Asian Games 2023: ଭାରତ ଖାତାରେ ଆଉ ଏକ ସ୍ୱର୍ଣ୍ଣ, ପୁରୁଷ କ୍ରିକେଟ୍ ଟିମ୍ କୁ ସଫଳତା

Updated: Saturday, October 7, 2023, 16:01 [IST]

Asian Games 2023: ଏସୀୟ ଗେମ୍ସରେ ଜବରଦସ୍ତ ପ୍ରଦର୍ଶନ କରୁଛି ଭାରତ । ଶେଷ ଦିନରେ ଭାରତ ଖାତାରେ ଯୋଡ଼ି ହେବାରେ ଲାଗିଛି ସ୍ୱର୍ଣ୍ଣ ପଦକ । ଟି-20 କ୍ରିକେଟ୍ ରେ ଭାରତର ପୁରୁଷ ଟିମ୍ କୁ ମିଳିଛି ସ୍ୱର୍ଣ୍ଣ ପଦକ । ଆଫଗାନିସ୍ତାନକୁ ହରାଇ ପଦକ ହାତେଇଛି ମେନ୍ ଇନ୍ ବ୍ଲୁ ଦଳ ।

ମ୍ୟାଚ ଅଧାରୁ ବର୍ଷା ବାଧକ ସାଜିଥିଲା । ଏହା ପରେ ମ୍ୟାଚ ବାତିଲ ହୋଇଥିଲା । କିନ୍ତୁ ଆଫଗାନିସ୍ତାନ ଅପେକ୍ଷା ଭାରତ ଉଚ୍ଚକୋଟୀର ପ୍ରଦର୍ଶନ କରିଥିବାରୁ ଭାରତକୁ ସ୍ୱର୍ଣ୍ଣ ପଦକ ମିଳିଛି । ଏହାଫଳରେ ଭାରତର ମୋଟ ପଦକ ସଂଖ୍ୟା 102 ରେ ପହଞ୍ଚିଛି । ସେଥିମଧ୍ୟରେ ରହିଛ 27 ସ୍ୱର୍ଣ୍ଣ, 35 ଟି ରୌପ୍ୟ ଓ 40 ଟି ବ୍ରୋଞ୍ଜ ।

ଭାରତ ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା । ଆଫଗାନିସ୍ତାନ 18.2 ଓଭରରେ 5 ୱିକେଟରେ 112 ରନ୍ ସଂଗ୍ରହ କରିଥିବା ବେଳେ ବର୍ଷା ହୋଇଥିଲା । ଆଫଗାନିସ୍ତାନ ପକ୍ଷରୁ ଶାହିଦୁଲ୍ଲା ସର୍ବାଧିକ 49 ରନ ଓ ଅଧିନାୟକ ଗୁଲବଦିନ 27 ରନ କରି ଅପରାଜିତ ରହିଥିଲେ । ଭାରତ ପକ୍ଷରୁ ଅର୍ଶଦୀପ ସିଂହ, ଶିବମ ଦୁବେ, ଶାହବାଜ ଅହମଦ, ରବି ବିଷ୍ଣୋୟୀ ପ୍ରତ୍ୟେକେ ଗୋଟିଏ ଲେଖାଏଁ ୱିକେଟ ଅକ୍ତିଆର କରିଥିଲେ ।