ଅରୁଣାଚଳ ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ନବାମ୍ ତୁକୀଙ୍କ ବିରୋଧରେ ଆଉ ଏକ ମାମଲା
2005 ମସିହାରେ ହୋଇଥିବା ଏକ ଦୁର୍ନୀତି ମାମଲାରେ କଂଗ୍ରେସ ନେତା ନବାମ ଏବଂ ତାଙ୍କ ସହଯୋଗୀଙ୍କ ବିରୋଧରେ ସିବିଆଇ ମାମଲା ରୁଜୁ କରିଛି ।
ଇଟାନଗର : କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) ଅରୁଣାଚଳ ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ନବାମ୍ ତୁକୀଙ୍କ ବିରୋଧରେ ଏକ ନୂଆ ମାମଲା ପଞ୍ଜିକରଣ କରିଛି । 2005 ମସିହାରେ ହୋଇଥିବା ଏକ ଦୁର୍ନୀତି ମାମଲାରେ କଂଗ୍ରେସ ନେତା ନବାମ ଏବଂ ତାଙ୍କ ସହଯୋଗୀଙ୍କ ବିରୋଧରେ ସିବିଆଇ ମାମଲା ରୁଜୁ କରିଛି । ଗୁରୁବାର ଦିନ ସିବିଆଇ ପକ୍ଷରୁ କୁହାଯାଇଛି ଯେ 2005 ଏବଂ 2006 ମସିହାରେ ନବାମ୍ ତୁକୀ ପୂର୍ତବିଭାଗ(ପିଡବ୍ଲ୍ୟୁଡି)ର ମନ୍ତ୍ରୀ ଥିବା ସମୟରେ ନିର୍ମାଣ କାର୍ଯ୍ୟରେ ଠକେଇ ଅଭିଯୋଗ ହୋଇଥିଲା । ଏନେଇ ମାମଲା ପଞ୍ଜିକୃତ ହୋଇଛି ।
ଚାରି ବର୍ଷ ଧରି ସିବିଆଇ ଏହି ମାମଲାର ଯାଞ୍ଚ କରୁଛି । ଜୁଲାଇ 2019 ରେ, ସିବିଆଇ ନବାମ ତୁକୀ ଏବଂ ତାଙ୍କ ଭାଇଙ୍କ ବିରୋଧରେ ଦୁର୍ନୀତି ମାମଲା ରୁଜୁ କରିଥିଲା । ବର୍ତ୍ତମାନ ଆଉ ଏକ ନୂଆ ମାମଲା ପଞ୍ଜିକୃତ ହୋଇଛି । ସଲ୍ଟ ଲେକ୍ ଅଞ୍ଚଳରେ କେନ୍ଦ୍ରୀୟ ବିଦ୍ୟାଳୟର ପାଚେରୀ ନିର୍ମାଣ ଚୁକ୍ତିରେ ଦୁର୍ନୀତି ନେଇ ସିବିଆଇ ମାମଲା ରୁଜୁ କରିଛି । ଏହି ମାମଲାରେ ନବାମ ତୁକୀ ନିୟମକୁ ଅବମାନନା କରି ସମ୍ପର୍କୀୟଙ୍କୁ ଉପକୃତ କରିଥିବା ଅଭିଯୋଗ ହୋଇଛି । କେନ୍ଦ୍ରୀୟ ବିଦ୍ୟାଳୟ ଏହି ଚୁକ୍ତିନାମା 2005 ରେ ଅରୁଣାଚଳ ପ୍ରଦେଶର PWD ବିଭାଗ ଅଧୀନରେ ଦିଆଯାଇଥିଲା । ନବାମ ତୁକୀ ଏହି ଚୁକ୍ତିନାମା ତାଙ୍କ ଭାଇ ଏବଂ ପରିବାର ସଦସ୍ୟଙ୍କୁ ଦେଇଥିଲେ, ଯାହାର ମୂଲ୍ୟ ପ୍ରାୟ 20 କୋଟି ଥିଲା ।