କେନ୍ଦ୍ର ବଜେଟ୍ 2023: ହାଲୱା ସମାରୋହ ସହ ବଜେଟର ଉଦଘାଟନ କରିଛନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ

ସାଧାରଣ ବଜେଟ୍ 2023-24 ପାଇଁ ହାଲୱା ସମାରୋହ ଆଜି ଗୁରୁବାର ଦିନ ଆୟୋଜିତ ହୋଇଛି । ଅର୍ଥମନ୍ତ୍ରୀ ନିର୍ମଳା ସୀତାରମଣ ଅର୍ଥ ମନ୍ତ୍ରଣାଳୟର କର୍ମଚାରୀମାନଙ୍କୁ ହାଲୱା ଖାଇବାକୁ ଦେଇ ବଜେଟ୍ ଚୂଡାନ୍ତ ପ୍ରକ୍ରିୟା ଆରମ୍ଭ କରିଥିଲେ ।

Published: Thursday, January 26, 2023, 17:30 [IST]

ନୂଆଦିଲ୍ଲୀ: ସାଧାରଣ ବଜେଟ୍ 2023-24 ପାଇଁ ହାଲୱା ସମାରୋହ ଆଜି ଗୁରୁବାର ଦିନ ଆୟୋଜିତ ହୋଇଛି । ଅର୍ଥମନ୍ତ୍ରୀ ନିର୍ମଳା ସୀତାରମଣ ଅର୍ଥ ମନ୍ତ୍ରଣାଳୟର କର୍ମଚାରୀମାନଙ୍କୁ ହାଲୱା ଖାଇବାକୁ ଦେଇ ବଜେଟ୍ ଚୂଡାନ୍ତ ପ୍ରକ୍ରିୟା ଆରମ୍ଭ କରିଥିଲେ । ଏହି ସମାରୋହରେ ଭାରତ ସରକାରଙ୍କ ଅର୍ଥ ରାଜ୍ୟମନ୍ତ୍ରୀ ଡକ୍ଟର ଭାଗବତ କିଶାନରା୍ଓ ମଧ୍ୟ ଉପସ୍ଥିତ ଥିଲେ । ହାଲୱା ସମାରୋହ ଅର୍ଥ ମନ୍ତ୍ରଣାଳୟର ଏକ ପୁରୁଣା ରୀତିନୀତି, ଯାହା ବଜେଟ୍ ମୁଦ୍ରଣ ପୂର୍ବରୁ ପ୍ରତିବର୍ଷ ପାଳନ କରାଯାଏ ।

ବଜେଟ୍ ଉପସ୍ଥାପନ ପୂର୍ବରୁ ହାଲୱା ସମାରୋହ ଏକ ପୁରାତନ ପରମ୍ପରା । ଏହା ଅନେକ ଦଶନ୍ଧି ଧରି ଚାଲିଆସୁଛି । ଏଥର ହାଲୱା ସମାରୋହ 26 ଜାନୁଆରୀ ଗୁରୁବାର ଦିନ ଅନୁଷ୍ଠିତ ହୋଇଥିଲା । ହାଲୱା ସମାରୋହରେ ଅର୍ଥ ମନ୍ତ୍ରଣାଳୟରେ ହାଲୱା ପ୍ରସ୍ତୁତ କରାଯାଇଥାଏ । ଏହି ହାଲୱାକୁ ଅର୍ଥ ମନ୍ତ୍ରଣାଳୟର କର୍ମଚାରୀମାନଙ୍କ ମଧ୍ୟରେ ବଣ୍ଟାଯାଏ ।

ନର୍ଥ ବ୍ଲକ୍ ଯେଉଁଠାରେ ଅର୍ଥ ମନ୍ତ୍ରଣାଳୟ ଅଛି, ଏହାର ତଳେ ବେସମେଣ୍ଟରେ ବଦଜେଟ୍ ପ୍ରେସ୍ ରହିଛି । ଏହି ବଜେଟ୍ ପ୍ରେସରେ ହାଲୱା ସମାରୋହ ଆୟୋଜିତ ହୋଇଥାଏ । ହାଲୱା ସମାରୋହ ପରେ ବଜେଟର ମୁଦ୍ରଣ ଆରମ୍ଭ ହୁଏ । ହାଲୱା ସମାରୋହ ପରେ ବଜେଟ୍ ପ୍ରସ୍ତୁତିରେ ଜଡିତ ସମସ୍ତ କର୍ମଚାରୀ କେବଳ ଏହି ବେସମେଣ୍ଟରେ ରହିଥା'ନ୍ତି । ଅର୍ଥାତ୍ ଜାନୁଆରୀ 26 ରୁ ଫେବୃଆରୀ 1 ପର୍ଯ୍ୟନ୍ତ ବଜେଟ୍ ସହ ଜଡିତ ସମସ୍ତ ଅଧିକାରୀଙ୍କୁ ଅର୍ଥ ମନ୍ତ୍ରଣାଳୟରେ ରହିବାକୁ ପଡିଥାଏ । ଏପରିକି ସେ ତାଙ୍କ ପରିବାର ସହିତ ଯୋଗାଯୋଗ କରିପାରିବେ ନାହିଁ ।

ଏହି କର୍ମଚାରୀମାନେ ଅର୍ଥମନ୍ତ୍ରୀଙ୍କ ବଜେଟ୍ ଭାଷଣ ପରେ ହିଁ ବାହାରକୁ ଆସନ୍ତି । ବଜେଟ୍ ସମ୍ବନ୍ଧୀୟ କୌଣସି ସୂଚନା ଲିକ୍ ନ ହେବା ନେଇ ଏପରି କରାଯାଇଥାଏ । ମନ୍ତ୍ରଣାଳୟର ଉତ୍ତର ବ୍ଲକରେ ମୋବାଇଲ୍ ନେଟୱାର୍କ ଜାମର ଲଗାଯାଇଛି । ଯଦି କୌଣସି କର୍ମଚାରୀଙ୍କ ଘରେ ଜରୁରୀକାଳୀନ ପରିସ୍ଥିତି ଆସେ, ତାଙ୍କ ପରିବାର ସଦସ୍ୟ ମନ୍ତ୍ରଣାଳୟର ଲ୍ୟାଣ୍ଡଲାଇନ ଫୋନ ସହିତ ଯୋଗାଯୋଗ କରିପାରିବେ । ପରିବାର ସଦସ୍ୟଙ୍କ ସହ ବାର୍ତ୍ତାଳାପ ମଧ୍ୟ ରେକର୍ଡ କରାଯାଇଥାଏ ।

ଆପଣଙ୍କୁ କହି ରଖୁଛୁ ୟୁନିଅନ୍ ବଜେଟ୍ 1 ଫେବୃଆରୀ 2023 ରେ ଉପସ୍ଥାପିତ ହେବ । ବଜେଟ୍ ଅଧିବେଶନ 31 ଜାନୁୟାରୀରୁ ଆରମ୍ଭ ହୋଇ 6 ଅପ୍ରେଲ 2023 ପର୍ଯ୍ୟନ୍ତ ଚାଲିବ ।

Published On January 26, 2023