୍ପତିଙ୍କୁ ନିର୍ଦ୍ଦେଶ ଦିଆଯାଉ ବୋଲି ଆବେଦନରେ କୁହାଯାଇଛି । ଉପ ବାଚସ୍ପତିଙ୍କ ବହିଷ୍କାର ପ୍ରସ୍ତାବ ଉପରେ ନିଷ୍ପତ୍ତି ନହେବା ପର୍ଯ୍ୟନ୍ତ ଅଯୋଗ୍ୟତା କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ ନୁହେଁ ବୋଲି ଆବେଦନରେ କୁହାଯାଇଛି ।