କର୍ଣ୍ଣାଟକ ରାଜନୀତିରେ ବଢୁଛି ସସପେନ୍ସ ! ଡି.କେ ଏବଂ ସିଦ୍ଧରମୈୟାଙ୍କ ପରେ ବର୍ତ୍ତମାନ ମୁଖ୍ୟମନ୍ତ୍ରୀ ଦୌଡ଼ରେ ଏହି ନେତା

Published: Tuesday, May 16, 2023, 16:30 [IST]

କର୍ଣ୍ଣାଟକରେ ବିଜୟ ପରେ ବି କଂଗ୍ରେସ ପାଇଁ ସରିନି ଚିନ୍ତା । ଏପର୍ଯ୍ୟନ୍ତ ମୁଖ୍ୟମନ୍ତ୍ରୀ ଚେହେରା ଘୋଷଣା କରାଯାଇନାହିଁ । ସିଦ୍ଧରମୈୟା ଏବଂ ଡି.କେ ଶିବକୁମାରଙ୍କୁ ନେଇ ଦଳର ହାଇକମାଣ୍ଡ ବିଚାର ବିମର୍ଶ କରୁଥିବା ବେଳେ ଦଳର ଅନ୍ୟ ନେତାଙ୍କୁ ସିଏମ୍ କରିବାକୁ ଦାବି ଉଠିଛି । କଂଗ୍ରେସ କର୍ମୀ ଓ ସମର୍ଥକମାନେ ମଧ୍ୟ ଏକ ବୈଠକ କରି ସେମାନଙ୍କ ନେତାଙ୍କୁ ସିଏମ କରାଯାଉ ବୋଲି ଦାବି କରିଛନ୍ତି ।

କର୍ଣ୍ଣାଟକରେ, ମୁଖ୍ୟମନ୍ତ୍ରୀ ନାମ ଘୋଷଣା କରିବା ପୂର୍ବରୁ ଦଳ ମଧ୍ୟରେ ମାନସମନ୍ଥନ ଜାରି ରହିଛି । ସିଏମ୍ ନାମ ଘୋଷଣା କରିବାରେ ଯେତେ ଅଧିକ ବିଳମ୍ବ ହେଉଛି, ସସପେନ୍ସ ସେତେ ବଢୁଛି । ସିଦ୍ଧରମୈୟା ଏବଂ ଡି.କେ ଶିବକୁମାରଙ୍କ ସମେତ କର୍ଣ୍ଣାଟକ କଂଗ୍ରେସର ଭେଟେରାନ ନେତାମାନେ ଦିଲ୍ଲୀରେ ପହଞ୍ଚିଛନ୍ତି । ଏହି ସମୟରେ, ଜି ପରମେଶ୍ୱରଙ୍କ ସମର୍ଥକମାନେ ତାଙ୍କୁ ସିଏମ୍ କରିବା ନେଇ ଦାବି କରିଛନ୍ତି । ସିଏମ୍ ପଦ ପାଇଁ ଜି ପରମେଶ୍ୱରଙ୍କ ନାମକୁ ବିଚାର କରିବା ନେଇ କର୍ଣ୍ଣାଟକରେ ସମର୍ଥକ ମାନେ ଦାବି କରିଥିଲେ ।

ଏହି ସପ୍ତାହ ସୋମବାର ସୁଦ୍ଧା କର୍ଣ୍ଣାଟକର ସିଏମ୍ ଘୋଷଣା କରାଯିବ ବୋଲି ଆଶା କରାଯାଉଥିଲା । ଜାତୀୟ ସଭାପତି ମଲ୍ଲିକାର୍ଜୁନ ଖାଡ଼ଗେଙ୍କ ଉପରେ କଂଗ୍ରେସ ସିଏମ ଚୟନ ନିଷ୍ପତ୍ତି ଛଡ଼ାଯାଇଛି । ଅନ୍ୟପକ୍ଷରେ, ସିଏମ୍ ଦୌଡ଼ରେ ରାଜ୍ୟ ସଭାପତି ଡି.କେ ଶିବକୁମାର ଏବଂ ଭେଟେରାନ୍ ସିଦ୍ଧରମୈୟାଙ୍କ ନାମ ଆଗେ ରହିଛି । କିନ୍ତୁ ସେମାନଙ୍କ ବ୍ୟତୀତ ପାଞ୍ଚଟି ନାମ ଅଛି ଯାହାକୁ ନେଇ କଂଗ୍ରେସ ବିଚାର କରିପାରେ । ଏମାନଙ୍କ ମଧ୍ୟରେ ଏଚ୍.କେ ପାଟିଲ, ଡ ଜି ପରମେଶ୍ୱର, ଆର.ଭି ଦେଶପାଣ୍ଡେ, ଶମାନୁର ଶିବଶଙ୍କରପ୍ପା ଏବଂ ଏମବି ପାଟିଲ ମଧ୍ୟ ଅଛନ୍ତି ।

ଯଦିଓ ଏହି ପାଞ୍ଚଜଣ ନେତା ସେମାନଙ୍କ ପର୍ଯ୍ୟାୟକୁ ଅପେକ୍ଷା କରି ନୀରବ ରହିଥିଲେ ମଧ୍ୟ ଜି ପରମେଶ୍ୱରଙ୍କୁ ସିଏମ୍ କରିବାକୁ ଦାବି କରାଯାଇଛି । ଏହି ପରିସ୍ଥିତି କଂଗ୍ରେସ ପାଇଁ ଟେନସନ ବୃଦ୍ଧି କରିବାକୁ ଯାଉଛି। ବିଶ୍ୱାସ କରାଯାଏ ଯେ ଯଦି ଡି.କେ ଶିବକୁମାର ଏବଂ ସିଦ୍ଧରମୈୟାଙ୍କ ମଧ୍ୟରେ କଳହ ବଢିଯାଏ, ତେବେ ଦଳ ଏଚ୍.କେ ପାଟିଲ କିମ୍ବା ଡ ଜି ପରମେଶ୍ୱରଙ୍କ ନାମ ଉପରେ ବିଚାର କରିପାରନ୍ତି ।

କିଏ ଏହି ଜି ପରେମେଶ୍ୱର

ଜି ପରମେଶ୍ୱର କୋରଟାଗେର ବିଧାନସଭା ନିର୍ବାଚନମଣ୍ଡଳୀରୁ ପ୍ରାୟ 14,000 ଭୋଟରେ ଜିତିଛନ୍ତି । 72 ବର୍ଷୀୟ କଂଗ୍ରେସ ଭେଟେରାନ ସିଏମ ପଦବୀ ପାଇଁ ଦୌଡ଼ରେ ଅଛନ୍ତି । 2018 ମସିହାରେ ମଧ୍ୟ ସେ କଂଗ୍ରେସ-ଜେଡିଏସ୍ ସରକାରରେ ଉପମୁଖ୍ୟମନ୍ତ୍ରୀ ହୋଇଥିଲେ । ଜି ପରମେଶ୍ୱର କର୍ଣ୍ଣାଟକ କଂଗ୍ରେସର ସଭାପତି ଭାବରେ ଦୀର୍ଘତମ କାର୍ଯ୍ୟକାଳ ପାଇଁ ରେକର୍ଡ ରଖିଛନ୍ତି । ତାଙ୍କୁ ରାଜ୍ୟର ଦଳର ବଡ ଦଳିତ ଚେହେରା ଭାବେ ବିବେଚନା କରାଯାଏ ।

Published On May 16, 2023