‘କିଏ ପ୍ରଧାନମନ୍ତ୍ରୀ ହେବ ତାହା ପ୍ରଶ୍ନ ନୁହଁ, ସବୁ ବିପକ୍ଷ ଏକାଠି ହେବା ଉଚିତ୍' - ଆହ୍ୱାନ ଦେଲେ ଖଡ଼ଗେ

ସମସ୍ତ ସମାନ ବିଚାରଧାରା ଥିବା ବିରୋଧୀ ବିଭାଜନକାରୀ ଶକ୍ତି ବିରୋଧରେ ଏକାଠି ଆସିବା ଉଚିତ୍ । ମୁଁ କେବେ କହି ନାହିଁ କିଏ ନେତୃତ୍ୱ ନେବେ କିମ୍ବା କିଏ ପ୍ରଧାନମନ୍ତ୍ରୀ ହେବେ ? ଏହା ଏକ ପ୍ରଶ୍ନ ନୁହେଁ ।

Published: Wednesday, March 1, 2023, 22:10 [IST]

ଚେନ୍ନାଇ : ବିଜେପିକୁ ଶାସନ ଗାଦିରୁ ହଟାଇବାକୁ ବିରୋଧୀଙ୍କୁ ଏକଜୁଟ୍ ହେବାକୁ ଆହ୍ୱାନ କରିଛନ୍ତି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ୍ ଖଡ଼ଗେ । ଏପରିକି ପ୍ରଧାନମନ୍ତ୍ରୀ କିଏ ହେବେ, ସେ ପ୍ରଶ୍ନ ରୁ ଦୂରେଇ ରହି ସମସ୍ତ ବିରୋଧୀ ଏକାଠଇ ହେବାକୁ କହିଛନ୍ତି ଖଡ଼ଗେ ।

ତାମିଲନାଡୁ ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନଙ୍କ 70 ତମ ଜନ୍ମଦିନର ସାଧାରଣ ସଭାରେ ଯୋଗଦେବା ପାଇଁ କଂଗ୍ରେସ ରାଷ୍ଟ୍ରୀୟ ସଭାପତି ମଲ୍ଲିକାର୍ଜୁନ ଚେନ୍ନାଇରେ ପହଞ୍ଚିଛନ୍ତି । ଏହି ଅବସରରେ ସେ ମଞ୍ଚରୁ କହିଛନ୍ତି, ସମସ୍ତ ସମାନ ବିଚାରଧାରା ଥିବା ବିରୋଧୀ ବିଭାଜନକାରୀ ଶକ୍ତି ବିରୋଧରେ ଏକାଠି ଆସିବା ଉଚିତ୍ । ମୁଁ କେବେ କହି ନାହିଁ କିଏ ନେତୃତ୍ୱ ନେବେ କିମ୍ବା କିଏ ପ୍ରଧାନମନ୍ତ୍ରୀ ହେବେ ? ଏହା ଏକ ପ୍ରଶ୍ନ ନୁହେଁ । ଆମେ ମିଳିତ ଭାବରେ ଲଢିବାକୁ ଚାହୁଁ, ଏହା ଆମର ଇଚ୍ଛା ।

ଖଡ଼ଗେ ଆହୁରି କହିଛନ୍ତି, ତାମିଲନାଡୁରେ କଂଗ୍ରେସ-ଡିଏମକେ ଗଠବନ୍ଧନ 2004, 2009 ରେ ଲୋକସଭା ଏବଂ 2006 ଏବଂ 2021 ରେ ବିଧାନସଭା ବିଜୟ ହାସଲ କରିଛି । UPA ଗଠବନ୍ଧନ ପାଇଁ 2024 ଲୋକସଭା ବିଜୟ ପାଇଁ ଆମର ମିଳିତମଞ୍ଚ ଏବଂ ନେତୃତ୍ୱର ମୂଳଦୁଆକୁ ମଜବୁତ କରିବାକୁ ପଡିବ ।

କଂଗ୍ରେସ ସଭାପତି ମଲ୍ଲିକାର୍ଜୁନ କହିଛନ୍ତି ଯେ ବିଜେପି ସରକାରଙ୍କ ବିଫଳତା ହେତୁ 23 କୋଟିରୁ ଅଧିକ ଲୋକଙ୍କୁ ଦାରିଦ୍ର ସୀମାରେଖା ତଳେ ଠେଲି ଦିଆଯାଇଛି । ସାଧାରଣ ବ୍ୟକ୍ତି ମୂଲ୍ୟ ବୃଦ୍ଧିରେ ଅସୁବିଧାରେ ପଡ଼ିଛନ୍ତି, ଯୁବକମାନେ ବେକାରୀ ଦ୍ୱାରା ପ୍ରଭାବିତ ହେଉଛନ୍ତି, କିନ୍ତୁ ନିର୍ବାଚନ ଜିତିବା ପାଇଁ ବିଜେପି ସମାଜକୁ ପୋଲାରାଇଜ୍ କରିବାରେ ଆଗ୍ରହୀ ।

ଏହାପୂର୍ବରୁ ଚେନ୍ନାଇରେ ଡିଏମକେ କାର୍ଯ୍ୟକ୍ରମରେ ଜାମ୍ମୁ କାଶ୍ମୀରର ପୂର୍ବତନ ସିଏମ ଫାରୁକ୍ ଅବଦୁଲ୍ଲା କହିଛନ୍ତି ଯେ "ମୁଁ ଆଶା କରୁଛି ଆପଣ (ଏମ.କେ ଷ୍ଟାଲିନ) କେବଳ ତାମିଲନାଡୁ ନୁହେଁ ସମଗ୍ର ଭାରତର ସେବା କରିବା ପାଇଁ ଦୀର୍ଘ ଦିନ ବଞ୍ଚିବେ । ମଲ୍ଲିକାର୍ଜୁନ ଖାର୍ଜ ଜୀଙ୍କୁ ମୁଁ କହିବି, କିଏ ପ୍ରଧାନମନ୍ତ୍ରୀ ହେବେ, ସେ କଥା ଭୁଲିଯାଅ । ପ୍ରଥମେ ନିର୍ବାଚନରେ ଜିତନ୍ତୁ, ତା'ପରେ ଆସନ୍ତୁ ଭାବିବା କିଏ ପ୍ରଧାନମନ୍ତ୍ରୀ ହେବେ । ପ୍ରଧାନମନ୍ତ୍ରୀ ଗୁରୁତ୍ୱପୂର୍ଣ୍ଣ ନୁହେଁ, ଦେଶ ଗୁରୁତ୍ୱପୂର୍ଣ୍ଣ । ଭାରତ ଏକ କଠିନ ପରିସ୍ଥିତିରେ ଅଛି । ଗଣତନ୍ତ୍ର ଏବଂ ସମ୍ବିଧାନ ବିପଦରେ ପଡ଼ିଛି।"

Published On March 1, 2023