ପ୍ରେମ ଜାଲରେ ଫଶିଗଲେ ଅଙ୍ଗନବାଡି କର୍ମୀ : ଅପହରଣ, ଅଶ୍ଲୀଳ ଭିଡିଓ ଏବଂ ଧମକ ଦେଇ ଶାରୀରିକ ସମ୍ପର୍କ ରଖିଲା ଯୁବକ

ପ୍ରେମ ଜାଲରେ ଫଶି ଗଲେ 23 ବର୍ଷୀୟ ଅଙ୍ଗନବାଡି କର୍ମୀ । ଆଠ ବର୍ଷ ଧରି ଯୁବକ ଜଣଙ୍କ ବିଭିନ୍ନ ପ୍ରଲୋଭନ ଦେଖାଇ ପ୍ରେମ ଜାଲରେ ଫଶାଇ ଦେଲେ । ଏଥିସହିତ ଉକ୍ତ ଯୁବତୀଙ୍କର ଅଶ୍ଲୀଳ ଭିଡିଓ ଉତ୍ତୋଳନ କରିବା ସହ ଏହାକୁ ଦେଖାଇ ବ୍ଲାକମେଲିଂ କଲେ ।

Updated: Monday, March 8, 2021, 15:06 [IST]

ଢେଙ୍କାନାଳ : ପ୍ରେମ ଜାଲରେ ଫଶି ଗଲେ 23 ବର୍ଷୀୟ ଅଙ୍ଗନବାଡି କର୍ମୀ । ଆଠ ବର୍ଷ ଧରି ଯୁବକ ଜଣଙ୍କ ବିଭିନ୍ନ ପ୍ରଲୋଭନ ଦେଖାଇ ପ୍ରେମ ଜାଲରେ ଫଶାଇ ଦେଲେ । ଏଥିସହିତ ଉକ୍ତ ଯୁବତୀଙ୍କର ଅଶ୍ଲୀଳ ଭିଡିଓ ଉତ୍ତୋଳନ କରିବା ସହ ଏହାକୁ ଦେଖାଇ ବ୍ଲାକମେଲିଂ କଲେ । କେବଳ ସେତିକିରେ ଅଟକି ନଥିଲେ ଯୁବକ । ଏହି ଭିଡିଓକୁ ନେଇ ଅଙ୍ଗନବାଡି କର୍ମୀଙ୍କୁ ଧମକଚମକ ଦେବା ସହ ନିର୍ଯ୍ୟାତନା ଓ ଶାରୀରିକ ସମ୍ପର୍କ ମଧ୍ୟ ରଖିଲେ । ଶେଷରେ ତାଙ୍କୁ ଅପହରଣ କରି ନେଲେ । କୌଣସି ଉପାୟରେ ଅଙ୍ଗନବାଡୀ କର୍ମୀ ଜଣଙ୍କ ପୁଲିସକୁ ଏସମ୍ପର୍କରେ ଖବର ଦେବା ପରେ ତାଙ୍କୁ ଉଦ୍ଧାର କରାଯାଇଛି । ଘଟଣାଟି ଘଟିଛି ଢେଙ୍କାନାଳ ଜିଲ୍ଲା ଗଁଦିଆ ଥାନା ଅଞ୍ଚଳରେ ।

ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁସାରେ, ଭୁବନ ବିଜ୍ଞାପିତ ପରଷଦ ଅଞ୍ଚଳରେ ଜଣେ ଯୁବତୀ ଅଙ୍ଗନବାଡି କର୍ମୀ ଭାବରେ କାର୍ଯ୍ୟ କରନ୍ତି । ଏହି କର୍ମୀଙ୍କୁ ବିଜ୍ଞାପିତ ପରିଷଦ 11 ନମ୍ବର ଓ୍ୱାର୍ଡର ଗାଡିଚାଳକ ଭାବେ କାର୍ଯ୍ୟ କରୁଥିବା ଜଗବନ୍ଧୁ ଗୁରୁ ବିଭିନ୍ନ ପ୍ରଲୋଭନ ଦେଖାଇ ଗତ 8 ବର୍ଷ ଧରି ପ୍ରେମ କରି ଆସୁଥିଲେ । ଏଥିସିହତ ଉକ୍ତ ଯୁବତୀଙ୍କର ଅଶ୍ଲୀଳ ଭିଡିଓ ଉତ୍ତୋଳନ କରିଥିଲେ । ଜଗବନ୍ଧୁ ଯୁବତୀ ଜଣଙ୍କୁ ଗତ 5 ତାରିଖ ରାତି ଦୁଇଟା ସମୟରେ ଭୁବନରୁ କୌଣସି ଉପାୟରେ ଅପହରଣ କରି ନେଇ ଗଁଦିଆ ଥାନା ଅନ୍ତର୍ଗତ ଝାରଦା ଗ୍ରାମର ନିଜ ବଡବାପାଙ୍କ ଘରେ ଗୋଟିଏ କୋଠରୀରେ ବନ୍ଦ କରି ରଖିଥିଲେ । ଦୁଇଦିନ ଧରି ଯୁବତୀ ଜଣଙ୍କୁ ଗୃହବନ୍ଦୀ ଭାବରେ ରଖି ସେଠାରେ ମାନସିକ ନିର୍ଯ୍ୟାତନା ଦେଉଥିଲେ । ସେଠାରେ ଶାରୀରିକ ସମ୍ପର୍କ ମଧ୍ୟ ରଖିଥିଲେ । ଏହି ସମୟରେ ଉକ୍ତ ଯୁବତୀ ଜଣଙ୍କୁ ବଳପୂର୍ବକ ବିବାହ କରିବା ପାଇଁ ସମ୍ପର୍କୀୟ ବଡବାପାଙ୍କ ପରିବାର ସହ ମିଶି ଯୋଜନା ପ୍ରସ୍ତୁତ କରିଥିଲେ । ଏହି କଥା ଜାଣିବା ପରେ କୌଣସି ଉପାୟରେ ଉକ୍ତ ଯୁବତୀ ଜଣଙ୍କ ଗଁଦିଆ ଥାନା ଅଧିକାରୀଙ୍କୁ ଯୋଗାଯୋଗ କରିଥିଲେ । ଏସଡିପିଓ ଏହା ଜାଣିବା ପରେ କାର୍ଯ୍ୟାନୁଷ୍ଠାନ ନେବାକୁ ତୁରନ୍ତ ନିର୍ଦ୍ଦେଶ ଦେଇଥିଲେ । ଥାନା ଅଧିକାରୀ ଏକ ଟିମ୍ ସହ ଉକ୍ତ ଗାଁରେ ଚଢାଉ କରି ଯୁବତୀଙ୍କୁ ଉଦ୍ଧାର କରିଥିଲେ । ପୁଲିସ ଉଭୟଙ୍କୁ ଥାନାକୁ ଆଣି ପଚରାଉଚରା କରୁଛି । ଉଭୟଙ୍କର ଡାକ୍ତରୀ ମାଇନା କରାଯିବା ସହ ଏନେଇ ଏକ ମାମଲା ରୁଜୁ ହୋଇଛି ।