ନିର୍ବାଚନ ସରିଲା କାର୍ଯ୍ୟାନୁଷ୍ଠାନ ହେଲା: ବିଜେଡିରୁ ନିଲମ୍ବନ ହେଲେ ଜୀବନ ପ୍ରଦୀପ ଦାଶ

ବିଜେଡି ରୁ ନିଲମ୍ବନ ହେଲେ ବାଲେଶ୍ୱରର ପୂର୍ବତନ ବିଧାୟକ ଜୀବନ ପ୍ରଦୀପ ଦାଶ

ଭୁବନେଶ୍ୱର: ବିଜୁ ଜନତା ଦଳ (ବିଜେଡି)ରୁ ନିଲମ୍ବନ ହେଲେ ବାଲେଶ୍ୱରର ପୂର୍ବତନ ବିଧାୟକ ଜୀବନ ପ୍ରଦୀପ ଦାଶ । ଦଳ ବିରୋଧୀ କାର୍ଯ୍ୟକଳାପ ଅଭିଯୋଗରେ ଶ୍ରୀ ଦାସଙ୍କୁ ନିଲମ୍ବନ କରାଇଥିବା ନେଇ ଏକ ପ୍ରେସ ବିଜ୍ଞପ୍ତି ଜରିଆରେ ସୂଚନା ଦେଇଛନ୍ତି ବିଜେଡିର ସାଧାରଣ ସମ୍ପାଦକ ତଥା ରାଜ୍ୟ ସରକାରଙ୍କ ଗଣମାଧ୍ୟମ ଉପଦେଷ୍ଟା ମାନସ ମଙ୍ଗରାଜ । ଚଳିତ ଉପନିର୍ବାଚନ ସମୟରେ ଜୀବନ ଦଳ ବିରୋଧୀ କାର୍ଯ୍ୟ କରୁଥିବା ଅଭିଯୋଗ ହୋଇଥିଲା । ଦଳର ସୁପ୍ରିମୋ ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ ଜୀବନଙ୍କୁ ଦଳରୁ ନିଲମ୍ବନ କରାଇଥିବା ମାନସ ସୂଚନା ଦେଇଛନ୍ତି ।

ବାଲେଶ୍ୱର ସଦର ଉପ-ନିର୍ବାଚନରେ ଦଳୀୟ ପ୍ରାର୍ଥୀ ସ୍ୱରୂପ ଦାସଙ୍କୁ ଜିତାଇବାକୁ ଚେଷ୍ଟା କରିବା ପରିବର୍ତ୍ତେ ତାଙ୍କୁ ପରାଜିତ କରିବା ନେଇ ଗୁପ୍ତ ମନ୍ତ୍ରଣା ଜୀବନ କରୁଥିବା ଦଳୀୟ କର୍ମୀମାନେ ଅଭିଯୋଗ କରିଥିଲେ । ଏପରିକି ନିର୍ବାଚନ ପୂର୍ବରୁ ତାଙ୍କ କର୍ମୀ ବିଜେଡି ଛାଡି ଅନ୍ୟ ଦଳରେ ମିଶିଥିବା ସୂଚନା ଦିଆଯାଇଥିଲା । ଗତ ସାଧାରଣ ନିର୍ବାଚନରେ ଜୀବନ ପରାଜିତ ହୋଇଥିଲେ । କିନ୍ତୁ ଚଳିତ ଉପନିର୍ବାଚନରେ ସେ ନିର୍ବାଚନ ଲଢିବାକୁ ଆଶା କରିଥିଲେ । ଯାହା ପୂରଣ ହୋଇ ପାରିନଥିଲା । ଅନେକ ଉଦ୍ୟମ ସତ୍ତ୍ବେ ଜୀବନଙ୍କ ପରିବର୍ତ୍ତେ ଦଳ ସ୍ୱରୂପ ଦାସଙ୍କୁ ଟିକେଟ୍ ଦେଇଥିଲା । ଏହାକୁ ନେଇ ସେ ସ୍ୱରୂପଙ୍କୁ ହରାଇବାକୁ ଚେଷ୍ଟା କରୁଥିଲେ ବୋଲି ତାଙ୍କ ନାଁରେ ଅଭିଯୋଗ ହୋଇଥିବା କୁହାଯାଉଛି ।

English summary

jivan pradip das suspended from bjd