ଖର୍ଚ୍ଚ କରିବାକୁ ଟଙ୍କା ନ ଦେବାରୁ ନାବାଳକ ସାଙ୍ଗକୁ ପଥରରେ ଛେଚି ହତ୍ୟା

Updated: Tuesday, September 26, 2023, 12:06 [IST]

ରାଉରକେଲା: ନିଜ ସାଙ୍ଗକୁ ପଥରରେ ଛେଚି ହତ୍ୟା କଲେ ଅନ୍ୟ ତିନିଜଣ ସାଙ୍ଗ । କାଣ ଥିଲା, ଖର୍ଚ୍ଚ କରିବାକୁ ସାଙ୍ଗ ସେମାନଙ୍କୁ ଟଙ୍କା ନ ଦେବା । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ରାଉରକେଲା ର ଉଦିତନଗର ଅଞ୍ଚଳରେ । ମୃତ ନାବାଳକ ଜଣକ ହେଲେ ରୁଦ୍ର ନାରାୟଣ ପାଢୀ ।

ଖର୍ଚ୍ଚ କରିବାକୁ ଟଙ୍କା ନ ଦେବାରୁ ନାବାଳକୁ ତାର ସାଙ୍ଗମାନେ ଲାଠିରେ ପିଟିବା ସହ ପଥରରେ ଛେଚି ହତ୍ୟା କରିଛନ୍ତି । ହତ୍ୟା ପରେ ଉଦିତନଗର ସରନା ଛକ କଚଡ଼ା ପୁଲିଆ ନିକଟରେ ଫିଙ୍ଗି ଦେଇଛନ୍ତି । ଗତକାଲି ରାତିରେ ଏହି ହତ୍ୟାକାଣ୍ଡ ଘଟିଛି । ହତ୍ୟାରେ ସଂପୃକ୍ତ ଦୁଇ ନାବାଳକ ଛାତ୍ରଙ୍କୁ ଉଦିତନଗର ପୋଲିସ ଅଟକ ରଖିଥିବା ବେଳେ ଅନ୍ୟ ଜଣେ ଫେରାର ହୋଇଯାଇଛି । ଏମାନେ ସମସ୍ତେ ବାଲୁଘାଟ ଓ ଉଦିତନଗର ଓରାମପଡ଼ାର । ପୋଲିସ ଛାତ୍ରର ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ହତ୍ୟାମାମଲା ରୁଜୁ କରି ଘଟଣାର ତଦନ୍ତ ଚଳାଇଛି ।

ମିଳିଥିବା ସୂଚନା ମୁତାବକ ରୁଦ୍ର ସିଭିଲଟାଉନସିପ ସ୍ଥିତ ଡେଭେଲପ ଏରିଆ ଉଚ୍ଚ ବିଦ୍ୟାଳୟରେ ପଢ଼ନ୍ତି । ହତ୍ୟାକାରୀ ଅଭିଯୁକ୍ତ ତିନି ଛାତ୍ର ରୁଦ୍ରର ସାଙ୍ଗ । ତିନି ଅଭିଯୁକ୍ତ ଛାତ୍ର ରୁଦ୍ରଙ୍କୁ ଖର୍ଚ୍ଚ କରିବାକୁ ଟଙ୍କା ଦିଅନ୍ତି । ଗତ ଦୁଇ ଦିନ ତଳେ ସେମାନେ ରୁଦ୍ରଙ୍କୁ ଖର୍ଚ୍ଚ ପାଇଁ ଟଙ୍କା ମାଗିଥିଲେ । ରୁଦ୍ର ପାଖରେ ଟଙ୍କା ନ ଥିବାରୁ ଅରାଜି ହୋଇଥିଲା । ରୁଦ୍ରଙ୍କୁ ତିନି ଅଭିଯୁକ୍ତ ସାଙ୍ଗ କଲ୍ କରି ଉଦିତନଗର ଡାକିଥିଲେ । ରୁଦ୍ର ଘରକୁ ନ ଫେରିବାରୁ ପରିବାର ଲୋକ ରଘୁନାଥପାଲି ଥାନାରେ ନିଖୋଜ ନେଇ ଲିଖିତ ଅଭିଯୋଗ କରିଥିଲେ । ଆଜି ସକାଳୁ କଚଡ଼ା ପୁଲିଆ ନିକଟରେ ଶବ ପଡ଼ିଥିବା ଦେଖି ସ୍ଥାନୀୟ ଲୋକ ପରିବାର ଲୋକଙ୍କୁ ସୂଚନା ଦେଇଥିଲେ ।