ପାଞ୍ଚ ରାଜ୍ୟର ନିର୍ବାଚନ ମଧ୍ୟରେ ନେତାଙ୍କୁ କରୋନା ସଂକ୍ରମଣ, ଅଡୁଆରେ ବିଜେପି ସମେତ ବିଭିନ୍ନ ରାଜନୈତିକ ଦଳ

ନୂଆଦିଲ୍ଲୀ: ଉତ୍ତର ପ୍ରଦେଶ ଏବଂ ପଞ୍ଜାବ ସମେତ 5ଟି ରାଜ୍ୟରେ ବିଧାନସଭା ନିର୍ବାଚନ ମଧ୍ୟରେ ରାଜନୈତିକ ଦଳ ଗୁଡିକୁ ଘାରିଛି କରୋନା ସଂକ୍ରମଣ ଚିନ୍ତା । କିଛିଦିନ ମଧ୍ୟରେ ବିଜେପି ତଥା ଅନ୍ଯାନ୍ଯ ଦଳର ବରିଷ୍ଠ ନେତାମାନେ କୋଭିଡ ସଂକ୍ରମିତ ହେବା ପ୍ରଚାର କ୍ଷେତ୍ରରେ ସମସ୍ଯା ସୃଷ୍ଟି କରିଛି । ରଜନାଥ ସିଂହ କରୋନା ପଜିଟିଭ ହେବା ଖବର ଆସିବା ପରେ ବିଜେପି ରାଷ୍ଟ୍ରୀୟ ସଭାପତି ଜେପି ନଡଡା ଆସିଥିଲେ କରୋନା ଭୂତାଣୁ ସଂକ୍ରମିତଙ୍କ ତାଲିକାରେ । ଏବେ ଏହି ତାଲିକାରେ ଯୋଡି ହୋଇଛି ଦଳର ଫାୟାର ବ୍ରାଣ୍ଡ ଲିଡର ଗିରିରାଜ ସିଂହଙ୍କ ନାମ ।

ପାଞ୍ଚ ଗୋଟି ରାଜ୍ୟ ମଧ୍ୟରୁ ସବୁଠାରୁ ଗୁରୁତ୍ଵପୂର୍ଣ ରହିଥିବା ଉତ୍ତରପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ବିଜେପିରେ ବଡ ବଡିଆଙ୍କ କରୋନା ପଜିଟିଭ ହେବା ସାମୟିକ ଭାବରେ ଦଳକୁ ଅଡୁଆରେ ପକାଇଛି। ୟୁପି ବିଜେପିର କମାଣ ବରିଷ୍ଠ ବିଜେପି ନେତା ଅମିତ ଶାହ ନିଜେ ଧାରଣ କରିଥିଲେ ମଧ୍ୟ ରାଷ୍ଟ୍ରୀୟ ସଭାପତି ଜେପି ନଡଡା, ଗିରିରାଜ ଏବଂ ରାଜନାଥ ସିଂଙ୍କ ବିଶେଷ ଭୂମିକା ରହିଛି ପ୍ରଚାରରେ । ସେହିପରି ଦଳର କେତେକ କ୍ଷେତ୍ରୀୟ ସଂଗଠକ ଏବଂ ନେତୃବୃନ୍ଦ ସଂକ୍ରମିତ ହୋଇଥିବା ଖବର ମିଳୁଛି । ବର୍ଷ ଆରମ୍ଭରୁ ଉତ୍ତରାଖଣ୍ଡର ରୁଦ୍ରପୁରରେ ନିର୍ବାଚନୀ ପ୍ରଚାରରେ ଯାଇଥିବା ମନୋଜ ତିୱ୍ବାରୀ କରୋନା ସଂକ୍ରମିତ ହୋଇଥିବା ନିଜେ ସୂଚନା ଦେଇଥିଲେ ।

ଅନ୍ଯାନ୍ଯ ରାଜନୈତିକ ଦଳର ଅବସ୍ଥା କିଛି ଭଲ ନାହିଁ:

କେବଳ ବିଜେପି ନୁହେଁ, ସମାଜବାଦୀ ପାର୍ଟି, ବହୁଜନ ସମାଜବାଦୀ ଏବଂ ଅନ୍ଯାନ୍ଯ ଆଞ୍ଚଳିକ ଦଳଗୁଡିକର ମଧ୍ୟ ସମଦଶା । ପଞ୍ଜାବ ଏବଂ ଗୋଆ ରାଜନୀତିରେ ଅପେକ୍ଷାକୃତ ସକ୍ରିୟ ଥିବା ଆମ ଆଦମି ପାର୍ଟିର ମୁଖିଆ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜାରିୱାଲ ଇତି ମଧ୍ୟରେ କରୋନା ସଂକ୍ରମିତ ହୋଇଥିଲେ । ସେହିପରି ଶିବସେନା ନେତା ଅରବିନ୍ଦ ସାବନ୍ତ, ଏକନାଥ ସିନ୍ଧେ ଏବଂ ଅନ୍ଯାନ୍ଯ ମନ୍ତ୍ରୀମଣ୍ଡଳ ସଦସ୍ୟ ସଂକ୍ରମିତ ହୋଇଛନ୍ତି। ଏନସିପି ନେତା ଅଜିତ ପାୱାର, ତୃଣମୁଳ ନେତା ବାବୁଲ ସୁପ୍ରିୟୋ, ଆଗ୍ରା ମେୟର, ଉତ୍ତରଦିଲ୍ଲୀର ମେୟର ଇତ୍ୟାଦି ଏହି ତାଲିକାର ସର୍ବଶେଷ ନାମ । ପଞ୍ଜାବରେ ଶିରୋମଣି ଅକାଳୀ ଦଳ ନେତା ସୁଖବିନ୍ଦର ସିଂହ ଧିଣ୍ଡସା କରୋନା ସଂକ୍ରମିତ ହେବା କାଳ ହୋଇଛି ଦଳ ପାଇଁ । କଂଗ୍ରେସର କେତେକ ଶୀର୍ଷ ନେତୃବୃନ୍ଦ ସଂକ୍ରମିତ ହୋଇ ପ୍ରଚାରରୁ ସାମୟିକ ବିରାମ ନେଇଥିଲେ ।

କୋଭିଡ ନିର୍ଦ୍ଦେଶାବଳୀ ଅନୁସାରେ ହେବନାହିଁ ବଡ ସଭା

ଦେଶରେ ପଞ୍ଜାବ, ଉତ୍ତରାଖଣ୍ଡ, ଉତ୍ତରପ୍ରଦେଶ, ଗୋଆ ଏବଂ ମଣିପୁର ସମେତ ପାଞ୍ଚଟି ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନ ଯୋଗୁଁ ସମ୍ପୃକ୍ତ ରାଜ୍ୟ ତଥା ରାଜଧାନୀ ଦିଲ୍ଲୀରେ ରାଜନୈତିକ ପାଣିପାଗ ଉଷ୍ମ ହୋଇଯାଇଛି। କୋଭିଡ ୩ୟ ଲହର ପରିସ୍ଥିତି ମଧ୍ୟରେ ହେବାକୁ ଥିବା ଏହି ନିର୍ବାଚନ ସାଧାରଣ ଜନତାଙ୍କ ସମେତ ନେତାଙ୍କ ପାଇଁ ଆଣିଛି ସମସ୍ଯା । ନିର୍ବାଚନ ଆୟୋଗ ପକ୍ଷରୁ ବଡ ନିର୍ବାଚନୀ ସଭା, ବାଇକ ରାଲି ଶୋଭା ଯାତ୍ରା ଇତ୍ୟାଦି ଉପରେ କଟକଣା ଜାରି କରାଯାଇଛି। ଭର୍ଚୁଆଲ ସଭାକୁ ଅଧିକ ଗୁରୁତ୍ଵ ପ୍ରଦାନ କରିବାକୁ ପରାମର୍ଶ ଦେଇଛନ୍ତି ନିର୍ବାଚନ କମିଶନ । ତେବେ ଏହିସବୁ କଟକଣା ସତ୍ବେ ପ୍ରାର୍ଥୀ ଚୟନ, ରଣନୀତି ପ୍ରସ୍ତୁତ ଭଳି ନିଷ୍ପତ୍ତି ନେବାପାଇଁ ଭର୍ଚୁଆଲ ବୈଠକ ସେତେଟା ସୁହାଇବ ନାହିଁ । କାରଣ, ଏହିସବୁ ନିଷ୍ପତ୍ତି ଅତି ସଂବେଦନଶୀଳ ତଥା ଟିକିଏ ଭୁଲ ହେଲେ ଦଳ ବିପୁଳ କ୍ଷତିରେ ପଡିବା ସମ୍ଭାବନା ରହିଛି।

English summary

senior leaders are corona positive, new headache for political parties amid assembly elections