ମୁଖ୍ୟମନ୍ତ୍ରୀ ଆସନ ବିବାଦ ନେଇ କଂଗ୍ରେସ ହରାଇଛି 5 ରାଜ୍ୟ
ମୁଖ୍ୟମନ୍ତ୍ରୀ ପଦ ପାଇଁ ଆଗରୁ ମଧ୍ୟ ଅନେକ ଥର କଂଗ୍ରେସ ବିବାଦର ସମ୍ମୁଖୀନ ହୋଇଛି । କେତେକ ଭେଟେରାନ୍ ନେତାଙ୍କ ମୁଖ୍ୟମନ୍ତ୍ରୀ ଆସନ ଲୋଭ ଯୋଗୁଁ କଂଗ୍ରେସ ହାତରୁ ରାଜ୍ୟର କମାଣ ଚାଲିଯାଇଥିବା ନଜିର ରହିଛି ।
ଜୟପୁର : ଯେକୌଣସି ରାଜ୍ୟରେ ସରକାରଙ୍କ ପାଞ୍ଚ ବର୍ଷ କାର୍ଯ୍ୟକାଳ ମଧ୍ୟରେ ମୁଖ୍ୟମନ୍ତ୍ରୀ ପରିବର୍ତ୍ତନ କରିବା କଂଗ୍ରେସ ଦଳ ପାଇଁ ସବୁବେଳେ ଏକ ପ୍ରମୁଖ ଆହ୍ୱାନ ହୋଇଆସୁଛି । ଯେଉଁଭଳି ଭାବରେ ସ୍ଥାନୀୟ ନେତାଙ୍କ ନିଜର ବ୍ୟକ୍ତିଗତ ଅଭିଳାଷ ରହିଛି, ମୁଖ୍ୟମନ୍ତ୍ରୀ ପରିବର୍ତ୍ତନ କରିବା ଦଳ ପାଇଁ ଏକ କଷ୍ଟସାଧ୍ୟ ଆହ୍ୱାନ ପାଲଟିଛି । ରାଜସ୍ଥାନରେ କଂଗ୍ରେସ ଦଳ ଏକ ଅଜବ ଦ୍ୱନ୍ଦ୍ୱରେ ପଡ଼ିଛି, ଯେଉଁଭଳି ଅଶୋକ ଗେହଲଟଙ୍କୁ ସମର୍ଥନ କରୁଥିବା 83 ଜଣ ବିଧାୟକ ଦଳ ସଭାରେ ଭାଗ ନେବାକୁ ମନା କରିଦେଇଥିଲେ ଏବଂ ଅଶୋକ ଧାରୀୱାଲଙ୍କ ଘରେ ଏକାଠି ହୋଇଥିଲେ, ଏହା ପରେ କଂଗ୍ରେସ ପର୍ଯ୍ୟବେକ୍ଷକ କଣ କରିବେ ସେ ନେଇ ଦ୍ୱନ୍ଦରେ ପଡ଼ିଛନ୍ତି ।
ଏପରି ମୁଖ୍ୟମନ୍ତ୍ରୀ ପଦ ପାଇଁ ଆଗରୁ ମଧ୍ୟ ଅନେକ ଥର କଂଗ୍ରେସ ବିବାଦର ସମ୍ମୁଖୀନ ହୋଇଛି । କେତେକ ଭେଟେରାନ୍ ନେତାଙ୍କ ମୁଖ୍ୟମନ୍ତ୍ରୀ ଆସନ ଲୋଭ ଯୋଗୁଁ କଂଗ୍ରେସ ହାତରୁ ରାଜ୍ୟର କମାଣ ଚାଲିଯାଇଥିବା ନଜିର ରହିଛି । ତେବେ ଆସନ୍ତୁ ଜାଣିବା କେଉଁ ରାଜ୍ୟରେ ମୁଖ୍ୟମନ୍ତ୍ରୀ ଆସନ ବିବାଦ କଂଗ୍ରେସ ପାଇଁ ଭାରୀ ପଡ଼ିଛି ।
ପୁଡୁଚେରୀରେ ହାତରୁ ଗଲା ଶାସନ
ରାଜସ୍ଥାନରେ ବିଦ୍ରୋହୀ ବିଧାୟକମାନେ ଦଳର ସମସ୍ୟା ଆହୁରି ବଢାଇ ଦେଇଥିଲେ ଯେତେବେଳେ ଏହି ବିଧାୟକମାନେ ସିପି ଯୋଶୀଙ୍କୁ ଇସ୍ତଫା ପତ୍ର ଦାଖଲ କରିଥିଲେ । ଏହି ବିଧାୟକମାନେ ଧମକ ଦେଇଛନ୍ତି ଯେ ଯଦି ସଚିନ ପାଇଲଟଙ୍କୁ ମୁଖ୍ୟମନ୍ତ୍ରୀ କରାଗଲେ ସେମାନେ ଇସ୍ତଫା ଦେବେ । ଠିକ୍ ଏହିପରି 2008 ରେ ମଧ୍ୟ ଦଳ ସମ୍ମୁଖରେ ସମାନ ପରିସ୍ଥିତି ଉପୁଜିଥିଲା । ସେତେବେଳେ ପୁଡୁଚେରୀ ମୁଖ୍ୟମନ୍ତ୍ରୀ ଏନ ରଙ୍ଗସ୍ୱାମୀଙ୍କୁ ପଦବୀରୁ ଜବରଦସ୍ତ ହଟାଇ ଦିଆଯାଇଥିଲା ଏବଂ ତାଙ୍କ ସ୍ଥାନରେ ଭି ବୈଥିଲଙ୍ଗମଙ୍କୁ କଂଗ୍ରେସ ହାଇକମାଣ୍ଡ ନିଯୁକ୍ତ କରିଥିଲେ । 2011 ମସିହାରେ ରଙ୍ଗାସ୍ୱାମୀ କଂଗ୍ରେସ ଦଳ ଛାଡି NR କଂଗ୍ରେସ ଗଠନ କରିଥିଲେ ଏବଂ ବର୍ତ୍ତମାନ ସେ ଏଠାରେ ବିଜେପିର ସମର୍ଥନରେ ରାଜ୍ୟର ମୁଖ୍ୟମନ୍ତ୍ରୀ ଅଟନ୍ତି ।
ଆନ୍ଧ୍ରରୁ ଗଲା କଂଗ୍ରେସ କମାଣ
ଗତ କିଛି ବର୍ଷ ମଧ୍ୟରେ କଂଗ୍ରେସ ନିଜର ଅନେକ ଯୁବ ତଥା ଲୋକପ୍ରିୟ ନେତାଙ୍କୁ ହରାଇଛି । ମୁଖ୍ୟମନ୍ତ୍ରୀ ପଦବୀ ଯୋଗୁଁ ଏହି ସମସ୍ତ ନେତା ଦଳରୁ ବାହାରିଛନ୍ତି । 2009 ରେ ଯେତେବେଳେ ହେଲିକପ୍ଟର ଦୁର୍ଘଟଣାରେ YS ରାଜଶେଖର ରେଡ୍ଡୀଙ୍କ ମୃତ୍ୟୁ ହୋଇଥିଲା, ସେତେବେଳେ କଂଗ୍ରେସ ତାଙ୍କ ପୁଅ ଜଗନମୋହନଙ୍କ ସ୍ଥାନରେ କେ ରୋସୈୟାଙ୍କୁ ମୁଖ୍ୟମନ୍ତ୍ରୀ ଭାବରେ ନିଯୁକ୍ତ କରିଥିଲା । ଯେତେବେଳେ ଜଗନଙ୍କୁ ରାଜ୍ୟରେ ଯାତ୍ରା କରିବାକୁ ଅନୁମତି ଦିଆଯାଇନଥିଲା, ସେତେବେଳେ ସେ କଂଗ୍ରେସଠାରୁ ଅଲଗା ହୋଇ YSR କଂଗ୍ରେସ ଗଠନ କରି 2019 ରେ ରାଜ୍ୟର ମୁଖ୍ୟମନ୍ତ୍ରୀ ହୋଇଥିଲେ ।
ମଧ୍ୟପ୍ରଦେଶରେ ସିନ୍ଧିଆ-କମଲନାଥ ବିବାଦ
ମଧ୍ୟପ୍ରଦେଶରେ ମଧ୍ୟ ଏଭଳି ଘଟଣା ଘଟିଥିଲା, ଯେତେବେଳେ ଜ୍ୟୋତିରାଦିତ୍ୟ ସିନ୍ଧିଆ କଂଗ୍ରେସ ଠାରୁ ଦୂରେଇବାକୁ ନିଷ୍ପତ୍ତି ନେଇଥିଲେ । 15 ବର୍ଷ ପରେ କଂଗ୍ରେସ ଦଳ ମଧ୍ୟପ୍ରଦେଶରେ ସତ୍ତାକୁ ଫେରିଥିଲା, କିନ୍ତୁ କମଲ ନାଥ ଏବଂ ଜ୍ୟୋତିରାଦିତ୍ୟ ସିନ୍ଧିଆଙ୍କ ମଧ୍ୟରେ ମୁଖ୍ୟମନ୍ତ୍ରୀ ପଦକୁ ନେଇ ଥିବା ମତଭେଦ କାରଣରୁ ସିନ୍ଧିଆ କଂଗ୍ରେସଠାରୁ ନିଜକୁ ଦୂରେଇ ଦେଇଥିଲେ । ଦୁଇ ବର୍ଷ ପରେ ରାଜ୍ୟ ସରକାର ଭାଙ୍ଗିଗଲା ଏବଂ ବିଜେପି ପୁଣି କ୍ଷମତାକୁ ଫେରିଲା । ପରେ ସିନ୍ଧିଆ ବିଜେପି ସରକାରରେ କେନ୍ଦ୍ର ମନ୍ତ୍ରୀ ପଦ ପାଇଥିଲେ ।
କଂଗ୍ରେସ ଗଡ଼ ପଞ୍ଜାବ ଶାସନରୁ ବାହାର
ପଞ୍ଜାବରେ ମଧ୍ୟ କଂଗ୍ରେସ ସମ୍ମୁଖରେ ଏକ ବଡ ସଙ୍କଟ ଦେଖାଦେଇଥିଲା ଏବଂ ଶେଷରେ ଦଳ ହାତରୁ କ୍ଷମତା ଚାଲିଯାଇଥିଲା । ଏଠାରେ ଅମରିନ୍ଦର ସିଂହଙ୍କୁ କୋଣ ଠେସା କରିବାକୁ ଚେଷ୍ଟା କରାଯାଇଥିଲା, ଏହା ପରେ ନବଜୋତ ସିଂହ ସିଦ୍ଧୁ ସିଏମ୍ ପଦବୀ ପାଇଁ ଦୌଡ଼ରେ ଥିଲେ, କିନ୍ତୁ ଦଳ ମୁଖ୍ୟମନ୍ତ୍ରୀ ପଦ ଚରଣଜିତ ସିଂହ ଚନ୍ନିଙ୍କୁ ଦେଇଥିଲା । ମାତ୍ର 6 ମାସ ପରେ ଅନୁଷ୍ଠିତ ହୋଇଥିବା ନିର୍ବାଚନରେ ଉଭୟ ସିଦ୍ଧୁ ଏବଂ ଚନ୍ନି ନିର୍ବାଚନରେ ହାରିଗଲେ ଏବଂ ଆମ୍ ଆଦମୀ ପାର୍ଟି ରାଜ୍ୟରେ ବିପୁଳ ବିଜୟ ଲାଭ କଲା । ଅମରିନ୍ଦ ସିଂହ କଂଗ୍ରେସ ଛାଡି ବିଜେପିରେ ଯୋଗ ଦେଇଛନ୍ତି । ନିର୍ବାଚନରେ କଂଗ୍ରେସର ଅବସ୍ଥା ଏପରି ଥିଲା ଯେ ନିଜର ଶାସନ ଥିବା ରାଜ୍ୟରେ ଏହାକୁ ମାତ୍ର 18 ଟି ଆସନ ମିଳିଥିଲା ।
କ୍ଷମତାରୁ ଗଲା ଆସାମ
ଆସାମରେ ମଧ୍ୟ ମୁଖ୍ୟମନ୍ତ୍ରୀ ପଦ ପାଇଁ କଂଗ୍ରେସ ଏକ ବଡ଼ ବିଫଳତାର ସମ୍ମୁଖୀନ ହୋଇଥିଲା । ଏଠାରେ ଦଳ ତରୁଣ ଗୋଗୋଇ ଏବଂ ହିମନ୍ତ ବିଶ୍ୱ ଶର୍ମାଙ୍କ ମଧ୍ୟରେ ବିବାଦକୁ ସମ୍ଭାଳି ପାରିଲା ନାହିଁ ଏବଂ ରାଜ୍ୟର କ୍ଷମତା ହାତରୁ ଚାଲିଗଲା । ଦଳ ହିମନ୍ତ ବିଶ୍ୱ ଶର୍ମାଙ୍କୁ ଅଲଗା କରିଥିଲା, ଫଳସ୍ୱରୂପ ହିମନ୍ତ କଂଗ୍ରେସ ଛାଡି ବିଜେପିରେ ଯୋଗ ଦେଇଥିଲେ । ସେ ଏହି ସମୟରେ କହିଥିଲେ ଯେ ରାହୁଲ ଗାନ୍ଧୀ ତାଙ୍କ କୁକୁରମାନଙ୍କ ପ୍ରତି ଅଧିକ ଧ୍ୟାନ ଦିଅନ୍ତି । ଏହା ପରେ ହିମନ୍ତ ବିଜେପିରେ ଯୋଗ ଦେଇ ଜଣେ ଶକ୍ତିଶାଳୀ ନେତା ଭାବରେ ଉଭା ହୋଇଥିଲେ, ବର୍ତ୍ତମାନ ସେ ରାଜ୍ୟର ମୁଖ୍ୟମନ୍ତ୍ରୀ ଅଟନ୍ତି ।
ବିଜେପି ଠାରୁ ଶିକ୍ଷା
ଗୋଟିଏ ପଟେ ଯେଉଁଠାରେ କଂଗ୍ରେସ ମୁଖ୍ୟମନ୍ତ୍ରୀଙ୍କୁ ବଦଳାଇବା ଏତେ କଷ୍ଟସାଧ୍ୟ ହୋଇପଡିଥିଲା, ଭାରତୀୟ ଜନତା ପାର୍ଟି ଏହି କାର୍ଯ୍ୟକୁ ଅତି ସହଜରେ କରିବାରେ ସଫଳ ହେଉଛି । ଉତ୍ତରାଖଣ୍ଡରେ ଦଳ ଦୁଇଥର ମୁଖ୍ୟମନ୍ତ୍ରୀଙ୍କୁ ବଦଳାଇଥିଲା, ଗୁଜୁରାଟରେ କେବଳ ମୁଖ୍ୟମନ୍ତ୍ରୀ ନୁହଁନ୍ତି ସମଗ୍ର କ୍ୟାବିନେଟରେ ପରିବର୍ତ୍ତନ କରାଯାଇଥିଲା କିନ୍ତୁ କୌଣସି ପ୍ରକାରର ବିଦ୍ରୋହ ହୋଇ ନଥିଲା । ଏଭଳି ପରିସ୍ଥିତିରେ ଭାରତୀୟ ଜନତା ପାର୍ଟି ନିଶ୍ଚିତ ଭାବରେ କଂଗ୍ରେସ ପାଇଁ ଏକ ବଡ଼ ଶିକ୍ଷା ଅଟେ ବୋଲି କୁହାଯାଉଛି ।
Click it and Unblock the Notifications
Sign in with Google