ବିହାରରୁ ନୁହେଁ ଦିଲ୍ଲୀରୁ ନିର୍ବାଚନ ଲଢିପାରନ୍ତି କହ୍ନେୟା କୁମାର

Updated: Friday, April 5, 2024, 18:14 [IST]

Kanhaiya Kumar News: ଲୋକସଭା ନିର୍ବାଚନ ପୂର୍ବରୁ କହ୍ନେୟା କୁମାରକୁ ନେଇ କଂଗ୍ରେସ ଏକ ବଡ ନିଷ୍ପତ୍ତି ନେଇପାରେ ବୋଲି ଚର୍ଚ୍ଚା ହେଉଛି । ଏଥର କଂଗ୍ରେସ ବିହାରରେ ନୁହେଁ, ଦିଲ୍ଲୀରେ ଏକ ଆସନରୁ କହ୍ନେୟା କୁମାରଙ୍କୁ ନିର୍ବାଚନ ଲଢିବା ପାଇଁ ଟିକେଟ୍ ଦେଇପାରେ ।

ବାସ୍ତବରେ କିଛି ସମୟ ମଧ୍ୟରେ ଏକ ସିଇସି ବୈଠକ ଅନୁଷ୍ଠିତ ହେବାକୁ ଯାଉଛି, ଯେଉଁଥିରେ କଂଗ୍ରେସ ଏପରି କିଛି ବଡ଼ ନିଷ୍ପତ୍ତି ନେବାର ସମ୍ଭାବନା ରହିଛି । କହ୍ନେୟା କୁମାର ଉତ୍ତର ପୂର୍ବ ଦିଲ୍ଲୀରୁ ବିଜେପି ପ୍ରାର୍ଥୀ ମନୋଜ ତିୱାରୀଙ୍କ ବିପକ୍ଷରେ ନିର୍ବାଚନ ଲଢିପାରନ୍ତି ।

ସୂଚନାଯୋଗ୍ୟ ଯେ ମନୋଜ ତିୱାରୀ ଉତ୍ତର ପୂର୍ବ ଦିଲ୍ଲୀ ଆସନରୁ ସାଂସଦ ଅଟନ୍ତି। ଲଗାତାର ତୃତୀୟ ଥର ପାଇଁ ଏହି ଆସନରୁ ବିଜେପି ତାଙ୍କୁ ଟିକେଟ୍ ଦେଇଛି । ସେଥିପାଇଁ ଏହି ଆସନକୁ ଜଣେ ଶକ୍ତିଶାଳୀ ପ୍ରାର୍ଥୀ ଦେବାକୁ କଂଗ୍ରେସ ଚିନ୍ତା କରୁଛି ବୋଲି ରାଜନୈତୀକ ମାହୋଲରେ ଚର୍ଚ୍ଚା ହେଉଛି ।

ସୂଚନାଥାଉ ଯେ, ଦିଲ୍ଲୀରେ 7 ଟି ଲୋକସଭା ଆସନ ଅଛି। ଏଠାରେ ଦଳ ଆମ୍ ଆଦମୀ ପାର୍ଟି (ଏଏପି) ସହିତ ମିଳିତ ଭାବେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଛନ୍ତି। ମେଣ୍ଟ ଅନୁଯାୟୀ 3 ଟି ଆସନରେ କଂଗ୍ରେସ ପ୍ରତିଦ୍ୱନ୍ଦ୍ୱିତା କରୁଛି। ତେବେ ସେ ଏପର୍ଯ୍ୟନ୍ତ ନିଜ ପ୍ରାର୍ଥୀଙ୍କ ନାଁ ଘୋଷଣା କରିନାହିଁ ।