ଦିନରେ ଭିକାରୀ ବେଶ, ରାତିରେ ଘରେ ପଶି ଚୋରି... ପୋଲିସ୍ ହାତରେ ପୁରା ଗ୍ୟାଙ୍ଗ୍

ଭଦ୍ରକ: ଦିନ ସାରା ଘର ଘର ବୁଲି ଭିକ ମାଗୁଥିଲେ । ଏହି ବାହନାରେ ଘର ଉପରେ ରହୁଥିଲା ନଜର । ଦିନରେ ଭିକାରୀ ବେଶରେ ଘରର ସ୍ଥିତି ପରଖିବା ପରେ ରାତିରେ କରୁଥିଲେ ଟାର୍ଗେଟ୍ । ସୁଯୋଗ ଦେଖି ଘରେ ପଶି ବୁଲାଇ ଦେଉଥିଲେ କଳାକନା । ଏପରିକି ପ୍ରତିବାଦ କଲେ ଘରର ଲୋକଙ୍କ ଉପରେ ହେଉଥିଲା ମାଡ଼ ।

ଏମିତି ଏକ ଭିକାରୀ-ଚୋର ଗ୍ୟାଙ୍ଗ୍ କୁ ଧରିଛି ଭଦ୍ରକ ପୋଲିସ୍ । ଏହା ସହ ନଗଦ ଟଙ୍କା, ସୁନା ଅଳଙ୍କାର ଓ ଅନ୍ୟାନ୍ୟ ମାରଣାସ୍ତ୍ର ଜବତ କରିଛି । ଏହି ରାକେଟ୍‌ର ଚେର କେନ୍ଦ୍ରାପଡ଼ାକୁ ଲମ୍ୱିଥିବା ଜଣାପଡ଼ିଛି ।

ମିଳିଥିବା ସୂଚନା ଅନୁସାରେ, ସାବରଙ୍ଗ ଥାନା ଚଣ୍ଡିଗାଁ ପଞ୍ଚାୟତରେ ଗତ କିଛି ଦିନ ହେଲା ଲଗାତାର ଭାବେ ଚୋରି ହେଉଥିଲା । ଚୋରମାନେ ଘରେ ପଶି ପରିବାର ଲୋକଙ୍କୁ ଆକ୍ରମଣ କରିବା ସହ ଚୋରି କରୁଥିଲେ । ଏନେଇ ବାରମ୍ୱାର ଅଭିଯୋଗ ଆସିବା ପରେ ମାମଲାର ତଦନ୍ତ ପାଇଁ ସ୍ୱତନ୍ତ୍ର ଟିମ୍‌ ଗଠନ କରିଥିଲା ସାବରଙ୍ଗ ଥାନା ପୋଲିସ୍‌ । ସାଇଣ୍ଟିଫିକ୍‌ ଟିମ୍‌ ସହାୟତାରେ ଘଟଣାର ତଦନ୍ତ କରିଥିଲା । ତଦନ୍ତ ବେଳେ ପୋଲିସ୍‌ର ସନ୍ଦେହକୁ ଆସିଥିଲେ ପଗଡ଼ ଗାଁର ଅଜୁ ଦାସ, ରାଜୁ ଦାସ ଓ ରାମ ଦାସ । ପୋଲିସ୍‌ ସେମାନଙ୍କୁ ଉଠାଇ ଆଣି ଘନଘନ ଜେରା କରିଥିଲା ।

ଜେରା ବେଳେ ସତ ଓଗାଳିଥିଲେ 3 ଅଭିଯୁକ୍ତ । ସେମାନଙ୍କ ତଥ୍ୟ ଆଧାରରେ ପୋଲିସ୍‌ କେନ୍ଦ୍ରାପଡା ଅଞ୍ଚଳର ବଳିଆ ଦାସକୁ ଗିରଫ କରିଥିଲା । ପରେ ତିହିଡି ଥାନା ଅଞ୍ଚଳର ଦୁଃଖକୁ ମଧ୍ୟ ଗିରଫ କରିଥିଲା । ଚୋରି ହୋଇଥିବା ସୁନା ଗହଣା କିଣିଥିବା ଦୋକାନୀ ରମାକାନ୍ତ ସାହୁଙ୍କୁ ମଧ୍ୟ ଗିରଫ କରିଛି ସବରଙ୍ଗ ଥାନା ପୋଲିସ । ଗିରଫ ଅଭିଯୁକ୍ତଙ୍କଠାରୁ ପୁଲିସ୍‌ ଚୋରି ହୋଇଥିବା ସୁନା ଗହଣା, ନଗଦ ଟଙ୍କା ସହ ମାରଣାସ୍ତ୍ର ଜବତ କରିଛି ।

ଭଦ୍ରକ ଏସ୍‌ଡିପିଓ ସୌରଭ ଓତାଙ୍କ କହିବା ଅନୁସାରେ ରାତିରେ ଚୋରି ପାଇଁ ଯାଉଥିଲେ ଚୋର । ସେମାନଙ୍କ ଭିତରୁ 3 ଜଣ ଘର ଭିତରକୁ ଯାଉଥିଲେ । ବାହାରେ ଜଗୁଥିଲେ 2 ଜଣ । ବାହାରେ ଜଗୁଥିବା ଚୋର ଭିତରକୁ ଯାଇଥିବା ସାଥୀଙ୍କୁ ସ୍ଥିତି ସମ୍ପର୍କରେ ସୂଚନା ଦେଉଥିଲେ । ତା'ପରେ ଚୋରି କରି ଚମ୍ପଟ ମାରୁଥିଲେ । ଏହି ମାମଲାରେ 6 ଜଣ ଗିରଫ ହୋଇଛନ୍ତି । ଏଥିରେ ଆହୁରି ଅନେକ ସମ୍ପୃକ୍ତ ଥିବା ସନ୍ଦେହ କରାଯାଉଛି । ସେମାନଙ୍କୁ ଖୁବ୍‌ଶୀଘ୍ର ଗିରଫ କରାଯିବ ବୋଲି ଭଦ୍ରକ ଏସ୍‌ଡିପିଓ କହିଛନ୍ତି ।

English summary

Bhadrak Police arrested 6 thieves members of a gang