ବିହାର ବିଷାକ୍ତ ମଦମୃତ୍ୟୁ ମାମଲାରେ ଶାସକ-ବିରୋଧୀ ମୁହାଁମୁହିଁ, ନୀତୀଶ କୁମାର କହିଲେ - 'ଯିଏ ମଦ ପିଇବ, ସେ ତ ମରିବ'
ବିରୋଧୀଙ୍କ ଅଭିଯୋଗ ମଧ୍ୟରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର କହିଛନ୍ତି ଯେ ବେଆଇନ ମଦ ବିଷୟରେ ଲୋକମାନେ ସଚେତନ ହେବା ଉଚିତ୍ । ବିହାରରେ ମଦ ନିଷେଧ ଏବଂ ଯିଏ ମଦ ପିଇବ, ସେ ତ ମରିବ ।
ପାଟଣା: ବିହାରର ଛପରା ଜିଲ୍ଲାରେ ବିଷାକ୍ତା ମଦମୃତ୍ୟୁକୁ ନେଇ ରାଜନୀତି ତୀବ୍ର ହେବାରେ ଲାଗିଛି । ଏହି ପ୍ରସଙ୍ଗରେ ଶାସକ ବିରୋଧୀ ମୁହାଁମୁହିଁ ହୋଇଛନ୍ତି । ଉଭୟଙ୍କ ମଧ୍ୟରେ ବାକଯୁଦ୍ଧ ଲାଗିରହିଛି । ବିରୋଧୀଙ୍କ ଅଭିଯୋଗ ମଧ୍ୟରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର କହିଛନ୍ତି ଯେ ବେଆଇନ ମଦ ବିଷୟରେ ଲୋକମାନେ ସଚେତନ ହେବା ଉଚିତ୍ । ବିହାରରେ ମଦ ନିଷେଧ ଏବଂ ଯିଏ ମଦ ପିଇବ, ସେ ତ ମରିବ । ଏହାପୂର୍ବରୁ ବେଆଇନ ମଦ ଯୋଗୁଁ ମୃତ୍ୟୁ ମାମଲା ସମ୍ପର୍କରେ ବୁଧବାର ରାଜ୍ୟ ବିଧାନସଭାରେ ଉତ୍ତେଜନା ଦେଖାଦେଇଥିଲା ।
ଗୁରୁବାର ଦିନ ଯେତେବେଳେ ସାମ୍ବାଦିକମାନେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ଛପରା ବିଷାକ୍ତ ମଦ ମୃତ୍ୟୁ ସମ୍ପର୍କରେ ପ୍ରଶ୍ନ ପଚାରିଥିଲେ, ସେ କହିଥିଲେ, 'ଯେତେବେଳେ ବିହାରରେ ମଦ ଉପରେ ନିଷେଧାଦେଶ ନଥିଲା, ଲୋକମାନେ ମଧ୍ୟ ବିଷାକ୍ତ ମଦ ପିଇ ମରୁଥିଲେ । ଅନ୍ୟ ରାଜ୍ୟରେ ମଧ୍ୟ ବିଷାକ୍ତ ମଦ ଯୋଗୁଁ ଲୋକଙ୍କ ମୃତ୍ୟୁ ହେଉଛି । ଲୋକମାନେ ସଚେତନ ହେବା ଉଚିତ୍ । ଯେତେବେଳେ ବିହାରରେ ମଦ ନିଷେଧ, ଯାହା ବିକ୍ରି ହେଉଛି ସେଗୁଡ଼ିକ ବିଷାକ୍ତ ମଦ ଏବଂ ଲୋକମାନେ ଏହାକୁ ପିଇ ମୃତ୍ୟୁମୁଖରେ ପଡ଼ୁଛନ୍ତି । ମଦ ଏକ ଖରାପ ଜିନିଷ ଏବଂ ଏହାକୁ ପିଇବା ଉଚିତ୍ ନୁହେଁ । ଯିଏ ମଦ ପିଇବ ସେ ନିଶ୍ଚିତ ଭାବରେ ମରିବ ।'
ନୀତୀଶ ଆହୁରି କହିଛନ୍ତି, 'ଗତଥର ଯେତେବେଳେ ବିହାରରେ ମଦ୍ୟପାନ ଯୋଗୁଁ ଲୋକଙ୍କ ମୃତ୍ୟୁ ହୋଇଥିଲା, କେହି ଜଣେ କହିଥିଲେ ଯେ ସେମାନଙ୍କୁ କ୍ଷତିପୂରଣ ଦିଆଯାଉ । ଯଦି କେହି ମଦ୍ୟପାନ କରନ୍ତି, ତେବେ ସେ ମରିବେ ଏବଂ ଉଦାହରଣ ଆମ ସାମ୍ନାରେ ଅଛି । ଏହା ଉପରେ ସମବେଦନା ଜଣାଇବା ଉଚିତ୍, ସେହି ଅଞ୍ଚଳ ପରିଦର୍ଶନ କରିବା ଉଚିତ୍ ଏବଂ ମଦ୍ୟପାନ ବିରୋଧରେ ଲୋକଙ୍କୁ ସଚେତନ କରାଯିବା ଉଚିତ୍ । ଗରିବ ଲୋକଙ୍କୁ ଗିରଫ ନକରି ବରଂ ମଦ ତିଆରି କରୁଥିବା ତଥା ବ୍ୟବସାୟରେ ଜଡିତ ଥିବା ଲୋକଙ୍କୁ ଗିରଫ କରିବାକୁ ମୁଁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛି ।
ସେ କହିଛନ୍ତି, 'ମୁଁ ସେମାନଙ୍କର ନୂତନ କାର୍ଯ୍ୟ ଆରମ୍ଭ କରିବା ପାଇଁ ଲୋକଙ୍କୁ ଏକ ଲକ୍ଷ ଟଙ୍କା ଦେବାକୁ ପ୍ରସ୍ତୁତ ଅଛି । ଯଦି ଆବଶ୍ୟକ ହୁଏ, ଆମେ ଏହି ଟଙ୍କା ବ୍ୟବସ୍ଥା କରିବୁ, କିନ୍ତୁ ଲୋକମାନେ ବେଆଇନ ମଦ ବ୍ୟବସାୟରେ ଲିପ୍ତ ରହିବା ଉଚିତ୍ ନୁହେଁ । ବିହାରରେ ମଦ ନିଷେଧ ଅନେକ ଲୋକଙ୍କୁ ଉପକୃତ କରିଛି । ବହୁ ସଂଖ୍ୟକ ଲୋକ ମଦ୍ୟପାନ ଛାଡିଛନ୍ତି ଏବଂ ଏହା ବହୁତ ଭଲ କଥା । ଅନେକ ଲୋକ ଏହି ନିଷ୍ପତ୍ତିକୁ ଆନନ୍ଦରେ ଗ୍ରହଣ କରିଛନ୍ତି । କିନ୍ତୁ, ଏପରି କିଛି ଲୋକ ଅଛନ୍ତି ଯେଉଁମାନେ ଏହି ନିଷ୍ପତ୍ତିରେ ଅସୁବିଧା ଭୋଗୁଛନ୍ତି ଏବଂ ତେଣୁ ସେମାନେ ରାଜ୍ୟରେ ସମସ୍ୟା ସୃଷ୍ଟି କରୁଛନ୍ତି । ମୁଁ ଏପରି ଲୋକଙ୍କୁ ଚିହ୍ନଟ କରି ତୁରନ୍ତ ସେମାନଙ୍କୁ ଗିରଫ କରିବାକୁ ଅଧିକାରୀମାନଙ୍କୁ କହିଛି ।
ଆପଣଙ୍କୁ କହିରଖୁଛୁ ଯେ ବୁଧବାର ଦିନ ଯେତେବେଳେ ବିରୋଧୀମାନେ ବିଧାନସଭାରେ ମଦ ନିଷେଧାଦେଶ ନେଇ ପ୍ରଶ୍ନ ଉଠାଇଥିଲେ ସେତେବେଳେ ମୁଖ୍ୟମନ୍ତ୍ରୀ ନୀତୀଶ କୁମାର ଭାରତୀୟ ଜନତା ପାର୍ଟିର ସଦସ୍ୟଙ୍କ ଉପରେ ବର୍ଷିଥିଲେ । ସେ କହିଥିଲେ ଯେ ଯେତେବେଳେ ଏହି ଲୋକମାନେ ସରକାରଙ୍କ ସହ ଥିଲେ ସେମାନେ ସମର୍ଥନ କରିଥିଲେ । ଆଜି ଯେତେବେଳେ ସେମାନେ ସରକାରଙ୍କ ସହ ନାହାଁନ୍ତି, ସେମାନେ ବିରୋଧ କରୁଛନ୍ତି ।
Click it and Unblock the Notifications
Sign in with Google