ଆକ୍ସନ ମୁଡ଼ରେ ରାଜ୍ୟପାଳ ଭଗତ ସିଂହ କୋଶ୍ୟାରୀ, ଉଦ୍ଧବ ସରକାରଙ୍କୁ ମାଗିଲେ 3 ଦିନର ହିସାବ
ଜୁନ୍ 22 ରୁ 24 ମଧ୍ୟରେ ସରକାରଙ୍କ ଦ୍ୱାରା ନିଆଯାଇଥିବା ନିଷ୍ପତ୍ତି ଏବଂ ପ୍ରସ୍ତାବଗୁଡ଼ିକ ବିଷୟରେ ରାଜ୍ୟପାଳ ଭଗତ ସିଂହ କୋଶ୍ୟାରୀ ରାଜ୍ୟ ମୁଖ୍ୟ ଶାସନ ସଚିବ ସନ୍ତୋଷ କୁମାରଙ୍କୁ ଅବଗତ କରାଇବାକୁ ନିର୍ଦ୍ଦେଶ ଦେଇଛନ୍ତି ।
ମୁମ୍ବାଇ : ମହାରାଷ୍ଟ୍ରରେ ଚାଲିଥିବା ରାଜନୈତିକ ସଙ୍କଟ ମଧ୍ୟରେ ବର୍ତ୍ତମାନ ରାଜ୍ୟପାଳ ଭଗତ ସିଂହ କୋଶ୍ୟାରୀ ମଧ୍ୟ ଆକ୍ସନ ମୁଡରେ ଆସିଛନ୍ତି । ବାସ୍ତବରେ କୋଶ୍ୟାରୀ କରୋନା ସଂକ୍ରମଣ ହେତୁ ଡାକ୍ତରଖାନାରେ ଭର୍ତ୍ତି ହୋଇଥିଲେ, କିନ୍ତୁ ଡାକ୍ତରଖାନାରୁ ଡିସଚାର୍ଜ ହେବା ପରେ କୋଶ୍ୟାରୀ ମହାରାଷ୍ଟ୍ର ସରକାରଙ୍କୁ ତିନି ଦିନର ଫାଇଲଗୁଡ଼ିକର ହିସାବ ମାଗିଛନ୍ତି । ମହାରାଷ୍ଟ୍ରରେ ରାଜନୈତିକ ସଙ୍କଟ ଯେପରି ଚାଲିଛି ସେଥିରେ ରାଜ୍ୟପାଳଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଶିବସେନାର ବିଦ୍ରୋହୀ ବିଧାୟକଙ୍କ ଯୋଗୁଁ ଦଳରେ ବିଭେଦ ଦେଖାଦେଇଛି, ଯେଉଁଥିପାଇଁ ମହାବିକାଶ ଅଘାଡ଼ି ସରକାର ବହୁ ଅସୁବିଧାର ସମ୍ମୁଖୀନ ହେଉଛି ।
ଜୁନ୍ 22 ରୁ 24 ମଧ୍ୟରେ ସରକାରଙ୍କ ଦ୍ୱାରା ନିଆଯାଇଥିବା ନିଷ୍ପତ୍ତି ଏବଂ ପ୍ରସ୍ତାବଗୁଡ଼ିକ ବିଷୟରେ ରାଜ୍ୟପାଳ ଭଗତ ସିଂହ କୋଶ୍ୟାରୀ ରାଜ୍ୟ ମୁଖ୍ୟ ଶାସନ ସଚିବ ସନ୍ତୋଷ କୁମାରଙ୍କୁ ଅବଗତ କରାଇବାକୁ ନିର୍ଦ୍ଦେଶ ଦେଇଛନ୍ତି । ସୂଚନାଯୋଗ୍ୟ ଯେ ତିନି ଦିନ ମଧ୍ୟରେ 160 ଟି ସରକାରୀ ପ୍ରସ୍ତାବ ଜାରି କରାଯାଇଛି । ଏହି ପ୍ରସ୍ତାବଗୁଡ଼ିକର ମୂଲ୍ୟ କୋଟି କୋଟି ଟଙ୍କାର ରହିଛି । ଏ ବାବଦରେ ରାଜ୍ୟପାଳ ମହାବିକାଶ ଅଘାଡ଼ି ସରକାରଙ୍କଠାରୁ ଉତ୍ତର ମାଗିଛନ୍ତି । ଗତ କିଛି ଦିନ ମଧ୍ୟରେ ମହାରାଷ୍ଟ୍ର ସରକାର ଯେଉଁଭଳି ଭାବରେ ତତ୍ପରତା ଅବଲମ୍ବନ କରୁଛନ୍ତି ସେଥିପ୍ରତି ହସ୍ତକ୍ଷେପ କରିବାକୁ ପ୍ରବୀଣ ଦରେକର ରାଜ୍ୟପାଳଙ୍କୁ ନିବେଦନ କରିଛନ୍ତି । ସେ ଏହି ନିଷ୍ପତ୍ତିରେ ହସ୍ତକ୍ଷେପ କରିବାକୁ ଅନୁରୋଧ କରିଥିଲେ ।
ଯଦି ଶିବସେନାର ବିଦ୍ରୋହୀ ବିଧାୟକମାନେ ଭାରତୀୟ ଜନତା ପାର୍ଟି ସହ ମିଳିତ ଭାବରେ ସରକାର ଗଠନ କରିବାକୁ ଚେଷ୍ଟା କରନ୍ତି, ତେବେ ରାଜ୍ୟପାଳଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହେବ । ସରକାର ଗଠନ କିମ୍ବା ବିଲୋପ କରିବାର ଦାବି ରାଜ୍ୟପାଳଙ୍କୁ ଦିଆଯିବା ଆବଶ୍ୟକ, ତେଣୁ ବର୍ତ୍ତମାନ ସମସ୍ତଙ୍କ ଦୃଷ୍ଟି ମଧ୍ୟ ରାଜ ଭବନରେ ରହିବ । ସୂଚନାଯୋଗ୍ୟ ଯେ ଏକନାଥ ସିନ୍ଦେଙ୍କ ନେତୃତ୍ୱରେ ବିଦ୍ରୋହୀ ଶିବସେନା ବିଧାୟକ ଆସାମର ଗୌହାଟୀର ରେଡିସନ୍ ବ୍ଲୁ ହୋଟେଲରେ ରହିଛନ୍ତି । ଗତ କିଛି ଦିନ ହେବ, ଏହି ବିଦ୍ରୋହୀ ବିଧାୟକମାନେ ଏଠାରୁ ସେମାନଙ୍କ ରଣନୀତି ପ୍ରସ୍ତୁତ କରୁଛନ୍ତି ।
Click it and Unblock the Notifications
Sign in with Google