ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ହେଲା ସଂସଦ, ଜାଣନ୍ତୁ ଏହି ଅଧିବେଶନରେ କେତେ ଦିନ କେଉଁ ପ୍ରସଙ୍ଗରେ ହୋଇଛି ଆଲୋଚନା
ନୂଆଦିଲ୍ଲୀ : ଚଳିତ ବର୍ଷ ବଜେଟ୍ ଅଧିବେଶନର ଦ୍ୱିତୀୟ ପର୍ଯ୍ୟୟ ଲଗାତାର ହଙ୍ଗାମା ମଧ୍ୟରେ ଶେଷ ହୋଇଛି । ଅଶାନ୍ତ ବଜେଟ୍ ଅଧିବେଶନ ମଧ୍ୟରେ ସଂସଦର ଉଭୟ ଗୃହ, ଲୋକସଭା ଏବଂ ରାଜ୍ୟସଭାର ପ୍ରକ୍ରିୟା ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ରଖାଯାଇଛି । ସଂସଦୀୟ ବ୍ୟାପାର ମନ୍ତ୍ରୀ ଅର୍ଜୁନ ରାମ ମେଘୱାଲଙ୍କ ଅନୁଯାୟୀ, ଦ୍ୱିତୀୟ ପର୍ଯ୍ୟାୟରେ ଲୋକସଭା 34% ଏବଂ ରାଜ୍ୟସଭା 24.4% କାର୍ଯ୍ୟ ରେକର୍ଡ କରିଛି । ଆପଣଙ୍କୁ କହି ରଖୁଛୁ ସଂସଦର ବଜେଟ୍ ଅଧିବେଶନର ଦ୍ୱିତୀୟ ଭାଗର ପ୍ରକ୍ରିୟା 13 ମାର୍ଚ୍ଚରୁ ଆରମ୍ଭ ହୋଇଥିଲା ।
ଲୋକସଭା ବାଚସ୍ପତି ଓମ ବିର୍ଲା କହିଛନ୍ତି ଯେ 17 ତମ ଲୋକସଭାର 11 ତମ ଅଧିବେଶନ 31 ଜାନୁୟାରୀରୁ ଆରମ୍ଭ ହୋଇଥିଲା । ରାଷ୍ଟ୍ରପତି ସଂସଦର ଉଭୟ ଗୃହର ମିଳିତ ବୈଠକକୁ ସମ୍ବୋଧିତ କରିବା ପରେ ଅଧିବେଶନ ଆରମ୍ଭ ହୋଇଥିଲା । ଏହା ଉପରେ ଆଲୋଚନା 13 ଘଣ୍ଟା 44 ମିନିଟ୍ ପର୍ଯ୍ୟନ୍ତ ଚାଲିଥିଲା । ଏଥି ସହିତ, ଏହି ଅଧିବେଶନରେ ଲୋକସଭା ପ୍ରାୟ 45 ଘଣ୍ଟା 55 ମିନିଟ୍ କାର୍ଯ୍ୟ କରିଥିଲା ।
ଲୋକସଭା ବାଚସ୍ପତି ସୂଚନା ଦେଇଛନ୍ତି ଯେ ଅର୍ଥମନ୍ତ୍ରୀ ଫେବୃଆରୀ 1 ରେ 2023-24 ବର୍ଷ ପାଇଁ ବଜେଟ୍ ଉପସ୍ଥାପନ କରିଛନ୍ତି । ଗୃହରେ 14 ଘଣ୍ଟା 45 ମିନିଟ୍ ଆଲୋଚନା କରାଯାଇଥିଲା ଏବଂ ଅର୍ଥମନ୍ତ୍ରୀ ନିର୍ମଳା ସୀତାରମଣ ଏହାର ଉତ୍ତର ଦେଇଥିଲେ । ସେ ସୂଚନା ଦେଇଛନ୍ତି ଯେ ଗୃହ ଅନୁଦାନର ଡିମାଣ୍ଡ ଏବଂ ଆନୁସଙ୍ଗିକ ଆପ୍ରୋପ୍ରାଇଜେସନ୍ ବିଲ୍ ଅନୁମୋଦନ କରିଛି । ଆଠଟି ବିଲ୍ ପୁନଃସ୍ଥାପିତ ହେଲା ଏବଂ ଅଧିବେଶନରେ ପାଞ୍ଚଟି ବିଲ୍ ପାରିତ ହେଲା । ଅଧିବେଶନ ସମୟରେ, 29 ପ୍ରଶ୍ନର ଉତ୍ତର ଦିଆଯାଇଥିଲା ଏବଂ ଜନସାଧାରଣଙ୍କ ଗୁରୁତ୍ୱପୂର୍ଣ୍ଣ 133 ବିଷୟ ଉଠିଥିଲା । ଷ୍ଟାଣ୍ଡିଂ କମିଟିର 62 ଟି ରିପୋର୍ଟ ଉପସ୍ଥାପିତ ହୋଇଛି ।
ରାଜ୍ୟସଭାରେ 130 ଘଣ୍ଟା ଧାର୍ଯ୍ୟ ସମୟରୁ ମାତ୍ର 31 ଘଣ୍ଟାରୁ ସାମାନ୍ୟ ଅଧିକ ସମୟ କାର୍ଯ୍ୟ ହୋଇଛି । PRS ଲେଜିସଲେଟିଭ୍ ରିସର୍ଚ୍ଚ ଅନୁଯାୟୀ, ଲୋକସଭା ନିର୍ଦ୍ଧାରିତ ସମୟର 34.28 ପ୍ରତିଶତ ସମୟ କାର୍ଯ୍ୟ ହୋଇଛି । ରାଜ୍ୟସଭାରେ 24 ପ୍ରତିଶତ ସମୟ କାର୍ଯ୍ୟ ହୋଇଛି । ସମଗ୍ର ବଜେଟ୍ ଅଧିବେଶନରେ ଲୋକସଭାରେ ମାତ୍ର 4.32 ଘଣ୍ଟା ପ୍ରଶ୍ନକାଳ ଚାଲିଥିବାବେଳେ ରାଜ୍ୟସଭାରେ ଏହା ମାତ୍ର 1.85 ଘଣ୍ଟା ଥିଲା ।
ଆଦାନୀ ଗ୍ରୁପ ଉପରେ ହିଣ୍ଡେନବର୍ଗ ରିପୋର୍ଟ ଆସିବା ପରେ କଂଗ୍ରେସ ସାଂସଦ ରାହୁଲ ଗାନ୍ଧୀ ଆଦାନୀ ଗ୍ରୁପକୁ ସରକାର ସହଯୋଗ କରୁଥିବା ଅଭିଯୋଗ କରିଥିଲେ । ଏହା ପରେ ବିରୋଧୀ ସଂସଦରେ ଏହି ପ୍ରସଙ୍ଗ ଉଠାଇ ଏହାର ଯାଞ୍ଚ ଦାବି କରିବା ସହ ଜେପିସି ଦାବି କରିଥିଲେ । ଅପରପକ୍ଷରେ ଶାସକ ଦଳ ମଧ୍ୟ ରାହୁଲ ଗାନ୍ଧୀ ବିଦେଶରେ ଦେଇଥିବା ଭାଷଣ ଉପରେ କ୍ଷମା ଦାବି କରି ଗୃହରେ ହଙ୍ଗାମା କରିଥିଲେ । ଉଭୟ ଶାସକ ଓ ବିରୋଧୀଙ୍କ ହଙ୍ଗାମା ମଧ୍ୟରେ ଆଜି ଗୃହ ଅନିର୍ଦ୍ଦିଷ୍ଟ କାଳ ପାଇଁ ମୁଳତବୀ ଘୋଷଣା ହୋଇଛି ।
Click it and Unblock the Notifications
Sign in with Google