ତିନି ରାଜ୍ୟ ବିଜୟ ପରେ ବିଜେପି ଫୋକସରେ ଓଡ଼ିଶା, ରାଜ୍ୟ ସଭାପତିଙ୍କୁ ଗୁରୁ ଦାୟିତ୍ୱ

Published: Saturday, December 9, 2023, 12:56 [IST]

ଭୁବନେଶ୍ୱର: ତିନି ରାଜ୍ୟ ଛତିଶଗଡ଼, ମଧ୍ୟପ୍ରଦେଶ ଓ ରାଜସ୍ଥାନରେ ବିଜେପିର ବିପୁଳ ବିଜୟ ପରେ ଉତ୍ସାହିତ ରହିଛି ରାଜ୍ୟ ବିଜେପି । ଏହା ପରେ ଓଡ଼ିଶା ଉପରେ ପୋକସ୍ କରୁଛି ବିଜେପି । ଆଗାମୀ ଲୋକସଭା ଓ ବିଧାନସଭା ନିର୍ବାଚନରେ ଓଡ଼ିଶାରେ ଏହି ସଫଳତା ପୁଣି ଦୋହରାଇବାକୁ ଲକ୍ଷ୍ୟ ରଖିଛି ବିଜେପି । ଏ ନେଇ ରାଜ୍ୟ ସଭାପତି ମନମୋହନ ସାମଲଙ୍କୁ ମିଳିଛି ଗୁରୁ ଦାୟିତ୍ୱ ।

କେନ୍ଦ୍ରୀୟ ନେତୃତ୍ୱ ଓଡିଶାରେ ରଣନୀତି ନେଇ ରାଜ୍ୟ ସଭାପତିଙ୍କୁ ଡକାଇ ଆଲୋଚନା କରିଛନ୍ତି । ଦିଲ୍ଲୀରେ କେନ୍ଦ୍ରୀୟ ନେତୃତ୍ଵଙ୍କୁ ଭେଟିବା ପରେ ବିଜେପି ରାଜ୍ୟ ସଭାପତି ମନମୋହନ ସାମଲ କହିଛନ୍ତି ଯେ, କେନ୍ଦ୍ରୀୟ ନେତୃତ୍ଵଙ୍କ ସହ ବିଭିନ୍ନ ପ୍ରସଙ୍ଗରେ ଆଲୋଚନା ହୋଇଛି । ପୁଣି ଦିଲ୍ଲୀ ଗସ୍ତରେ ଯାଇ କେନ୍ଦ୍ରୀୟ ନେତୃତ୍ଵଙ୍କୁ ଭେଟିବେ ବୋଲି ସୂଚନା ଦେଇଛନ୍ତି ମନମୋହନ ।

ଗାଁକୁ ଯାଇ ତୃଣମୂଳ ସ୍ତରରେ ସଂଗଠନ ସୁଦୃଢ କରାଯିବ । ପଞ୍ଚାୟତ ସ୍ତରକୁ ଯାଇ ସଂଗଠନ ଦୃଢ କରିବାକୁ ନିର୍ଦ୍ଦେଶ ଦିଆଯାଇଛି ବୋଲି ମନମୋହନ କହିଛନ୍ତି । ସେ ଆହୁରି କହିଛନ୍ତି, ବିଜେପି ଏଯାଏଁ 12 ଶହ ପାଖାପାଖି ପଞ୍ଚାୟତ ଗସ୍ତ ସରିଲାଣି । ବାକି 5000 ପଞ୍ଚାୟତଗୁଡ଼ିକୁ ଶୀଘ୍ର ଗସ୍ତ କରିବେ ସାଂସଦ, ବିଧାୟକ, ପଦାଧିକାରୀ ଏବଂ କାର୍ଯ୍ୟକର୍ତ୍ତା । ଶୀର୍ଷ ନେତୃତ୍ଵଙ୍କ ଠାରୁ ଆରମ୍ଭ କରି ସାଧାରଣ କାର୍ଯ୍ୟକର୍ତ୍ତା ପର୍ଯ୍ୟନ୍ତ ପଞ୍ଚାୟତ ଗସ୍ତରେ ଯିବେ । ତୃଣମୂଳ ସଙ୍ଗଠନ ସୁଦୃଢ଼ କରିବା ପାଇଁ ନିର୍ଦ୍ଦେଶ ଦେଇଛନ୍ତି କେନ୍ଦ୍ରୀୟ ନେତୃତ୍ୱ । ଲୋକେ ଚାହୁଁଛନ୍ତି ଓଡିଶାରେ ବିଜେପି ସରକାର ହେଉ, ଡବଲ ଇଂଜିନର ସରକାର ଲୋକେ ଚାହୁଁଛନ୍ତି ବୋଲି କହିଛନ୍ତି ରାଜ୍ୟ ବିଜେପି ସଭାପତି ।

ଉଲ୍ଲେଖଯୋଗ୍ୟ, 2009 ରୁ ମେଣ୍ଟ ଭାଙ୍ଗିବା ପରେ ବିଜେଡ଼ି ଆଜି ଯାଏଁ କ୍ଷମତାରେ ରହିଆସୁଛି । ଏପରିକି ବିଜେପି ଶାସକ ଦଳର ପାଖ ମାଡ଼ିପାରୁନାହିଁ । ବିଜେପି ପାଇଁ ସବୁଠୁ ବଡ଼ ଆହ୍ୱାନ ପାଲଟିଛି ଶାସକ ବିଜୁ ଜନତା ଦଳ । ଅବଶ୍ୟ 2014 ରେ ମୋଦୀ ସରକାର ଆସିବା ପର ଠାରୁ ରାଜ୍ୟ ବିଜେପିର ମନୋବଳ ଟିକେ ଟାଣ ହୋଇଛି । କିନ୍ତୁ ରାଜ୍ୟରେ ସେତେଟା ପ୍ରଭାବ ଦେଖିବାକୁ ମିଳୁନାହିଁ । ତେବେ ମନମୋହନ ରାଜ୍ୟ ବିଜେପି ମଙ୍ଗ ଧରିବା ସହ ତିନି ରାଜ୍ୟର ଫଳାଫଳକୁ ନେଇ ଉତ୍ସାହିତ ଥିବା ବିଜେପି ଆଗକୁ ରାଜ୍ୟବାସୀଙ୍କ ମନ ଜିଣିବାରେ କେତେ ସଫଳ ହେଉଛି ତାହା ଦେଖିବା ବାକି ରହିଲା ।

Published On December 9, 2023