ବିକଶିତ ଭାରତ ଜିରାମଜି ଯୋଜନା ଅଧୀନରେ କେନ୍ଦ୍ରର ଅବଦାନ ୯୫ ହଜାର କୋଟି ଟଙ୍କାକୁ ବୃଦ୍ଧି

କୃଷି ଓ କୃଷକ କଲ୍ୟାଣ ମନ୍ତ୍ରୀ ଶିବରାଜ ସିଂ ଚୌହାନ କହିଛନ୍ତି, ବିକଶିତ ଭାରତ ଜିରାମଜି ଯୋଜନା ଅଧୀନରେ କେନ୍ଦ୍ରର ଅବଦାନ ୯୫ ହଜାର କୋଟି ଟଙ୍କାକୁ ବୃଦ୍ଧି କରାଯାଇଛି । ମନରେଗା ଯୋଜନା ଅଧୀନରେ ଏହା ୮୬ ହଜାର କୋଟି ଟଙ୍କା ରହିଥିଲା । ଗ୍ରାମୀଣ ନିଯୁକ୍ତି କ୍ଷେତ୍ର ପାଇଁ ସରକାରଙ୍କ ନିରନ୍ତର ପ୍ରୟାସ ଓ ସମର୍ଥନକୁ ଏହା ପ୍ରତିପାଦନ କରୁଛି ବୋଲି ସେ କହିଛନ୍ତି । ଏକ ଇଂରାଜୀ ଦୈନିକ ପତ୍ରିକାରେ ଲେଖା ପ୍ରକାଶ କରି ଶ୍ରୀ ଚୌହାନ କହିଛନ୍ତି, ବିକଶିତ ଭାରତ ଜିରାମଜି ଆଇନ-୨୦୨୫ ନିଶ୍ଚିତ ନିଯୁକ୍ତିକୁ ୧୨୫ ଦିନକୁ ବୃଦ୍ଧି କରିଛି ।

ଏହି ଆଇନ ଅଧୀନରେ କେବଳ କାର୍ଯ୍ୟକାରୀ ସଂସ୍ଥା ଭାବରେ ନୁହେଁ, ବରଂ ପ୍ରତ୍ୟେକ ରାଜ୍ୟ ବିକାଶର ଅଂଶୀଦାର ଭାବେ ସାମିଲ ହେବେ । ବୈଧାନିକ ଢ଼ାଞ୍ଚା ମାଧ୍ୟମରେ ରାଜ୍ୟଗୁଡ଼ିକ ନିଜସ୍ୱ ଯୋଜନାକୁ ପ୍ରସ୍ତୁତ ଏବଂ କାର୍ଯ୍ୟକାରୀ କରିବାକୁ ଏହି ଆଇନରେ ଅଧିକାର ପ୍ରଦାନ କରାଯାଇଛି ବୋଲି ସେ କହିଛନ୍ତି । ଶ୍ରୀ ଚୌହାନ କହିଛନ୍ତି, ମନରେଗା ଯୋଜନା ଅଧୀନରେ ୟୁପିଏ ସରକାର ୨ଲକ୍ଷ ୧୩ ହଜାର କୋଟି ଟଙ୍କା ଖର୍ଚ୍ଚ କରିଥିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ସରକାର ଇତିମଧ୍ୟରେ ୮ ଲକ୍ଷ ୫୩ ହଜାର କୋଟିରୁ ଅଧିକ ଟଙ୍କା ଖର୍ଚ୍ଚ କରିଛନ୍ତି ।

ବଜେଟ ଆବଣ୍ଟନରେ ୨୦୧୩-୧୪ରେ ମନରେଗା ଯୋଜନା ଅଧୀନରେ ୩୩ ହଜାର କୋଟି ଟଙ୍କା ରହିଥିବା ବେଳେ ୨୦୨୪-୨୫ରେ ୮୬ ହଜାର କୋଟି ଟଙ୍କାକୁ ବୃଦ୍ଧି କରାଯାଇଥିଲା । ମହିଳାଙ୍କ ଅଂଶ ଗ୍ରହଣ ୪୮ ପ୍ରତିଶତରୁ ୫୭ ପ୍ରତିଶତକୁ ବୃଦ୍ଧି ପାଇଛି । ୨୦୧୩ ମସିହା ସିଏଜି ରିପୋର୍ଟ ୟୁପିଏ ସରକାର ଅଧୀନରେ ମନରେଗା ଯୋଜନାର ପ୍ରକୃତ ସ୍ଥିତିକୁ ପ୍ରତିଫଳନ କରିଛି ବୋଲି ଶ୍ରୀ ଚୌହାନ କହିଛନ୍ତି । ଏହି ରିପୋର୍ଟରେ ୨୩ଟି ରାଜ୍ୟରେ ୪ ଲକ୍ଷ ୩୩ ହଜାରରୁ ଅଧିକ ନକଲି ଜବ୍‍କାର୍ଡ ବଣ୍ଟନ, ଅନିୟମିତତା କାର୍ଯ୍ୟ, ହିସାବ ବିହୀନ ବ୍ୟୟ ଆଦି ବିଷୟରେ ଉଲ୍ଲେଖ କରାଯାଇଛି ବୋଲି ଶ୍ରୀ ଚୌହାନ କହିଛନ୍ତି ।