ପଞ୍ଜାବ ନିର୍ବାଚନରେ କେଜ୍ରିୱାଲଙ୍କ ବଡ ଘୋଷଣା : କ୍ଷମତାକୁ ଆସିଲେ 24 ଘଣ୍ଟା ବିଦ୍ୟୁତ୍, ବକେୟା ଛାଡ ଏବଂ 300 ୟୁନିଟ୍ ମାଗଣା

ପଞ୍ଜାବରେ ନିର୍ବାଚନରେ ଜିତିବା ପରେ କେଜ୍ରିୱାଲ ପ୍ରତ୍ୟେକ ପଞ୍ଜାବୀଙ୍କୁ 300 ୟୁନିଟ୍ ବିଦ୍ୟୁତ୍ ମାଗଣାରେ ଦେବାକୁ ଘୋଷଣା କରିଛନ୍ତି ।

Updated: Tuesday, June 29, 2021, 20:49 [IST]

ଚଣ୍ଡିଗଡ଼ : ପଞ୍ଜାବରେ ହେବାକୁ ଥିବା ଆସନ୍ତା ବିଧାନସଭା ନିର୍ବାଚନରେ ଆମ୍ ଆଦମୀ ପାର୍ଟି (AAP) ପ୍ରତିଦ୍ୱନ୍ଦ୍ୱିତା କରିବ । ଏନେଇ ଦଳ ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଛି । ଏଥିପାଇଁ ଆଜି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଚଣ୍ଡିଗଡ଼ ଗସ୍ତରେ ଥିଲେ । ଏଠାରେ କେଜ୍ରିୱାଲ ପ୍ରେସ କ୍ଲବରେ ଏକ ସାମ୍ବାଦିକ ସମ୍ମିଳନୀ କରି ସେ ପଞ୍ଜାବରେ ଦିଲ୍ଲୀ ମଡେଲରେ କାମ କରିବା ବିଷୟରେ କହିଥିଲେ । ପଞ୍ଜାବରେ ନିର୍ବାଚନରେ ଜିତିବା ପରେ କେଜ୍ରିୱାଲ ପ୍ରତ୍ୟେକ ପଞ୍ଜାବୀଙ୍କୁ 300 ୟୁନିଟ୍ ବିଦ୍ୟୁତ୍ ମାଗଣାରେ ଦେବାକୁ ଘୋଷଣା କରିଛନ୍ତି । ଏହା ବ୍ୟତୀତ ସେ ପଞ୍ଜାବରେ 24 ଘଣ୍ଟିଆ ବିଦ୍ୟୁତ୍ ଯୋଗାଇଦେବାକୁ ଏବଂ ସମସ୍ତ ପୁରୁଣା ବକେୟା ଘରୋଇ ବିଲ୍ ଛାଡ କରିବାକୁ ମଧ୍ୟ ପ୍ରତିଶୃତି ଦେଇଛନ୍ତି ।

କେଜ୍ରିୱାଲଙ୍କ ପ୍ରମୁଖ ଘୋଷଣା

ଆମ୍ ଆଦମୀ ପାର୍ଟି ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିୱାଲ କହିଛନ୍ତି, "ଯେତେବେଳେ ଆମେ 2013 ରେ ପ୍ରଥମ ଥର ପାଇଁ ଦିଲ୍ଲୀରେ ନିର୍ବାଚନ ପ୍ରତିଦ୍ୱନ୍ଦ୍ୱିତା କରୁଥିଲୁ, ସେତେବେଳେ ଲୋକମାନେ ଭୁଲ୍ ବିଦ୍ୟୁତ ବିଲ ପାଉଥିଲେ । ପଞ୍ଜାବ ଭଳି ବିଦ୍ୟୁତ କମ୍ପାନୀଗୁଡିକ ସହିତ ସରକାର ଏସବୁରେ ସାମିଲ ଥିଲେ । ବର୍ତ୍ତମାନ ଦିଲ୍ଲୀରେ 24 ଘଣ୍ଟା ଖୁବ୍ କମ୍ ଦରରେ ବିଜୁଳି ଉପଲବ୍ଧ । ବର୍ତ୍ତମାନ ଆମକୁ ପଞ୍ଜାବରେ ମଧ୍ୟ ଏପରି କରିବାକୁ ହେବ ।"

କେଜ୍ରିୱାଲ କହିଛନ୍ତି ଯେ ଆମେ ଏଠାରେ ତିନୋଟି ପ୍ରମୁଖ କାର୍ଯ୍ୟ କରିବୁ । ପ୍ରଥମେ, ଆମେ ପ୍ରତ୍ୟେକ ପରିବାରକୁ 300 ୟୁନିଟ୍ ମାଗଣା ବିଦ୍ୟୁତ୍ ଦେବୁ । ଦ୍ୱିତୀୟତଃ ସମସ୍ତ ବକେୟା ଘରୋଇ ବିଦ୍ୟୁତ୍ ବିଲ୍ ଛାଡ କରାଯିବ ଏବଂ ଲୋକଙ୍କ ସଂଯୋଗ ପୁନରୁଦ୍ଧାର ହେବ । ତୃତୀୟ, 24 ଘଣ୍ଟା ବିଦ୍ୟୁତ ସେବା ଯୋଗାଇ ଦିଆଯିବ।

ଦିଲ୍ଲୀ ପରେ ଆମ୍ ଆଦମୀ ପାର୍ଟି ପଞ୍ଜାବରେ ବର୍ତ୍ତମାନ ସବୁଠାରୁ ଶକ୍ତିଶାଳୀ ବୋଲି ବିବେଚନା କରାଯାଏ । ଏଠାରେ ଗତ ବିଧାନସଭା ନିର୍ବାଚନରେ, AAP ଏହାର ଶକ୍ତି ମଧ୍ୟ ପ୍ରଦର୍ଶନ କରିଥିଲା । ପଞ୍ଜାବରେ ଲୋକସଭା ନିର୍ବାଚନରେ ମଧ୍ୟ AAP ଭଲ ପ୍ରଦର୍ଶନ କରିଥିଲା । ଏଥର AAP ର ଜାତୀୟ ସଂଯୋଜକ ଅରବିନ୍ଦ କେଜ୍ରିୱାଲ ଆସନ୍ତା ପଞ୍ଜାବ ବିଧାନସଭା ନିର୍ବାଚନ ପାଇଁ ପ୍ରସ୍ତୁତ ହେଉଛନ୍ତି । ଦିଲ୍ଲୀ ଭଳି AAP ମଧ୍ୟ ପଞ୍ଜାବରେ ସରକାର ଗଠନ କରିବା ନେଇ ସେ ଉଦ୍ୟମ କରୁଛନ୍ତି ।