ନ୍ୟାୟ ପାଇଁ ଆର୍-ପାର୍ ଲଢେଇ, ବ୍ରିଜ ଭୂଷଣଙ୍କ ଗିରଫ ଦାବିରେ ରାଜରାସ୍ତାରେ କୁସ୍ତି ଯୋଦ୍ଧା

Updated: Monday, April 24, 2023, 12:46 [IST]

ନୂଆଦିଲ୍ଲୀ : ଭାରତର ଗୌରବ ତଥା ମେଡାଲ ବିଜେତା ଅନେକ କୁସ୍ତିଯୋଦ୍ଧା ପୁଣି ଥରେ ରାଜରାସ୍ତାକୁ ଓହ୍ଲାଇଛନ୍ତି । ଯୌନ ଉତ୍ପୀଡ଼ନ ମାମଲାରେ ନ୍ୟାୟ ପାଇଁ ଦିଲ୍ଲୀର ଜନ୍ତର ମନ୍ତରରେ ଧାରଣାରେ ବସିଛନ୍ତି । ଦେଶର ଜଣାଶୁଣା କୁସ୍ତିଯୋଦ୍ଧାମାନେ ରବିବାର ସନ୍ଧ୍ୟାରେ ଜନ୍ତର ମନ୍ତରରେ ବ୍ରିଜ ଭୂଷଣ ସିଂହଙ୍କ ବିରୋଧରେ ବିକ୍ଷୋଭ ପ୍ରଦର୍ଶନ କରିଛନ୍ତି । ଏହି କୁସ୍ତିଯୋଦ୍ଧାମାନେ କହିଛନ୍ତି ଯେ ବ୍ରିଜ ଭୂଷଣ ସିଂହ ଗିରଫ ନହେବା ପର୍ଯ୍ୟନ୍ତ ସେମାନେ ସେମାନଙ୍କର ଧର୍ମଘଟ ଶେଷ କରିବେ ନାହିଁ ।

ଧାରଣାରେ ବସିଥିବା କୁସ୍ତିଯୋଦ୍ଧା ସାକ୍ଷୀ ମଲିକ କହିଛନ୍ତି ଯେ ଆମେ ଦୁଇ ଦିନ ପୂର୍ବରୁ ସିପି ପୋଲିସ ଷ୍ଟେସନରେ ଅଭିଯୋଗ କରିଥିଲୁ । କିନ୍ତୁ ଦୁଇ ଦିନ ବିତିଗଲାଣି ହେଲେ ଏଫ୍ଆଇଆର୍ ଏପର୍ଯ୍ୟନ୍ତ ପଞ୍ଜୀକୃତ ହୋଇନାହିଁ । ମୋଟ 7 ଜଣ ଝିଅ ଅଭିଯୋଗ ଦାଖଲ କରିଛନ୍ତି ଯେଉଁଥିରେ ଜଣେ ନାବାଳିକା ମଧ୍ୟ ଅଛନ୍ତି ।

ସାକ୍ଷୀ କହିଛନ୍ତି ଯେ ନାବାଳିକାଙ୍କ ମାମଲାରେ POCSO ମାମଲା ହେବା ଉଚିତ୍ । ଏପର୍ଯ୍ୟନ୍ତ ଏ ବାବଦରେ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ କିମ୍ବା ଏଫ୍ଆଇଆର୍ ପଞ୍ଜିକୃତ ହୋଇନାହିଁ । ଯଥାଶୀଘ୍ର FIR ପଞ୍ଜୀକୃତ ହେବା ଉଚିତ ଏବଂ ଅଭିଯୁକ୍ତଙ୍କୁ ଆଇନ ଅନୁଯାୟୀ ଦଣ୍ଡିତ କରାଯିବା ଉଚିତ୍ ବୋଲି ଦାବି କରିଛନ୍ତି କୁସ୍ତିଯୋଦ୍ଧା ।

ସାକ୍ଷୀ ମଲିକ କହିଛନ୍ତି ଯେ ଏହି ମାମଲା ଯୌନ ଶୋଷଣର ବିଷୟ ଏବଂ ଏହା ବ୍ରିଜ ଭୂଷଣ ଶରଣ ସିଂହଙ୍କ ବିରୋଧରେ ଅଛି । ଅଢେଇ ମାସରୁ ଅଧିକ ସମୟ ବିତିଗଲାଣି କିନ୍ତୁ ଏପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ ।

ଆମେ ନିଶ୍ଚିତ ଥିଲୁ ଯେ ସରକାର ଆମକୁ ସମର୍ଥନ କରିବେ, କିନ୍ତୁ ଅଢେଇ ମାସ ପରେ ରିପୋର୍ଟ ଦାଖଲ ହୋଇଛି କି ନାହିଁ, ସେଥିରେ କ'ଣ ହୋଇଛି ତାହା ଆମେ ଏପର୍ଯ୍ୟନ୍ତ ଜାଣିନାହୁଁ । ଅଢେଇ ମାସ ପରେ, ସମସ୍ତେ ଭାବିବା ଆରମ୍ଭ କରି ଦେଇଛନ୍ତି ଯେ ଆମେ ଯେଉଁମାନେ ଧାରଣାରେ ବସିଥିଲୁ ସମସ୍ତେ ମିଛ ଅଭିଯୋଗ କରିଥିଲୁ । ଏହା ଆମେ ଆଦୌ ସହ୍ୟ କରିପାରିବୁ ନାହିଁ । ଆମେ ସବୁବେଳେ ସତ୍ୟ ସହିତ ବଞ୍ଚିଛୁ, ସତ୍ୟ ସହିତ ସଂଘର୍ଷ କରିଛୁ ।

ସାକ୍ଷୀ କହିଛନ୍ତି ଯେ ବର୍ତ୍ତମାନ ଯେତେବେଳେ ଆମେ ବିଭିନ୍ନ ସ୍ଥାନକୁ ଯାଉଛୁ, ଆମେ ମିଛ ଅଭିଯୋଗ କରିଥିଲୁ ବୋଲି ଲୋକମାନେ ଭାବୁଛନ୍ତି । କିନ୍ତୁ ତାହା ନୁହେଁ, ଆମେ ସତ୍ୟ ପାଇଁ ସଂଗ୍ରାମ କରିଛୁ ଏବଂ ଆମେ ଆଶା କରୁଛୁ ଯେ ଆମେ ନିଶ୍ଚିତ ଭାବରେ ସତ୍ୟ ସଂଗ୍ରାମରେ ଜିତିବୁ ।