ଗୁଜୁରାଟ ନିର୍ବାଚନରେ ଶ୍ରଦ୍ଧା ହତ୍ୟାକାଣ୍ଡ ପ୍ରସଙ୍ଗ ବିଜେପିକୁ ଦେବ କି ଫାଇଦା ?

ଗୁଜୁରାଟରେ ଶ୍ରଦ୍ଧା ହତ୍ୟାକାଣ୍ଡ ଏକ ନିର୍ବାଚନ ପ୍ରସଙ୍ଗ ପାଲିଟିଛି । ବିଜେପିର ନେତାମାନେ ରାଲିରେ ଏହି ପ୍ରସଙ୍ଗ ଉଠାଉଛନ୍ତି । ଘଟଣା ସମ୍ପର୍କରେ କଂଗ୍ରେସର ନୀତି ଉପରେ ମଧ୍ୟ ପ୍ରଶ୍ନ ଉଠିଛି । କଂଗ୍ରେସ ଏ ପ୍ରସଙ୍ଗରେ ଚୁପ୍ ରହିଥିବା ଅଭିଯୋଗ ହୋଇଛି ।

Published: Sunday, November 20, 2022, 17:03 [IST]

ଗାନ୍ଧୀନଗର : ଦିଲ୍ଲୀରେ ଶ୍ରଦ୍ଧା ୱାଲକର ହତ୍ୟା ମାମଲା ସମଗ୍ର ଦେଶରେ ଉତ୍ତେଜନା ସୃଷ୍ଟି କରିଛି । ପ୍ରଶ୍ନ ହେଉଛି, ପ୍ରେମ ସମ୍ପର୍କରେ ଥିବା ଦାବି କରି ଯେଉଁ ବ୍ୟକ୍ତିଙ୍କ ସହ ରହୁଛନ୍ତି ସେହି ବ୍ୟକ୍ତିଙ୍କୁ ହତ୍ୟା କରିବା, ମୃତ ଶରୀରକୁ ଖଣ୍ଡ ଖଣ୍ଡ କରି ଫ୍ରିଜରେ ଲୁଚାଇ ରଖିବା ଭଳି କାମ କରିବା ପାଇଁ କେହି ଜଣେ ଏତେ ନିର୍ଦ୍ଦୟ ହୋଇପାରିବେ ? କିନ୍ତୁ, ଗୁଜୁରାଟରେ ଏହା ଏକ ନିର୍ବାଚନ ପ୍ରସଙ୍ଗ ପାଲିଟିଛି । ଶାସକ ବିଜେପିର ନେତାମାନେ ରାଲିରେ ଏହି ପ୍ରସଙ୍ଗ ଉଠାଉଛନ୍ତି । ଏହି ଘଟଣା ସମ୍ପର୍କରେ କଂଗ୍ରେସର ନୀତି ଉପରେ ମଧ୍ୟ ପ୍ରଶ୍ନ ଉଠିଛି । କଂଗ୍ରେସ ନେତାମାନେ ଏ ପ୍ରସଙ୍ଗରେ ଚୁପ୍ ରହିଥିବା ଅଭିଯୋଗ ହୋଇଛି । ବାସ୍ତବରେ, ଏହା କରି ବିଜେପି ଗୁଜୁରାଟ ନିର୍ବାଚନରେ ଫାଇଦା ନେବାକୁ ଚାହୁଁଛି କି ବୋଲି ମଧ୍ୟ ପ୍ରଶ୍ନ ଉଠିଛି ।

ଗୁଜୁରାଟରେ ନିର୍ବାଚନୀ ମାହୋଲ ସରଗରମ୍ ରହିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ନିଜ ରାଜ୍ୟରେ ବିଜେପିକୁ କ୍ଷମତାକୁ ଫେରାଇ ଆଣିବା ପାଇଁ ଫୁଲ୍ ଦମ୍ ରେ ଲାଗି ପଡ଼ିଛନ୍ତି । ଦୁଇ ଦିନ ମଧ୍ୟରେ ସେ ଅେକ ରାଲିକୁ ସମ୍ବୋଧନ କରିବାର ମଧ୍ୟ ଯୋଜନା ରହିଛି । ସୋମବାର ଠାରୁ କଂଗ୍ରେସ ନେତା ରାହୁଲ ଗାନ୍ଧୀ ମଧ୍ୟ ତାଙ୍କ ଭାରତ ଯୋଡା ଯାତ୍ରା ମଧ୍ୟରେ ଗୁଜୁରାଟରେ ପ୍ରଚାର କରିବାର ସମ୍ଭାବନା ରହିଛି ।

ଗୁଜୁରାଟରେ ସରକାର ଗଠନ ପାଇଁ ନିର୍ବାଚନ ଅନୁଷ୍ଠିତ ହେଉଛି, କିନ୍ତୁ ବିଜେପିର ସମସ୍ତ ବଡ ନେତା ଦିଲ୍ଲୀର ମେହରୌଲି ଅଞ୍ଚଳରେ ସମ୍ବେଦନଶୀଳ ଶ୍ରଦ୍ଧା ୱାଲକର ହତ୍ୟା ମାମଲା ଉଠାଉଛନ୍ତି । ବିଶେଷକରି ଏହା ମାଧ୍ୟମରେ ଦଳ କଂଗ୍ରେସକୁ ଟାର୍ଗେଟ କରିବାକୁ ଚେଷ୍ଟା କରୁଛି ବିଜେପି । ଉଦାହରଣ ସ୍ୱରୂପ, ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଦାବି କରିଛନ୍ତି ଯେ ଦକ୍ଷିଣ ଦିଲ୍ଲୀର ଶ୍ରଦ୍ଧା ୱାଲକରଙ୍କ ଲିଭ୍-ଇନ୍ ପାର୍ଟନର ଅଫତାବ୍ ପୁନାୱାଲା ତାଙ୍କୁ ଅତି ନିର୍ମମ ଭାବରେ ହତ୍ୟା କରି ତାଙ୍କ ଶରୀରକୁ 35 ଖଣ୍ଡରେ କାଟି ଦେଇଥିଲେ । ଏହା ଏକ ଲଭ୍ ଜିହାଦ୍ ମାମଲା । ସେ ଚେତାବନୀ ଦେଇଛନ୍ତି ଯେ ଯଦି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପରି କୌଣସି ଶକ୍ତିଶାଳୀ ନେତା ନ ରହିବେ, ତେବେ ଦେଶର ପ୍ରତ୍ୟେକ ସହରରେ 'ଆଫତାବ' ରହିବେ ।

ଗୁଜୁରାଟର କଚ୍ଛ ଅଞ୍ଚଳରେ ଏକ ରାଲିରେ ଶର୍ମା ଦାବି କରିଛନ୍ତି ଯେ ନିକଟରେ ଅଫତାବ ଶ୍ରଦ୍ଧାଙ୍କୁ ମୁମ୍ବାଇରୁ ଆଣି ଲଭ୍ ଜିହାଦ ନାମରେ 35 ଖଣ୍ଡରେ କାଟି ଦେଇଛି । ଆଉ ତା'ପରେ ସେ ତା'ର ଶବକୁ କେଉଁଠାରେ ରଖିଲା ? ଫ୍ରିଜରେ । ଯେତେବେଳେ ମୃତ ଦେହ ଫ୍ରିଜରେ ପଡ଼ିଥିଲା, ସେତେବେଳେ ସେ ଅନ୍ୟ ଜଣେ ମହିଳାଙ୍କୁ ଫ୍ଲାଟ୍ କୁ ଆଣି ତାଙ୍କୁ ଡେଟ କରିବା ଆରମ୍ଭ କରିଥିଲେ । ହିମନ୍ତ ଆହୁରି କହିଛନ୍ତି ଯଦି ଦେଶରେ ଜଣେ ଏପରି ଶକ୍ତିଶାଳୀ ନେତା ଏବଂ ସରକାର ନ ରହେ, ଯିଏ ନିଜ ଦେଶକୁ ନିଜ ମା' ପରି ଆଦର କରେ, ତେବେ ପ୍ରତ୍ୟେକ ସହରରେ ଅଫତାବ ଜନ୍ମ ନେବେ... ଏବଂ ଆମେ ଆମ ସମାଜକୁ ସୁରକ୍ଷିତ ରଖିବାରେ ସଫଳ ହୋଇ ପାରିବା ନାହିଁ । ତେଣୁ 2024 ରେ ଦେଶକୁ ତୃତୀୟ ଥର ପାଇଁ ମୋଦୀ ଜୀ ଙ୍କୁ ନିର୍ବାଚିତ କରିବା ଉଚିତ୍ ଏବଂ ସେ ଏଭଳି ପ୍ରସଙ୍ଗକୁ ସମାଧାନ କରିବାରେ ସକ୍ଷମ ହୋଇପାରିବେ ।

ବିଜେପିକୁ ଜିତାଇବା ପାଇଁ ଗୁଜୁରାଟର ଲୋକଙ୍କୁ ନିବେଦନ କରି ହିମନ୍ତ ବିଶ୍ୱ ଶର୍ମା ପୁଣି ଥରେ ମୁସଲମାନମାନଙ୍କ 'ତୁଷ୍ଟିକରଣ' ଅଭିଯୋଗ କରି କଂଗ୍ରେସ ଉପରେ ଘୋର ଆକ୍ରମଣ କରିଥିଲେ । କେବଳ ଶର୍ମା ନୁହଁନ୍ତି, ଅନେକ ନେତା ଗୁଜୁରାଟ ନିର୍ବାଚନରେ ଶ୍ରଦ୍ଧା ହତ୍ୟା ମାମଲା ଉଠାଇ ଦେଶରେ ଲଭ୍ ଜିହାଦ ବିରୋଧରେ ଭୋଟରଙ୍କୁ ସଚେତନ କରିବାକୁ ଚେଷ୍ଟା କରିଛନ୍ତି । ଅନ୍ୟପକ୍ଷରେ ଉତ୍ତରପ୍ରଦେଶ ଉପ ମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ଶ୍ରଦ୍ଧା ହତ୍ୟା ମାମଲାରେ କଂଗ୍ରେସ ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଭଦ୍ରାଙ୍କୁ ସିଧାସଳଖ ଟାର୍ଗେଟ କରିଛନ୍ତି । ସେ କହିଛନ୍ତି ଯେ ୟୁପିରେ ପ୍ରିୟଙ୍କା କହିଛନ୍ତି ଯେ 'ମୁଁ ଜଣେ ଝିଅ, ଲଢି ପାରିବି', କିନ୍ତୁ ସେ ଶ୍ରଦ୍ଧାଙ୍କ ସହ ହୋଇଥିବା ଜଘନ୍ୟ ଘଟଣାରେ ମୁହଁ ଖୋଲୁ ନାହାଁନ୍ତି, କାରଣ ସେ ଅନୁଭବ କରୁଛନ୍ତି ଯେ ଏହା କରିବା ଦ୍ୱାରା ତାଙ୍କ ଭୋଟ୍ ବ୍ୟାଙ୍କ ହ୍ରାସ ପାଇବ ।

ଅନ୍ୟପକ୍ଷରେ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ଦକ୍ଷିଣ ଗୁଜରାଟ ଏବଂ ସୌରାଷ୍ଟ୍ର ରେ କଂଗ୍ରେସ ଉପରେ ଆକ୍ରମଣ ଜାରି ରଖିଛନ୍ତି ଏବଂ କଂଗ୍ରେସକୁ ନର୍ମଦା ନଦୀରେ ବିସର୍ଜନ କରିବାକୁ ଲୋକଙ୍କୁ କହିଛନ୍ତି । ବିରୋଧୀ ଦଳ ସର୍ବଦା 'ଜାତୀୟତା ଉପରେ ଆତଙ୍କବାଦ'କୁ ଗୁରୁତ୍ୱ ଦେଇଆସୁଛନ୍ତି ବୋଲି ସେ ଅଭିଯୋଗ କରିଛନ୍ତି । ସେ କହିଛନ୍ତି ଯେ କଂଗ୍ରେସ କ୍ଷମତାରେ ଥିବାବେଳେ ଧାରା 370 ରଦ୍ଦ, ଅଯୋଧ୍ୟାରେ ଏକ ମହାନ ରାମ ମନ୍ଦିର ନିର୍ମାଣ ଏବଂ ତିନ୍ ତଲାକ୍ ରଦ୍ଦ କେବେ ସମ୍ଭବ ନଥିଲା ।

ଗୁଜୁରାଟ ନିର୍ବାଚନରେ ଜାତୀୟତା ପ୍ରସଙ୍ଗ ସର୍ବଦା ଏକ ପ୍ରମୁଖ ପ୍ରସଙ୍ଗ ହୋଇଆସୁଛି । ଗୁଜୁରାଟରେ ବିଜେପିର ସତ୍ତାର ଆରମ୍ଭ ଅଯୋଧ୍ୟାରେ ରାମ ମନ୍ଦିର ଆନ୍ଦୋଳନରୁ ହିଁ ହୋଇଥିଲା । ତା'ପରେ 2002 ନିର୍ବାଚନ ଠାରୁ, ପ୍ରମୁଖତାବାଦ ଏହାର ରାଜନୀତି ପାଇଁ ଅତ୍ୟନ୍ତ ଲାଭଦାୟକ ବୋଲି ପ୍ରମାଣିତ ହୋଇଛି । ଗୁଜୁରାଟ ଛାଡିବା ପରେ ସମଗ୍ର ଦେଶରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଲୋକପ୍ରିୟତା ମଜବୁତ ହୋଇଛି, ତେଣୁ ଏହା ପଛରେ ବିଜେପିର ସମାନ ଚିନ୍ତାଧାରା ରହିଛି, ଯେଉଁଥିରେ କଂଗ୍ରେସକୁ ସବୁ ଦିଗରୁ ଘେରି ରହିବା ସହଜ ହୋଇଯାଏ । ଶ୍ରଦ୍ଧା ହତ୍ୟା ମାମଲା ସମଗ୍ର ସମାଜକୁ ଥରାଇ ଦେଇଛି । ଗତ 27 ବର୍ଷ ଧରି ବିଜେପି ଗୁଜୁରାଟୀ ଭୋଟରଙ୍କୁ ବାନ୍ଧି ରଖିଛି । ତେଣୁ ଏଥର ମଧ୍ୟ ଶ୍ରଦ୍ଧା ହତ୍ୟାକାଣ୍ଡକୁ ମୁଖ୍ୟ ପ୍ରସଙ୍ଗ କରି ବିଜେପି ନିର୍ବାଚନ ବୈତରଣୀ ପାର୍ ହେବାକୁ ଚେଷ୍ଚା କରିଛି । ତେବେ ଏହା କେତେ ଦୂର ସଫଳ ହେଉଛି ତାହା ଦେଖିବା ବାକି ରହିଲା ।

Published On November 20, 2022