ଆଜି ସନ୍ଧ୍ୟାରେ ଉପରାଷ୍ଟ୍ରପତି ପ୍ରାର୍ଥୀ ଘୋଷଣା କରିପାରେ ବିଜେପି

ଭାରତୀୟ ଜନତା ପାର୍ଟି ଆଜି ସନ୍ଧ୍ୟାରେ ଉପରାଷ୍ଟ୍ରପତି ପଦ ପାଇଁ ପ୍ରାର୍ଥୀ ଘୋଷଣା କରିପାରେ । ଦେଶର ଉପରାଷ୍ଟ୍ରପତି ପଦ ପାଇଁ ନିର୍ବାଚନ ଅଗଷ୍ଟ 6 ରେ ଅନୁଷ୍ଠିତ ହେବ ।

Updated: Saturday, July 16, 2022, 13:04 [IST]

ନୂଆଦିଲ୍ଲୀ : ଭାରତୀୟ ଜନତା ପାର୍ଟି ଆଜି ସନ୍ଧ୍ୟାରେ ଉପରାଷ୍ଟ୍ରପତି ପଦ ପାଇଁ ପ୍ରାର୍ଥୀ ଘୋଷଣା କରିପାରେ । ଦେଶର ଉପରାଷ୍ଟ୍ରପତି ପଦ ପାଇଁ ନିର୍ବାଚନ ଅଗଷ୍ଟ 6 ରେ ଅନୁଷ୍ଠିତ ହେବ । ଜୁନ୍ 29 ରେ ଏ ସମ୍ପର୍କରେ ସୂଚନା ପ୍ରଦାନ କରି ନିର୍ବାଚନ ଆୟୋଗ କହିଛନ୍ତି ଯେ ଉପରାଷ୍ଟ୍ରପତି ପଦ ପାଇଁ ନାମାଙ୍କନ ଜୁଲାଇ 19 ପର୍ଯ୍ୟନ୍ତ କରାଯାଇପାରିବ ।

ଶନିବାର ଦିନ ହେବାକୁ ଥିବା ସଂସଦୀୟ ବୈଠକରେ ବିଜେପି ଉପରାଷ୍ଟ୍ରପତି ପଦ ପାଇଁ ପ୍ରାର୍ଥୀ ଚୂଡ଼ାନ୍ତ କରିବାର ସମ୍ଭାବନା ରହିଛି ବୋଲି ସୂତ୍ରରୁ ପ୍ରକାଶ ପାଇଛି । ଏହାର ସଂସଦୀୟ ବୋର୍ଡରେ ଦଳର ସଭାପତି ଜେ ପି ନଡ୍ଡା ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଛନ୍ତି ।

ସୂତ୍ରରୁ ପ୍ରକାଶ ଯେ ଶାସକ ଏନଡିଏ ମିଳିତ ମଞ୍ଚର ଅଗ୍ରଣୀ ଅଂଶୀଦାର ବିଜେପି ମଧ୍ୟ ଏହାର ସହଯୋଗୀଙ୍କ ନିକଟେରେ ପ୍ରାର୍ଥୀ ନାମ ନେଇ ଆଲୋଚନା କରିବ ।

ଚର୍ଚ୍ଚାରେ ରହିଛି ଏମାନଙ୍କ ନାମ

ରାଷ୍ଟ୍ରପତି ନିର୍ବାଚନରେ ଏକପାଖିଆ ବାତାବରଣ ସୃଷ୍ଟି କରିଥିବା ବିଜେପି ବର୍ତ୍ତମାନ ଉପରାଷ୍ଟ୍ରପତି ନିର୍ବାଚନରେ ମଧ୍ୟ ପ୍ରାର୍ଥୀ ଜିତିବା ସହଜ ବୋଲି ବିବେଚନା କରାଯାଉଛି । ଯେଉଁ ପ୍ରାର୍ଥୀଙ୍କ ନାମ ବିଜେପି ଆଲୋଚନା କରୁଛି ସେମାନଙ୍କ ମଧ୍ୟରେ ପୂର୍ବତନ କେନ୍ଦ୍ର ମନ୍ତ୍ରୀ ମୁଖତାର୍ ଅବ୍ବାସ ନକଭିଙ୍କ ନାମ ଆଗରେ ରହିଛି । ନିକଟରେ ମୁଖତାର ଅବ୍ବାସ ନକଭି କେନ୍ଦ୍ର କ୍ୟାବିନେଟରୁ ଇସ୍ତଫା ଦେବା ପରେ ତାଙ୍କ ନାମକୁ ନେଇ ଚର୍ଚ୍ଚା ଜୋର ଧରିଛି । ରାଜ୍ୟସଭା କାର୍ଯ୍ୟକାଳ ଶେଷ ହେବାର ଗୋଟିଏ ଦିନ ପୂର୍ବରୁ ନକଭି କେନ୍ଦ୍ର କ୍ୟାବିନେଟରୁ ଇସ୍ତଫା ଦେଇଥିଲେ ।

ନକଭିଙ୍କ ବ୍ୟତୀତ ଉପରାଷ୍ଟ୍ରପତି ପଦ ପାଇଁ ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂହ, କେରଳ ରାଜ୍ୟପାଳ ଆରିଫ ମହମ୍ମଦ ଖାନଙ୍କ ନାମ ମଧ୍ୟ ଚର୍ଚ୍ଚାରେ ଅଛି । ଏହା ବ୍ୟତୀତ ପୂର୍ବତନ କେନ୍ଦ୍ର ମନ୍ତ୍ରୀ ତଥା ପୂର୍ବତନ ରାଜ୍ୟପାଳ ନଜମା ହେପତୁଲ୍ଲାଙ୍କ ନାମ ଉପରେ ମଧ୍ୟ କଳ୍ପନାଜଳପନା କରାଯାଉଛି । ତେବେ ରାଷ୍ଟ୍ରପତି ପଦ ପାଇଁ ଜଣେ ମହିଳା ଦ୍ରୌପଦୀ ମୁର୍ମୁଙ୍କୁ ପ୍ରାର୍ଥୀ କରିବା ପରେ ଉପରାଷ୍ଟ୍ରପତି ପଦ ପାଇଁ ଅନ୍ୟ ଜଣେ ମହିଳାଙ୍କ ନାମ ଉପରେ କୌଣସି ଆଶା ନାହିଁ ।