ଜୁଲାଇ 1 ଯାଏଁ ରାଜ୍ୟରେ ଆଶିଂକ କୋହଳ ହେଲା ଲକଡାଉନ, ଜାରି ରହିବ ସପ୍ତାହନ୍ତ ସଟଡାଉନ୍ ଓ ରାତ୍ରୀକାଳୀନ କର୍ଫ୍ୟୁ

ଉପକୂଳ ଅଞ୍ଚଳର 13ଟି ଜିଲ୍ଲାରେ ଅତ୍ୟାବଶ୍ୟକ ସାମଗ୍ରୀ ଦୋକାନ ଖୋଲିବା ସମୟକୁ ସକାଳ 6 ଟାରୁ ଦିନ ଗୋଟାଏ ପର୍ଯ୍ୟନ୍ତ କୋହଳ କରାଯାଇଛି ।

Updated: Wednesday, June 16, 2021, 14:21 [IST]

ଭୁବନେଶ୍ୱର : ଆସନ୍ତା କାଲି ସକାଳ 5ଟାରେ ସରୁଛି ତୃତୀୟ ପର୍ଯ୍ୟାୟ ଲକଡାଉନ । ଏହାପରେ ଜୁଲାଇ ପହିଲା ପର୍ଯ୍ୟନ୍ତ ଲକଡାଉନ ଅବଧିକୁ ବୃଦ୍ଧି କରିଛନ୍ତି ରାଜ୍ୟ ସରକାର । ଏହି ସମୟରେ କଟକଣାରେ କିଛିଟା କୋହଳ କରାଯାଇଛି । ଉପକୂଳ ଅଞ୍ଚଳର 13ଟି ଜିଲ୍ଲାରେ ଅତ୍ୟାବଶ୍ୟକ ସାମଗ୍ରୀ ଦୋକାନ ଖୋଲିବା ସମୟକୁ ସକାଳ 6 ଟାରୁ ଦିନ ଗୋଟାଏ ପର୍ଯ୍ୟନ୍ତ କୋହଳ କରାଯାଇଛି ।

ସେହିପରି ସୁନ୍ଦରଗଡ଼, ଅବିଭକ୍ତ ସମ୍ବଲପୁର, ଅବିଭକ୍ତ ବଲାଙ୍ଗୀର, ଅବିଭକ୍ତ କୋରାପୁଟ, ଅବିଭକ୍ତ କନ୍ଧମାଳ ଓ ଅବିଭକ୍ତ ଗଞ୍ଜାମର 17 ଟି ଜିଲ୍ଲାରେ 17 ଟି ଜିଲ୍ଲାରେ ସକାଳ 7 ଟାରୁ ଅପରାହ୍ନ 5 ଟା ପର୍ଯ୍ୟନ୍ତ ଦୋକାନ ବଜାର ଖୋଲିବାକୁ ଅନୁମତି ଦିଆଯାଇଛି । ଏହି ସବୁ ଜିଲ୍ଲାରେ ଉଠାଦୋକାନ ଖୋଲା ରହିବ । କିନ୍ତୁ ଗ୍ରାହକମାନେ ପାର୍ସଲ ନେଇପାରିବେ । ଏନେଇ ସୂଚନାଦେଇଛନ୍ତି ମୁଖ୍ୟ ଶାସନ ସଚିବ ସୁରେଶ ମହାପାତ୍ର ।

ଏହି ସମୟରେ ମର୍ଣ୍ଣିଂ ୱାକ୍ କରିବା ପାଇଁ ସକାଲ 6 ଟାରୁ 9 ଟା ପର୍ଯ୍ୟନ୍ତ ଅନୁମତି ଦିଆଯାଇଛି । ପୂର୍ବପରି ସମସ୍ତ ଜିମ୍ ଓ ପାର୍କ ବନ୍ଦ ରହିବ । କ୍ଷୀର ବ୍ୟବସାୟୀଙ୍କ ସ୍ୱାର୍ଥ ଦୃଷ୍ଟିରୁ ମିଠା ଦୋକାନ ଖୋଲିବାକୁ ମିଳିଛି ଅନୁମତି । ବସ୍ ଚଳାଚଳ ବନ୍ଦ ରହିବ ।

ସାରା ରାଜ୍ୟରେ ଟୀକାକରଣ ଓ ସ୍ୱାସ୍ଥ୍ୟ ସମ୍ପର୍କିତ କାର୍ଯ୍ୟରେ ଯାଇପାରିବେ । ବ୍ୟାଙ୍କିଂ, କୃଷି ଏବଂ ପରିବହନ କାର୍ଯ୍ୟ ଜାରି ରହିବ । ସମସ୍ତ ଶିଳ୍ପସଂସ୍ଥା କାର୍ଯ୍ୟକ୍ଷମ ରହିବ । ନିର୍ମାଣ କାର୍ଯ୍ୟ ଜାରି ରହିବ ।