ଉପନିର୍ବାଚନ : ବାଜି ମାରିନେଲା ବିଜେଡି, ବେଣୁ ମଉସା ପାଇଲେ 1255 ଭୋଟ୍

ଉପନିର୍ବାଚନ ଜିତିଲା ବିଜେଡି

Published: Tuesday, November 10, 2020, 22:14 [IST]

ଭୁବନେଶ୍ୱର : ବାଲେଶ୍ୱର ସଦର ଓ ତିର୍ତ୍ତୋଲ ଆସନରେ ବାଜିମାତ୍ କରିଛି ବିଜୁ ଜନତା ଦଳ । ବାଲେଶ୍ୱର ସଦରରୁ ସ୍ୱରୂପ ଦାଶ ଓ ତିର୍ତ୍ତୋଲକୁ ବିଜୟ ଶଙ୍କର ଦାସ ବିଜୟୀ ହୋଇଛନ୍ତି । ସ୍ୱରୂପ ବାଲେଶ୍ୱରରୁ 84 ହଜାର 97 ଖଣ୍ଡ ଭୋଟ ପାଇଥିବା ବେଳେ ତିର୍ତ୍ତୋଲରେ ବିଜୟ ଶଙ୍କର 88ହଜାର 310 ଖଣ୍ଡ ଭୋଟ୍ ପାଇଥିବା ମୁଖ୍ୟ ନିର୍ବାଚନ ଅଧିକାରୀଙ୍କ ପକ୍ଷରୁ ସୂଚନା ଦିଆଯାଇଛି । ଏହି ଦୁଇଟି ସ୍ଥାନରେ ବିଜେଡିର ବିଜୟ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଭୟ ପ୍ରାର୍ଥୀଙ୍କ ସମେତ ଦଳର କର୍ମୀମାନଙ୍କୁ ଶୁଭେଚ୍ଛା ଜଣାଇଛନ୍ତି ।

ଶୁଭେଚ୍ଛା ବାର୍ତ୍ତାକୁ ଟୁଇଟ୍ କରି ନବୀନ କହିଛନ୍ତି ବାଲେଶ୍ୱର ସଦର ଓ ତିର୍ତ୍ତୋଲ ବିଧାନସଭା ଉପନିର୍ବାଚ ବିଜୟ ଲୋକଙ୍କ ଭଲ ପାଇବା ଓ ଅକୁଣ୍ଠ ସମର୍ଥନର ପ୍ରତିଫଳନ । ଲୋକଙ୍କ ପାଖରେ ପହଞ୍ଚି ସେମାନଙ୍କ ହୃଦୟ ଜିତି ଥିବାରୁ ଦଳର ସମସ୍ତ କର୍ମୀଙ୍କୁ ସେ ସାଧୁବାଦ ଜଣାଇଛନ୍ତି । ସେହିପରି କୋଭିଡ୍-19 ସଙ୍କଟ ସମୟରେ ମତଦାନ କରି ଆର୍ଶୀବାଦ କରିଥିବାରୁ ବାଲେଶ୍ୱର ସଦର ଓ ତିର୍ତ୍ତୋଲବାସୀଙ୍କ ବିଶେଷ କରି ମହିଳାମାନଙ୍କୁ କୃତଜ୍ଞତା ଜଣାଇଛନ୍ତି ନବୀନ । ଆପଣମାନଙ୍କ ଉନ୍ନତି ଓ କଲ୍ୟାଣ ପାଇଁ ବିଜୁ ଜନତା ଦଳ ସର୍ବଦା ସଂକଳ୍ପବଦ୍ଧ ବୋଲି ଶେଷରେ କହିଛନ୍ତି ନବୀନ ।
ଅପରପକ୍ଷରେ କେଟିଲ୍ ଚିହ୍ନରେ ବାଲେଶ୍ୱର ସଦର ଆସନରୁ ଛିଡା ହୋଇ ଚର୍ଚ୍ଚାକୁ ଆସିଥିଲେ ବେଣୁ ମଉସା । ସ୍ୱାଧୀନ ପାର୍ଥୀ ଭାବରେ ନିର୍ବାଚନ ଲଢୁଥିବା ବେଣୁ ମଉସାଧର ବାରିକଙ୍କ ପାଇଁ ଅଭିନେତ୍ରୀମାନେ ପ୍ରଚାର କରିବାକୁ ଯାଇଥିଲେ । ବେଣୁ ମଉସା ରାଜନୀତିର ଅଙ୍କ ଭୁଲ କରି ପାରନ୍ତି ବୋଲି ରାଜନୈତିକ ସ୍ତରରେ ଆଲୋଚନା ମଧ୍ୟ ହୋଇଥିଲା । ହେଲେ ଉପନିର୍ବାଚନରେ ବେଣୁ ମଉସାଙ୍କୁ ନିରାଶ ହେବାକୁ ମିଳିଛି । ତାଙ୍କୁ ପୋଷ୍ଟାଲ ବାଲାଟରେ 4 ଖଣ୍ଡ ଭୋଟ୍ ମିଳିଥିବା ବେଳେ ଇଭିଏମରେ 1251 ଭୋଟ୍ ମିଳିଛି । ଏହିପରି ଭାବରେ ସମୁଦାୟ 1255 ଭୋଟ୍ ବେଣୁ ମଉସା ପାଇଛନ୍ତି ।

Published On November 10, 2020