ପଶ୍ଚିମବଙ୍ଗରେ ଆସନ ବୁଝାମଣା କଲେ କଂଗ୍ରେସ ଓ ବାମଦଳ

ପଶ୍ଚିମବଙ୍ଗର ମୋଟ 294 ବିଧାନସଭା ଆସନରୁ 193ଟି ଆସନରେ ଲଢିବା ନେଇ ପ୍ରଥମ ପର୍ଯ୍ୟାୟର ବୁଝାମଣା କଂଗ୍ରେସ ଓ ବାମଦଳ ମଧ୍ୟରେ ହୋଇସାରିଛି । ଗୁରୁବାର କୋଲକାତାର ରାଜ୍ୟ କଂଗ୍ରେସ ମୁଖ୍ୟାଳୟ ବିଧାନ ଭବନରେ ଏକ ବୈଠକରେ ଏହି ନିଷ୍ପତ୍ତି ନିଆଯାଇଛି ।

Published: Thursday, January 28, 2021, 19:45 [IST]

କୋଲକାତା : ପଶ୍ଚିମବଙ୍ଗ ବିଧାନସଭା ନିର୍ବାଚନ ତାରିଖ ଘୋଷଣା ହେବା ପୂର୍ବରୁ ରାଜ୍ୟରେ ଜୋରଦାର ହେଲାଣି ନିର୍ବାଚନୀ ପ୍ରଚାର । ସମସ୍ତ ରାଜନାତିକ ଦଳ ତତ୍ପର ହେବା ସହ ନିଜ ନିଜର ରଣନୀତି ପ୍ରସ୍ତୁତ କରୁଛନ୍ତି । ବିଶେଷ କରି ରାଜ୍ୟରେ ଶାସନୀଧୀନ ତୃଣମୂଳ କଂଗ୍ରେସ ଓ ଭାରତୀୟ ଜନତା ପାର୍ଟି ମଧ୍ୟରେ ଦେଖିବାକୁ ମିଳୁଛି କଡ଼ା ଟକ୍କର । ଏହି ସବୁ ଘଟଣା ମଧ୍ୟରେ ଆଗକୁ ଆସିଛି ଆଇଉ ଏକ ବଡ଼ ଖବର । କଂଗ୍ରେସ ଓ ବାମଦଳ ମେଣ୍ଟକରି ନିର୍ବାଚନୀ ବୈତରଣୀ ପାର୍ ହେବାକୁ ଲକ୍ଷ୍ୟ ରଖିଛନ୍ତି । ପରସ୍ପର ମଧ୍ୟରେ ଆସନ ବୁଝାମଣା ମଧ୍ୟ କରିଛନ୍ତି ।

ପଶ୍ଚିମବଙ୍ଗର ମୋଟ 294 ବିଧାନସଭା ଆସନରୁ 193ଟି ଆସନରେ ଲଢିବା ନେଇ ପ୍ରଥମ ପର୍ଯ୍ୟାୟର ବୁଝାମଣା କଂଗ୍ରେସ ଓ ବାମଦଳ ମଧ୍ୟରେ ହୋଇସାରିଛି । ଗୁରୁବାର କୋଲକାତାର ରାଜ୍ୟ କଂଗ୍ରେସ ମୁଖ୍ୟାଳୟ ବିଧାନ ଭବନରେ ଏକ ବୈଠକରେ ଏହି ନିଷ୍ପତ୍ତି ନିଆଯାଇଛି । ଏହି ବୈଠକରେ ବାମ ଦଳର ବିମାନ ବୋଷଙ୍କ ସମେତ ଉଭୟ ଦଳର ବରିଷ୍ଠ ଅଧିକାରୀ ମାନେ ଉପସ୍ଥିତ ଥିଲେ ।

ଏହି ବୈଠକରେ ହୋଇଥିବା ନିଷ୍ପତ୍ତି ଅନୁସାରେ, ରାଜ୍ୟ କଂଗ୍ରେସ ସଭାପତି ଅଧୀର ଚୌଧୁରୀ କହିଛନ୍ତି, ଆଗାମୀ ବିଧାନସଭା ନିର୍ବାଚନରେ କଂଗ୍ରେସ ଓ ବାମଦଳ ପରସ୍ପର ସହ ମେଣ୍ଟ କରି ନିର୍ବାଚନ ଲଢିବେ । ଏନେଇ 193ଟି ଆସନର ଭାଗବଣ୍ଟା ଶେଷ ହୋଇଛି । ଏହି 193ଟି ଆସନରୁ ବାମଦଳ 101ଟି ଓ କଂଗ୍ରେସ 92ଟି ଆସନରେ ଲଢିବା ନେଇ ନିଷ୍ପତ୍ତି ନିଆଯାଇଛି । ଏହି 193 ଆସନର ମଧ୍ୟରେ ଉଭୟ ଦଳ ଗତ 2016 ନିର୍ବାଚନରେ ଜିତିଥିବା 77ଟି ଆସନ ରହିଛି । ଏଥିରୁ କଂଗ୍ରେସ 44ଟି ଆସନରେ ପ୍ରତିଦ୍ୱନ୍ଦିତା କରିବ ଓ ବାମଦଳ ବାକି 33ଟି ଆସନରେ ନିର୍ବାଚନ ଲଢିବ । ଅବଶିଷ୍ଟ 101ଟି ଆସନ ଉପରେ ପରବର୍ତ୍ତୀ ପର୍ଯ୍ୟାୟରେ ମିଳିତ ବୈଠକରେ ନିଷ୍ପତ୍ତି ନିଆଯିବ ବୋଲି ସେ ସୂଚନା ଦେଇଛନ୍ତି । ରାଜ୍ୟରେ ସଂକୀର୍ଣ୍ଣ ରାଜନୀତିକୁ ପ୍ରୋତ୍ସାହିତ କରୁଥିବା ଶାସନକ ଟିଏମସି ଓ ବିଜେପି ବିରୋଧରେ ଉଭୟ କଂଗ୍ରେସ ଓ ବାମଦଳ ଏକାଠି ନିର୍ବାଚନ ଲଢିବେ ବୋଲି ଶ୍ରୀ ଚୌଧୁରୀ କହିଛନ୍ତି ।

Published On January 28, 2021