Election 2024: ଶେଷ ପର୍ଯ୍ୟାୟରେ କାହାର ବଢୁଛି ଜନ ସମର୍ଥନ, କଣ କହୁଛି ରାଜନୈତିକ ଅଙ୍କ...

Election 2024: ରାଜ୍ୟରେ ତିନି ପର୍ଯ୍ୟାୟରେ ସରିଛି ନିର୍ବାଚନ । ଶେଷ ତଥା ଚତୁର୍ଥ ପର୍ଯ୍ୟାୟ ନିର୍ବାଚନ ପାଇଁ ଏବେ ଚଳଚଞ୍ଚଳ ପ୍ରଚାର ମୈଦାନ । ଏହି ପର୍ଯ୍ୟାୟରେ 6 ଲୋକସଭା ଓ 42 ବିଧାନସଭା ଆସନ ପାଇଁ ହେବ ମତଦାନ । ତେବେ ଚତୁର୍ଥ ପର୍ଯ୍ୟାୟ ଲାଗି କାହା ପକ୍ଷରେ ରହିଛି ଜନ ସମର୍ଥନ, କେଉଁ ଆସନରେ କିଏ ଆଗୁଆ ରହୁଛି ତାହା ଉପରେ ରହିଛି ସମସ୍ତଙ୍କ ନଜର।

2019 ନିର୍ବାଚନରେ 42 ବିଧାନସଭା ଆସନରୁ ବିଜେଡ଼ି 33 ଆସନ ହାତେଇଥିଲା । ଏମିତିକି 6 ଲୋକସଭା ଆସନରୁ 4 ଟି ନିଜ ଖାତାରେ ରଖିଥିଲା ଶାସକ ବିଜେଡ଼ି । ଉପକୂଳ-ଉତ୍ତର ଓଡ଼ିଶାରେ 5ଟି ସଂସଦୀୟ କ୍ଷେତ୍ର ବିଜେଡିର ଗଡ଼ । ଆଉ ମୟୂରଭଞ୍ଜ ବିଜେପିର ଗଡ଼ । ଏଥର ନିର୍ବାଚନର ଶେଷ ପର୍ଯ୍ୟାୟରେ ଅର୍ଥାତ 1 ତାରିଖରେ ଏହି ଆସନଗୁଡ଼ିକରେ ମତଦାନ ହେବ । ବିଜେଡି ତା'ର ଗଡ଼କୁ ସୁରକ୍ଷିତ ରଖିବାକୁ ଜୋର୍‌ଦାର ଉଦ୍ୟମ କରୁଥିବା ବେଳେ ସାରା ଓଡ଼ିଶାରେ ସାଂଗଠନିକ ଦକ୍ଷତା ରଖିଥିବା ବଛା ବଛା ନେତା ଓ ବିଧାୟକଙ୍କୁ ଏବେ ଦାୟିତ୍ବ ବାଣ୍ଟିଦେଇଛି । ସେପଟେ ମୟୂରଭଞ୍ଜକୁ ସୁରକ୍ଷିତ ରଖି ବିଜେଡି ଗଡ଼ରେ ଧସେଇ ପଶିବାକୁ ବିଜେପି ପ୍ରସ୍ତୁତ । ପୂରା ରୋଡ୍‌ମ୍ୟାପ୍ ପ୍ରସ୍ତୁତ କରି ନେତାମାନେ ଲାଗି ପଡ଼ିଛନ୍ତି। କଂଗ୍ରେସ ଗତ ଥର ଖାତା ଖୋଲି ନଥିଲା ସତ। ଏଥର କିନ୍ତୁ କିଛି ନିର୍ଦ୍ଦିଷ୍ଟ ଆସନରେ ଦଳ ବିଜେଡି ଓ ବିଜେପିକୁ କଡ଼ା ମୁକାବିଲା ଦେଉଛି ।

ଶେଷ ପର୍ଯ୍ୟାୟରେ କେନ୍ଦ୍ରାପଡ଼ା, ଜଗତସିଂହପୁର, ଯାଜପୁର, ଭଦ୍ରକ, ବାଲେଶ୍ବର ଓ ମୟୂରଭଞ୍ଜ ସଂସଦୀୟ କ୍ଷେତ୍ରରେ ନିର୍ବାଚନ ହେବ । ପ୍ରଥମ ତିନି ପର୍ଯ୍ୟାୟରେ ଜନତାଙ୍କ ମୁଡ୍ କୁ ଲକ୍ଷ୍ୟରେ ରଖି ତୃଣମୂଳ ସ୍ତରରେ ନିଜ ସମର୍ଥନକୁ ଆହୁରି ସୁଦୃଢ କରିବାକୁ ସମସ୍ତେ ବ୍ୟସ୍ତ।
2019 ନିର୍ବାଚନରେ କେନ୍ଦ୍ରାପଡ଼ା, ଜଗତସିଂହପୁର ଓ ଯାଜପୁର ଲୋକସଭା ଆସନ ଜିତିବା ସହ ଏଠାକାର ସମସ୍ତ 7 ଟି ଲେଖାଏଁ ବିଧାନସଭା ଆସନରେ ବିଜେଡି ଜିତିଥିଲା । ଭଦ୍ରକରେ ଲୋକସଭା ଆସନ ସହ 6ଟି ବିଧାନସଭା ଆସନ ବିଜେଡି ଖାତାକୁ ଯାଇଥିଲା । କେବଳ ଧାମନଗରରେ ବିଜେପି ବିଜୟ ପତାକା ଉଡ଼ାଇଥିଲା ।

ବାଲେଶ୍ବରରେ 4ଟି ବିଧାନସଭା ଆସନରେ ବିଜେଡି ଜିତିଥିଲା । ତେବେ ଏଠାରେ ଲୋକସଭା ଆସନ ସହ ତିନିଟି ବିଧାନସଭା ଆସନ ବାଲେଶ୍ବର, ନୀଳଗିରି ଓ ବଡ଼ସାହିରେ ବିଜେପି ଜିତିଥିଲା । ଅବଶ୍ୟ ପରେ ହୋଇଥିବା ଉପନିର୍ବାଚନରେ ବିଜେପି ହାତରୁ ବାଲେଶ୍ବର ଆସନଟି ଛଡ଼ାଇ ଆଣିଥିଲା ବିଜେଡି ।

ମୟୂରଭଞ୍ଜରେ ଲୋକସଭା ଆସନ ସହ 5 ଟି ବିଧାନସଭା ଆସନରେ ବିଜେପି ଜିତିଥିଲା। କେବଳ ବାଙ୍ଗିରିପୋଷି ଓ ମୋରଡ଼ା ବିଧାନସଭା ନିର୍ବାଚନମଣ୍ଡଳୀରେ ବିଜେଡି ଖାତାକୁ ଯାଇଥିଲା ।

ଏହି ପର୍ଯ୍ୟାୟରେ ତିନି ଦଳର ବହୁ ମହାରଥୀଙ୍କ ଭାଗ୍ୟ ପରୀକ୍ଷା ହେବ । ବିଜେଡିର ମନ୍ତ୍ରୀ ପ୍ରତାପ ଦେବ, ଅତନୁ ସବ୍ୟସାଚ୍ଚୀ ନାୟକ, ତୁଷାରକାନ୍ତି ବେହେରା, ଅଶ୍ବିନୀ ପାତ୍ର ଓ ସୁଦାମ ମାର୍ଣ୍ଡି, ବାଚସ୍ପତି ପ୍ରମିଳା ମଲ୍ଲିକଙ୍କ ଭାଗ୍ୟ ପରୀକ୍ଷା ହେଉଛି।

ଅପରପକ୍ଷରେ ବିଜେପିର ବଡ଼ ଚେହେରା ମଧ୍ୟରେ ଅଛନ୍ତି ବୈଜୟନ୍ତ ପଣ୍ଡା, ମନମୋହନ ସାମଲ ଓ ପ୍ରତାପ ଷଡ଼ଙ୍ଗୀ ପ୍ରମୁଖ । କଂଗ୍ରେସର ହେଭିୱେଟ୍ ନେତା ନିରଞ୍ଜନ ପଟ୍ଟନାୟକ ଓ ଶ୍ରୀକାନ୍ତ ଜେନା ମଧ୍ୟ ଏହି ପର୍ଯ୍ୟାୟରେ ନିଜ ଭାଗ୍ୟ ପରୀକ୍ଷା କରୁଛନ୍ତି । ଚଳିତ ନିର୍ବାଚନରେ ସବୁଠାରୁ ବଡ଼ ଲଢ଼େଇ ଏହି ପର୍ଯ୍ୟାୟରେ ହେଉଛି। କାରଣ ପ୍ରଥମ ତିନି ପର୍ଯ୍ୟାୟ ନିର୍ବାଚନ ସରିଯାଇଥିବାରୁ ସମସ୍ତଙ୍କ ଫୋକସ୍‌ରେ ଏବେ ଏହି ଆସନଗୁଡ଼ିକ ରହିଛି ।

ବିଜେଡି ପକ୍ଷରୁ ଏବେ ବହୁ ନେତାଙ୍କୁ ଏହି ଆସନଗୁଡ଼ିକରେ ଦାୟିତ୍ବ ବାଣ୍ଟି ଦିଆଯାଇଛି। ନିର୍ବାଚନ ସରିଯାଇଥିବା ସ୍ଥାନଗୁଡ଼ିକର ବିଧାୟକ ଓ ଟାଣୁଆ ସଂଗଠକମାନଙ୍କୁ ଏଠାରେ ନିୟୋଜିତ କରି ପଞ୍ଚାୟତ ଜଗିବାକୁ କୁହାଯାଇଛି। କୌଣସି ପ୍ରକାର ଯେମିତି ବିଜେଡି ଗଡ଼ ହଲ୍‌ଚଲ୍ ନହୁଏ, ସେଥି ପାଇଁ ସବୁ ପ୍ରକାର କୌଶଳ ଲଗାଇ ଦିଆଯାଇଛି।

English summary

Elections 2024: Fourth Phase Election, Fight in North And Coastal Areas