ମାହାଙ୍ଗା ଡବଲ ମର୍ଡର: ବିଜେପିକୁ କଡା ଜବାବ ଦେଲେ ବିଜେଡି ମୁଖପାତ୍ର ଚିନ୍ମୟ ସାହୁ

ରାଜନୀତିକ ହିଂସା ଘଟଣାରେ ରାଜ୍ୟ ସରକାର ସବୁବେଳେ ଜିରୋ ଟଲେରାନ୍ସ ନୀତି ଆପଣାଇଛନ୍ତି ବୋଲି ଚିନ୍ମୟ କହିଛନ୍ତି ।

Published: Monday, January 4, 2021, 22:23 [IST]

ଭୁବନେଶ୍ବର: ମାହାଙ୍ଗା ବ୍ଲକ ନୃତାଙ୍ଗ ପଞ୍ଚାୟତର ବିଜେପି ନେତା କୁଳମଣି ବରାଳ ଓ ତାଙ୍କ ସହଯୋଗୀଙ୍କ ହତ୍ୟା ମାମଲାରେ ସରଗରମ ହେଲାଣି ରାଜ୍ୟ ରାଜନୀତି । ଅଭିଯୁକ୍ତଙ୍କୁ ଗିରଫ ଓ ମନ୍ତ୍ରୀଙ୍କ ବହିଷ୍କାର ଦାବିରେ ଆଜି କଟକ ଜିଲ୍ଲାର ସବୁ ବ୍ଲକରେ ବିକ୍ଷୋଭ କରୁଛି ବିଜେପି । ତେବେ ବିରୋଧି ବିଜେପିର ଟାର୍ଗେଟକୁ ପଲଟ ବାର କରିଛନ୍ତି ବିଜେଡି ମୁଖପାତ୍ର ଚିନ୍ମୟ ସାହୁ ।

ରାଜନୀତିକ ହିଂସା ଘଟଣାରେ ରାଜ୍ୟ ସରକାର ସବୁବେଳେ ଜିରୋ ଟଲେରାନ୍ସ ନୀତି ଆପଣାଇଛନ୍ତି ବୋଲି ଚିନ୍ମୟ କହିଛନ୍ତି । ତେବେ ସେ କହିଛନ୍ତି, ଯେଉଁ ଦଳ ରାଜନୈତିକ ହିଂସା ଆରୋପ ଲଗାଉଛନ୍ତି, ସେମାନେ ବିଭିନ୍ନ ରାଜ୍ୟରେ ସରକାରରେ ଅଛନ୍ତି । ସେହି ରାଜ୍ୟରେ କେଉଁ ଭଳି ରାଜନୀତିକ ହିଂସା ହେଉଛି, ସେ କଥା କାହାକୁ ଅଛପା ନାହିଁ । ତେଣୁ ସେମାନଙ୍କର ଏ ବାବଦରେ କହିବାର ନୈତିକ ଅଧିକାର ନାହିଁ ।

ଏନସିଆରବି ରିପୋର୍ଟ କହୁଛି, ୨୦୧୯-୨୦ରେ ଓଡ଼ିଶାରେ ଗୋଟିଏ ବି ରାଜନୀତିକ ହିଂସା ହୋଇନାହିଁ । ସର୍ବାଧିକ ରାଜନୀତିକ ହତ୍ୟା ପଶ୍ଚିମବଙ୍ଗରେ ହୋଇଛି । ବିହାର ଏବଂ ଝାଡ଼ଖଣ୍ଡରେ ୬ଟି, କର୍ଣ୍ଣାଟକ ଓ ପଞ୍ଜାବରେ ୪ଟି ରାଜନୀତିକ ହତ୍ୟା ହୋଇଛି । ସମସ୍ତ ଅଭିଯୁକ୍ତଙ୍କୁ ଗିରଫ କରାଯିବ ବୋଲି କଟକ ଗ୍ରାମାଞ୍ଚଳ ଏସପି ବି.ଯୁଗଳ କିଶୋର କହିଛନ୍ତି । ଏହାକୁ ନେଇ ବିଜୁ ଜନତା ଦଳକୁ ସମାଲୋଚନା କରିବା ଦୁର୍ଭାଗ୍ୟଜନକ ବୋଲି ଚିନ୍ମୟ କହିଛନ୍ତି ।

ତେବେ ଗତକାଲି ଥାନରେ ଏତଲା ପରେ ମାହାଙ୍ଗା ବିଧାୟକ ତଥା ଆଇନ ମନ୍ତ୍ରୀ ପ୍ରତାପ ଜେନା ପ୍ରତିକ୍ରିୟା ରଖିଛନ୍ତି । ମାହାଙ୍ଗା ହତ୍ୟାକାଣ୍ଡରେ ଆଇନ ମନ୍ତ୍ରୀ କହିଛନ୍ତି, ବିଜେପି ଜଣେ ବିରୋଧି ଦଳ ହିସାବରେ ଘଟଣାକୁ ରାଜନୈତିକ ମୋଡ ଦେବାକୁ ଚାହୁଁଛି । ମୁଁ ବିଜେପିକୁ କିଛି କହିବାକୁ ଚାହେଁନି । ବିଜେପି ଯାହା କହିବା କଥା କହୁ, ଆମେ ଯାହା କରିବା କଥା କରିବୁ। ଘଟଣାରେ ମୋ ନାଁରେ ଏତଲା ହୋଇଛି, ତଦନ୍ତ ହେଲେ ସତ ଆପେଆପେ ଜଣାପଡ଼ିବ ।

ସେ ଆହୁରି ମଧ୍ୟ କହିଛନ୍ତି , ଓଡ଼ିଶାରେ କିଛି ଘଟଣା ଘଟିଲେ ଦୋଷୀ ଗିରଫ ହୋଇ ଦଣ୍ଡପାଇବା ଉଚିତ । ତେବେ ବିରୋଧୀ ରାଜନୈତିକ ଦଳ ଏହା ଚାହାନ୍ତି କି ନାହିଁ ତାହା ବଡ଼ ପ୍ରଶ୍ନବାଚୀ ସୃଷ୍ଟି କରୁଛି । କାରଣ ଘଟଣାକୁ ଅଯଥାରେ ରାଜନୈତିକ ରୂପ ଦେବାକୁ ଚାହୁଁଛି ବିଜେପି । ବ୍ୟକ୍ତିଗତ ଭାବେ ମୁଁ ନିଜେ ଉଦ୍ୟମ କରିବି, ଯେପରି ଦୋଷୀ ତୁରନ୍ତ ଗିରଫ ହୋଇ କଠୋର ଦଣ୍ଡ ପାଉ ।

Published On January 4, 2021