ଆଇପିଏଲ 2021 : ୟୁଏଇରେ ଖେଳା ହେବ ବାକି ଥିବା ମ୍ୟାଚ୍, କେବେ ଆରମ୍ଭ ହେବ ଜାଣନ୍ତୁ

ଇଣ୍ଡିଆନ୍ ପ୍ରିମିୟର ଲିଗ (ଆଇପିଏଲ)ର 14 ତମ ସିଜନରେ ଖେଳା ଯିବାକୁ ନେଇ ଲାଗି ରହିଥିବା ଦ୍ୱନ୍ଦ ଶେଷରେ ଦୂର ହୋଇଛି । ୟୁଏଇରେ ଆଇପିଏଲ୍ 2021 ର ଅବଶିଷ୍ଟ ମ୍ୟାଚ୍ ଖେଳାଯିବାକୁ ବିସିସିଆଇ ନିଷ୍ପତ୍ତି ନେଇଛି ।

Published: Saturday, May 29, 2021, 16:54 [IST]

ନୂଆଦିଲ୍ଲୀ : ଇଣ୍ଡିଆନ୍ ପ୍ରିମିୟର ଲିଗ (ଆଇପିଏଲ)ର 14 ତମ ସିଜନରେ ଖେଳା ଯିବାକୁ ନେଇ ଲାଗି ରହିଥିବା ଦ୍ୱନ୍ଦ ଶେଷରେ ଦୂର ହୋଇଛି । ୟୁଏଇରେ ଆଇପିଏଲ୍ 2021 ର ଅବଶିଷ୍ଟ ମ୍ୟାଚ୍ ଖେଳାଯିବାକୁ ବିସିସିଆଇ ନିଷ୍ପତ୍ତି ନେଇଛି । ଶନିବାର ଅନୁଷ୍ଠିତ ବିସିସିଆଇ ବୈଠକରେ ଆଇପିଏଲକୁ ଭାରତରୁ ୟୁଏଇକୁ ସ୍ଥାନାନ୍ତର କରିବାକୁ ସହମତି ପ୍ରକାଶ ପାଇଛି ।

ଗତ କିଛି ଦିନ ଧରି ଆଇପିଏଲର 14 ତମ ସିଜନକୁ ଭାରତରୁ ୟୁଏଇକୁ ସ୍ଥାନାନ୍ତର କରାଯିବା ନେଇ କଳ୍ପନାଜଳ୍ପନା ପ୍ରକାଶ ପାଇଥିଲା । କିନ୍ତୁ ଅଦ୍ୟାବଧି ବିସିସିଆଇ ଏହି ପ୍ରସଙ୍ଗରେ କିଛି କହିବା ଠାରୁ ଦୂରେଇ ରହିଥିଲା । ଶନିବାର ଦିନ, ଆଇପିଏଲ୍ 2021 ର ଭବିଷ୍ୟତ ବିଷୟରେ ବିସିସିଆଇ ଦ୍ୱାରା ଏକ ବୈଠକ ଡକାଯାଇଥିଲା ଏବଂ ଗତ ବର୍ଷର ସଫଳତାକୁ ଦୃଷ୍ଟିରେ ରଖି ଆଇପିଏଲ୍ 2021 ର ଅବଶିଷ୍ଟ 31 ଟି ମ୍ୟାଚ୍ ଆୟୋଜନ କରିବାକୁ ୟୁଏଇକୁ ମନୋନୀତ କରାଯାଇଥିଲା ।
ଏଠାରେ ସୂଚନାଥାଉକି, ଆଇପିଏଲର 14 ତମ ସିଜନ ଏପ୍ରିଲ 9 ରୁ ମୁମ୍ବାଇ ଏବଂ ଚେନ୍ନାଇରେ ଆରମ୍ଭ ହୋଇଥିଲା । ବିସିସିଆଇ ପ୍ରାୟ 25 ଦିନ ଧରି ସଫଳତାର ସହ ଟୁର୍ନାମେଣ୍ଟ ଆୟୋଜନ କରିବାରେ ସଫଳ ହୋଇଥିଲା । କିନ୍ତୁ ଦଳ ଅହମ୍ମଦାବାଦ ଏବଂ ଦିଲ୍ଲୀରେ ପହଞ୍ଚିବା ମାତ୍ରେ ଅନେକ ଖେଳାଳି ଏକାସାଙ୍ଗରେ କରୋନା ପଜିଟିଭ୍ ଚିହ୍ନଟ ହୋଇଥିଲେ ।

ସିଜନ 14 ରେ 31 ଟି ମ୍ୟାଚ୍ ବାକି ଅଛି

ଦୁଇଟି ମ୍ୟାଚ୍ ସ୍ଥଗିତ ରଖିବା ପରେ ବିସିସିଆଇ ଶେଷରେ 14 ତମ ସିଜିନକୁ ମେ 3 ରେ ସ୍ଥଗିତ ରଖିବାକୁ ସ୍ଥିର କଲା । ତେବେ 14 ତମ ସିଜନ ପାଇଁ ଏହା ଏକ ନୂତନ ୱିଣ୍ଡୋ ଖୋଜିବ ବୋଲି ବିସିସିଆଇ ପୂର୍ବରୁ ସ୍ପଷ୍ଟ କରିସାରିଛି । 14 ତମ ସିଜନରେ ଲିଗ୍ ରାଉଣ୍ଡ ଏବଂ ପ୍ଲେ ଅଫ୍ ର ମୋଟ 60 ଟି ମ୍ୟାଚ୍ ଖେଳାଯିବ । ଟୁର୍ନାମେଣ୍ଟ ସ୍ଥଗିତ ନହେବା ପର୍ଯ୍ୟନ୍ତ 29 ଟି ମ୍ୟାଚ୍ ଅନୁଷ୍ଠିତ ହୋଇଥିଲା । ବର୍ତ୍ତମାନ ଅବଶିଷ୍ଟ 31 ଟି ମ୍ୟାଚ୍ ୟୁଏଇରେ ଖେଳାଯିବ । ଯଦି ବିସିସିଆଇ ଆଇପିଏଲ୍ ସିଜନ୍ 14 ର ଅବଶିଷ୍ଟ ମ୍ୟାଚ୍ ଆୟୋଜନ କରି ନଥାନ୍ତା ତେବେ ଏହା ପ୍ରାୟ 3000 କୋଟି ଟଙ୍କା କ୍ଷତି ସହିଥାନ୍ତା । ତେବେ ଟୁର୍ନାମେଣ୍ଟର ପୁନଃ ଆରମ୍ଭ ହେବାର ତାରିଖ ବିସିସିଆଇ ଘୋଷଣା କରି ନାହିଁ । ପ୍ରକାଶ ପାଇଥିବା ସୂଚନା ଅନୁଯାୟୀ, ଆଇପିଏଲ୍ 14 ର ଅବଶିଷ୍ଟ ମ୍ୟାଚ୍ 18 ସେପ୍ଟେମ୍ବରରୁ 10 ଅକ୍ଟୋବର ମଧ୍ୟରେ ଆୟୋଜିତ ହୋଇପାରେ ।

Published On May 29, 2021