‘କଂଗ୍ରେସର ୱାରେଣ୍ଟି ଗଲାଣି, ସେ କି ଗ୍ୟାରେଣ୍ଟି ଦେବ’

Published: Thursday, April 27, 2023, 19:46 [IST]

ନୂଆଦିଲ୍ଲୀ: କର୍ଣ୍ଣାଟକ ବିଧାନସଭା ନିର୍ବାଚନ ୨୦୨୩ ପ୍ରଚାର ପାଇଁ ଆଜି କର୍ଣ୍ଣାଟକ ବିଜେପି କର୍ମୀଙ୍କ ସହ ଭିଡିଓ କନଫରେନ୍ସିଂ ମାଧ୍ୟମରେ ଯୋଗାଯୋଗ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ତେବେ କଂଗ୍ରେସର 'ୱାରେଣ୍ଟି' ଚାଲି ଯାଇଥିବାରୁ ସେ ଆଉ କି 'ଗ୍ୟାରେଣ୍ଟି' ଦେବ ବୋଲି ମ‌ୋଦି କହିଛନ୍ତି ।

ପ୍ରଧାନମନ୍ତ୍ରୀ କହିଛନ୍ତି, ମୁଁ ଆନନ୍ଦିତ ଯେ, ଏବେ ଦକ୍ଷିଣ ଭାରତରେ ମଧ୍ୟ ଜନସାଧରରଣ 'ରେବଡି'ର (ମାଗଣା ଉପହାର) ଅର୍ଥ ବୁଝିଲେଣି । ଜନକଲ୍ୟାଣରେ ଆଗ୍ରହ ନ ଥିବା କେତେକ ରାଜନୈତିକ ଦଳ ଏହି ମାଗଣା ସଂସ୍କୃତି ଆରମ୍ଭ କରିଛନ୍ତି । କିନ୍ତୁ ସରକାର ଏମିତି ଚ‌ାଲେ ନାହିଁ । ସରକାର କେବଳ ଆଜି ଓ ଆଗାମୀ କାଲିର କଥା ଚିନ୍ତା କରେ ନାହିଁ । ସରକାର ଆଗାମୀ ପିଢ଼ିଙ୍କ କଥା ଚିନ୍ତା କରେ ।

ସେ ଆହୁରି ମଧ୍ୟ କହିଛନ୍ତି, ହିମାଚଳ ପ୍ରଦେଶର ଜନସାଧାରଣ ସେମାନଙ୍କର ନିର୍ବାଚନ 'ଗ୍ୟାରେଣ୍ଟି'କୁ ଅପେକ୍ଷା କରିଛନ୍ତି। ୪ ବର୍ଷ ପରେ ଏବେ ରାଜସ୍ଥାନବାସୀ ପ୍ରତିବାଦ ଆରମ୍ଭ କରିଛନ୍ତି। କଂଗ୍ରେସ ଆଉ 'ଗ୍ୟାରେଣ୍ଟି' ଦେବା ଅବସ୍ଥାରେ ନାହିଁ । କଂଗ୍ରେସର ଅର୍ଥ ହେଉଛି ନିରୋଳା ଦୁର୍ନୀତି ଓ ମିଥ୍ୟା । କଂଗ୍ରେସ କି ଗ୍ୟାରେଣ୍ଟି ଦେଇ ପାରିବ ? ତା'ର 'ୱାରେଣ୍ଟି' ଶେଷ ହୋଇଯାଇଛି ।

ଏଥିସହିତ ପ୍ରଧାନମନ୍ତ୍ରୀ କର୍ମୀଙ୍କୁ ବିଜୟ ମନ୍ତ୍ର ମଧ୍ୟ ଦେଇଛନ୍ତି । ସବୁ ଘରେ ଘଣ୍ଟାଏ ଘଣ୍ଟାଏ ସମୟ ବିତାଇବା ସହ ଘରକୁ ଘର ଯାଇ ଡବଲ୍‌ ଇଞ୍ଜିନ୍‌ ସରକାରର ଗୁରୁତ୍ୱ ସମ୍ପର୍କରେ ବୁଝାଇବା ପାଇଁ ପରାମର୍ଶ ଦେଇଛନ୍ତି ।

କଂଗ୍ରେସ ଏହି ରାଜ୍ୟ ଗୁଡ଼ିକରେ ଆଉ କୌଣସି ଗ୍ୟାରେଣ୍ଟି ଦେଇପାରିବ ନାହିଁ । କଂଗ୍ରେସର ଅର୍ଥ ହେଉଛି ମିଛ, ଦୁର୍ନୀତି ଓ ଭ୍ରଷ୍ଟାଚାରର ଗ୍ୟାରେଣ୍ଟି । କଂଗ୍ରେସ କି ଗ୍ୟାରେଣ୍ଟି ଦେଇ ପାରିବ ? ତା'ର 'ୱାରେଣ୍ଟି' ଶେଷ ହୋଇଯାଇଛି ।

ସୂଚନାଯୋଗ୍ୟ ୨୨୪ ଆସନ ବିଶିଷ୍ଟ କର୍ଣ୍ଣାଟକ ବିଧାନସଭା ପାଇଁ ଆସନ୍ତା ମେ' ୧୦ ତାରିଖରେ ଭୋଟ୍‌ ଗ୍ରହଣ ହେବ । ମେ ୧୩ ତାରିଖରେ ଫଳାଫଳ ଆସିବ । ତେବେ ଇତିମଧ୍ୟରେ ବିଜେପିର ତାରକା ପ୍ରଚାରକ ତାଲିକାରେ ବିଭିନ୍ନ ରାଜ୍ୟର ମୋଟ ୪୦ ବିଜେପି ନେତାଙ୍କ ନାମ ଅଛି ।

Published On April 27, 2023