କ୍ରସ ଭୋଟିଂ ପରେ ପୁଣି ଚର୍ଚ୍ଚାରେ କଂଗ୍ରେସ ବିଧାୟକ ମହମ୍ମଦ ମୋକିମ, କହିଲେ....

ସଦ୍ୟ ସମାପ୍ତ ରାଷ୍ଟ୍ରପତି ନିର୍ବାଚନରେ ମହମ୍ମଦ ମୋକିମ NDA ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ଭୋଟ ଦେଇଥିଲେ । ତେବେ ମୋକିମଙ୍କ କ୍ରସ ଭୋଟିଂ ପରେ ରାଜ୍ୟ ରାଜନୀତିରେ ଏବେ ହଟ୍ଟଚମଟ ଖେଳିଯାଇଛି ।

Published: Tuesday, July 19, 2022, 21:15 [IST]

ଭୁବନେଶ୍ୱର: ସଦ୍ୟ ସମାପ୍ତ ରାଷ୍ଟ୍ରପତି ନିର୍ବାଚନରେ ମହମ୍ମଦ ମୋକିମ NDA ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ଭୋଟ ଦେଇଥିଲେ । ତେବେ ମୋକିମଙ୍କ କ୍ରସ ଭୋଟିଂ ପରେ ରାଜ୍ୟ ରାଜନୀତିରେ ଏବେ ହଟ୍ଟଚମଟ ଖେଳିଯାଇଛି । ମାଟିର ଝିଅଙ୍କୁ ଭୋଟ୍ ଦେଇ କିଛି ଭୁଲ କରିନି ବୋଲି କହିଥିଲେ ମୋକିମ । ଏହାପରେ ମୋକିମ ବିଜେଡିରେ ମିଶାବା ନେଇ ଚର୍ଚ୍ଚା ଜୋର ଧରିଛି ।

ତେବେ ଏହି ଚର୍ଚ୍ଚାରେ ଆଜି ଆଉଟିକେ ଘିଅ ଢାଳିଛନ୍ତି କଟକ ବାରବାଟୀ ବିଧାୟକ । ୨୦୨୪ରେ ସେ କଂଗ୍ରେସ ଦଳରୁ ନିର୍ବାଚନ ଲଢିବେ କି ନାହିଁ ବୋଲି ତାଙ୍କୁ ପ୍ରଶ୍ନ କରାଯାଇଥିଲା । ଆଉ ଯାହାର ଉତ୍ତରରେ ଏକ ଘରୋଇ ଟିଭି ଚ୍ୟାନେଲରେ ମୋକି କହିଛନ୍ତି, ସେ ଭବିଷ୍ୟବାଣୀ କରିବାକୁ ଚାହାଁନ୍ତି ନାହିଁ । କିନ୍ତୁ ଯଦି ୨୦୨୪ରେ କଂଗ୍ରେସ ଦଳ ଥାଏ ତେବେ ସେ ଲଢିବେ । ତେବେ ମୋକିମଙ୍କ ଏହି ବିବୃତ୍ତି ପରେ ଚର୍ଚ୍ଚା ଆଉ ଟିକେ ବଢିଯାଇଛି ।

ଅନ୍ୟପଟେ ମୋକିମଙ୍କ କ୍ରସ ଭୋଟିଂ ପ୍ରସଙ୍ଗରେ ହାଇକମାଣ୍ଡଙ୍କୁ ଅବଗତ କରାଯାଇଥିବା ସୂଚନା ଦେଇଛନ୍ତି ପିସିସି ସଭାପତି ଶରତ ପଟ୍ଟନାୟକ । ସଠିକ ସମୟରେ ସଠିକ ନିଷ୍ପତ୍ତି ନିଆଯିବ ବୋଲି କହିଛନ୍ତି ପିସିସି ସଭାପତି । ସେପଟେ ମହମ୍ମଦ ମୋକିମ ଯେଉଁ ମାଟିର ଝିଅ କହି ଭୋଟ ଦେଇଥିବା କହିଛନ୍ତି ତାକୁ କାଉଣ୍ଟର କରିଛନ୍ତି ବିଧାୟକ ତାରା ପ୍ରସାଦ ବାହିନୀପତି । ସେ ଯୁକ୍ତି ବାଢିଛନ୍ତି ଯଦି ମାଟି କଥା ଉଠେ ତେବେ ଯଶଓ୍ୱନ୍ତ ସିହ୍ନା ବିହାରର, ପୁଣି ପୂର୍ବତନ ବିଜେପି ନେତା । ତେବେ ସେଠାକାର ବିଜେପି ସାଂସଦ କିମ୍ବା ବିଧାୟକ କଣ ପାର୍ଟି ଉର୍ଦ୍ଧ୍ୱକୁ ଯାଇ ତାଙ୍କୁ ଭୋଟ ଦେଇଛନ୍ତି କି ବୋଲି ତାରା ପ୍ରସାଦ ବାହିନୀପତି ପ୍ରଶ୍ନ କରିଛନ୍ତି ।

ମୋକିମଙ୍କ ଏଭଳି ନିଷ୍ପତ୍ତି ରାଜ୍ୟ କଂଗ୍ରେସରେ ଭିତିରି ଅସନ୍ତୋଷକୁ ପୁଣି ପଦାକୁ ଆଣିଥିବା ବେଳେ ସେପଟେ ବିଜେପି ଓ ବିଜେଡି ତାଙ୍କ ପଦକ୍ଷେପକୁ ସ୍ୱାଗତ କରିଛନ୍ତି । ତେଣେ ଦଳମତ ନିର୍ବିଶେଷରେ ଦ୍ରୌପଦୀ ମୁର୍ମୁଙ୍କ ସପକ୍ଷରେ ଭୋଟ୍ ଦେବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅପିଲ୍ କରିଥିଲେ ।

Published On July 19, 2022