ସଙ୍କଟରେ ଜେଡିୟୁ - ବିଜେପି ଗଠବନ୍ଧନ ! 11 ପୂର୍ବରୁ ଭାଙ୍ଗିପାରେ ବିହାର ସରକାର

ନୀତିଶ, ଆରଜେଡି ଏବଂ କଂଗ୍ରେସ ସହ ମିଶି ସରକାର ଗଠନ କରିପାରନ୍ତି ବୋଲି ମଧ୍ୟ ରାଜନୈତିକ କରିଡ଼ରରେ ଆଲୋଚନା ଚାଲିଛି । ଏଥି ମଧ୍ୟରେ କୁହାଯାଉଛି ଆସନ୍ତା 11 ଅଗଷ୍ଟରେ ବିହାରର ଜେଡିୟୁ-ବିଜେପି ସରକାର ଭାଙ୍ଗି ଯାଇପାରେ ।

ପାଟନା : ମହାରାଷ୍ଟ୍ରରେ ବିଜେପି ଉଦ୍ଦବ ଗୋଷ୍ଠୀଙ୍କୁ ଝଟକା ଦେବା ପରେ ବର୍ତ୍ତମାନ ବିହାରରେ ନିଜେ ଅଡ଼ୁଆରେ ପଡ଼ିପାରେ । ବିହାରରେ ଚାଲିଥିବା ରାଜନୈତିକ ସଙ୍କଟ ମଧ୍ୟରେ ଜେଡିୟୁ ଏନଡିଏରୁ ବାହାରିପାରେ ବୋଲି ଚର୍ଚ୍ଚା ଜୋର୍ ଧରିଛି । ଏପରିକି ବିଜେପି ଛାଡ଼ି ନୀତିଶ, ଆରଜେଡି ଏବଂ କଂଗ୍ରେସ ସହ ମିଶି ସରକାର ଗଠନ କରିପାରନ୍ତି ବୋଲି ମଧ୍ୟ ରାଜନୈତିକ କରିଡ଼ରରେ ଆଲୋଚନା ଚାଲିଛି । ଏଥି ମଧ୍ୟରେ କୁହାଯାଉଛି ଆସନ୍ତା 11 ଅଗଷ୍ଟରେ ବିହାରର ଜେଡିୟୁ-ବିଜେପି ସରକାର ଭାଙ୍ଗି ଯାଇପାରେ ।

ଜେଡି (ୟୁ) ରାଷ୍ଟ୍ରୀୟ ଅଧ୍ୟକ୍ଷ ରାଜୀବ ରଂଜନ ସିଂହ ଓରଫ୍ ଲଲନ ସିଂହ ସ୍ପଷ୍ଟ ଭାବରେ କହିଛନ୍ତି ଯେ ଆଗାମୀ ସମ୍ପ୍ରସାରଣ ସମୟରେ ତାଙ୍କ ଦଳ କେନ୍ଦ୍ର କ୍ୟାବିନେଟରେ ସାମିଲ ନ ହେବାକୁ ନିଷ୍ପତ୍ତି ନେଇଛନ୍ତି । ଲଲନ କହିଛନ୍ତି ଯେ ଆମେ 2019 ର ଦଳର ମତରେ ଦୃଢ ଅଛୁ, ଯେତେବେଳେ ଆମେ ଲୋକସଭା ନିର୍ବାଚନ ପରେ କେନ୍ଦ୍ର ସରକାରରେ ଯୋଗଦେବାକୁ ନିଷ୍ପତ୍ତି ନେଲୁ, ଏଭଳି ପରିସ୍ଥିତିରେ ଏନଡିଏ ଏବଂ ଜେଡିୟୁ ଅଲଗା ହଇପାରନ୍ତି ବୋଲି ମଧ୍ୟ କଳ୍ପନାଜଳ୍ପନା ଚାଲିଥିଲା ।

ମିଡିଆ ରିପୋର୍ଟ ଅନୁଯାୟୀ, ଲଲନ ସିଂହ ଚିରାଗ ମଡେଲ ବିଷୟରେ ମଧ୍ୟ କହିଛନ୍ତି । ବିଜେପିର ନାମ ନ ନେଇ ସେ କହିଛନ୍ତି ଯେ ଚିରାଗ ପାସୱାନଙ୍କ ପରି ଆରସିପି ସିଂହଙ୍କୁ ପ୍ରସ୍ତୁତ କରାଯାଉଛି । ସେ କହିଛନ୍ତି ଯେ ନୀତୀଶଙ୍କ ଭାବମୂର୍ତ୍ତିକୁ ନଷ୍ଟ କରିବା ପାଇଁ ଏକ ଷଡଯନ୍ତ୍ର କରାଯାଉଛି । ସିଏମ ନୀତୀଶ କୁମାରଙ୍କ ବିରୋଧରେ ଷଡଯନ୍ତ୍ର ହୋଇଥିଲା ତେଣୁ ବିଧାନସଭା ନିର୍ବାଚନରେ ଜେଡିୟୁ ମାତ୍ର 43 ଟି ଆସନ ଜିତିପାରିଲା, କିନ୍ତୁ ବର୍ତ୍ତମାନ ଆମେ ସତର୍କ ।
ଜେଡିୟୁ ସଭାପତି ଲଲନ ସିଂହଙ୍କ ଅନୁଯାୟୀ, 2020 ନିର୍ବାଚନରେ ଚିରାଗ ପାସୱାନଙ୍କ ନାମରେ ଗୋଟିଏ ମଡେଲ ଦେଖାଦେଇଥିଲା, ଅନ୍ୟଟି ଏବେ ପ୍ରସ୍ତୁତ ହେଉଛି । ଆରସିପି ସିଂହ ଉପରେ ଲଲନ ସିଂହ କହିଛନ୍ତି ଯେ ଜେଡିୟୁ ବୁଡ଼ି ଯାଉଥିବା ଜାହାଜ ନୁହେଁ, ଏହା ଏକ ଭାସମାନ ଜାହାଜ । କିଛି ଲୋକ ଏହାର କ୍ଷତି କରିବାକୁ ଚେଷ୍ଟା କରୁଛନ୍ତି, ଯେଉଁମାନେ ଜେଡିୟୁକୁ କ୍ଷତି ପହଞ୍ଚାଇବାକୁ ଚେଷ୍ଟା କରୁଛନ୍ତି ନୀତୀଶ କୁମାର ସେମାନଙ୍କୁ ଚିହ୍ନଟ କରିଛନ୍ତି । ପରିସ୍ଥିତିକୁ ସୁଧାରିବା ପାଇଁ ସେ ପଦକ୍ଷେପ ନେଇଛନ୍ତି ।

ଏହାପୂର୍ବରୁ ବରିଷ୍ଠ ଜେଡି (ୟୁ) ନେତା ତଥା ବିହାର ଶିକ୍ଷା ମନ୍ତ୍ରୀ ବିଜୟ କୁମାର ଚୌଧୁରୀ କହିଛନ୍ତି ଯେ ତାଙ୍କ ଦଳ ମୋଦୀ କ୍ୟାବିନେଟରେ ଯୋଗଦେବାକୁ ଯାଉନାହାଁନ୍ତି । ସେ କହିଛନ୍ତି ଯେ ଜେଡି (ୟୁ) କୁ ବିଜେପି ତରଫରୁ ଆବଶ୍ୟକ ସମ୍ମାନ ମିଳିନାହିଁ । ତେଣୁ ଆମେ ମୋଦୀ ସରକାରରେ ଯୋଗ ନଦେବାକୁ ନିଷ୍ପତ୍ତି ନେଇଛୁ ।

ଗତବର୍ଷ କେନ୍ଦ୍ର କ୍ୟାବିନେଟରେ ସାମିଲ ହୋଇଥିବା ଜେଡିୟୁ ସାଂସଦ ଆରସିପି ସିଂଙ୍କୁ ନେଇ ବିଜେପି ଏବଂ ଜେଡିୟୁ ମଧ୍ୟରେ ବିବାଦ ସୃଷ୍ଟି ହୋଇଥିଲା । ନୀତିଶଙ୍କ ଅଜଣାତରେ ଆରସିପି ସିଂହଙ୍କୁ କେନ୍ଦ୍ର କ୍ୟାବିନେଟରେ ସାମିଲ କରାଯାଇଥିଲା । ଫଳରେ ଏଥର ରାଜ୍ୟସଭାରେ ଆରସିପି ସିଂହଙ୍କ କାର୍ଯ୍ୟକାଳ ବଢ଼ାଇ ନଥିଲା ଜେଡିୟୁ । ଶନିବାର ସେ ଜେଡିୟୁରୁ ଇସ୍ତଫା ଦେଇଥିଲେ ।

ଅଧିକାଂଶ ଜେଡିୟୁ ବିଧାୟକ ମଧ୍ୟବର୍ତ୍ତୀକାଳୀନ ନିର୍ବାଚନ ସପକ୍ଷରେ ନାହାଁନ୍ତି, ତେଣୁ ଅନୁମାନ କରାଯାଇପାରେ ଯେ ଜେଡିୟୁ, ଆରଜେଡି ଏବଂ କଂଗ୍ରେସ ସହ ମେଣ୍ଟ କରି ରାଜ୍ୟରେ ସରକାର ଗଠନ କରିପାରେ । ସୂଚନାଯୋଗ୍ୟ ଯେ ଗତ ମାସର 17 ତାରିଖ ଦିନ ମଧ୍ୟ ନୀତୀଶ କୁମାର ଗୃହମନ୍ତ୍ରୀ ଅମିତ ଶାହାଙ୍କ ଦ୍ୱାରା ଡକାଯାଇଥିବା ରାଜ୍ୟ ମୁଖ୍ୟମନ୍ତ୍ରୀଙ୍କ ବୈଠକରେ ଅଂଶଗ୍ରହଣ କରିନଥିଲେ । ଏହା ପରେ ନୀତୀଶ କୁମାର 22 ଜୁଲାଇରେ ରାମନାଥ କୋବିନ୍ଦଙ୍କ ବିଦାୟ ସମାରୋହରେ ଯୋଗ ଦେଇନଥିଲେ । ଜୁଲାଇ 22 ରେ ଏନଡିଏର ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କ ଶପଥ ଗ୍ରହଣ ସମାରୋହରେ ନୀତୀଶ କୁମାର ମଧ୍ୟ ଯୋଗ ଦେଇନଥିଲେ । ସୂଚନାଯୋଗ୍ୟ ଯେ ନୀତୀଶ କୁମାର ଦ୍ରୌପଦୀ ମୁର୍ମୁଙ୍କୁ ସମର୍ଥନ କରିଥିଲେ, କିନ୍ତୁ ସେ ତାଙ୍କ ଶପଥ ଗ୍ରହଣ ଉତ୍ସବରେ ଯୋଗ ଦେଇନଥିଲେ ।

English summary

Bihar Political Crisis : Split In JDU-BJP Alliance, Govt may collapse before 11th August