ନବ ଦାସଙ୍କ ହତ୍ୟା ପଛରେ ଉପକୂଳିଆ ନେତାଙ୍କ ହାତ ରହିଛି: ବିଜେପି ବିଧାୟକ ସୁବାସ ପାଣିଗ୍ରାହୀ
ବିସ୍ଫୋରକ ବୟାନ ଦେଇଛନ୍ତି ବିଜେପି ବିଧାୟକ ସୁବାସ ପାଣିଗ୍ରାହୀ । ନବ ଦାସଙ୍କ ହତ୍ୟା ମାମଲା ପଛରେ ଉପକୂଳ ଓଡିଶାର ଜଣେ ପ୍ରଭାବଶାଳୀ ନେତାଙ୍କ ହାତ ଥିବା କହିଛନ୍ତି ସୁବାସ ।
ଭୁବନେଶ୍ୱର: ମନ୍ତ୍ରୀ ନବ ଦାସଙ୍କ ମୃତ୍ୟୁକୁ ୯ ଦିନ ବିତି ଯାଇଥିଲେ ମଧ୍ୟ ହତ୍ୟାକାଣ୍ଡ ପଛର ସଠିକ୍ କାରଣ ଖୋଜି ପାଉନି କ୍ରାଇମବ୍ରାଞ୍ଜ । ଅଭିଯୁକ୍ତ ଗୋପାଳ ଦାସକୁ ଜେରା ଚାଲିଥିବା ବେଳେ ଏପଟେ ଏକ ବିସ୍ଫୋରକ ବୟାନ ଦେଇଛନ୍ତି ବିଜେପି ବିଧାୟକ ସୁବାସ ପାଣିଗ୍ରାହୀ । ନବ ଦାସଙ୍କ ହତ୍ୟା ମାମଲା ପଛରେ ଉପକୂଳ ଓଡିଶାର ଜଣେ ପ୍ରଭାବଶାଳୀ ନେତାଙ୍କ ହାତ ଥିବା କହିଛନ୍ତି ସୁବାସ ।
ସେ କହିଛନ୍ତି, ମନ୍ତ୍ରୀଙ୍କୁ ମାରିବାକୁ ପୂର୍ବରୁ ଷଡଯନ୍ତ୍ର କରାଯାଇଥିଲା । ନବ ଦାସ ନିଜ ଅଞ୍ଚଳରେ ନିଜ ବିଜନେସର ସାମ୍ରାଜ୍ୟ ଯେମିତି ଭାବରେ ବଢାଇଥିଲେ ତାହାକୁ ଖତମ୍ କରିବାକୁ ନବଙ୍କୁ ରାସ୍ତାରୁ ସଫା କରି ଦିଆଗଲା । ସିବିଆଇ ତଦନ୍ତ ହେଲେ ଏହି ଘଟଣାର ପର୍ଦ୍ଦାଫାଶ ହୋଇପାରିବ ବୋଲି ସେ କହିଛନ୍ତି ।
ସେପଟେ କଂଗ୍ରେସ ବିଧାୟକ ସନ୍ତୋଷ ସିଂହ ସାଲୁଜା କହିଛନ୍ତି, ଶତ୍ରୁ ତାଙ୍କ ନିଜ ଦଳରୁ ହୋଇଥାଇ ପାରନ୍ତି । ହତ୍ୟାକାଣ୍ଡରେ ବଡ ବଡ ଲୋକଙ୍କ ସଂପୃକ୍ତି ରହିଛି । ସେ କହିଛନ୍ତି, ନବ ଦାସଙ୍କ ହତ୍ୟା ଏକ ହାଇ ପ୍ରୋଫାଇଲ୍ ହତ୍ୟାକାଣ୍ଡ । ଷଡ଼ଯନ୍ତ୍ର କରାଯାଇ ହତ୍ୟା କରାଯାଇଛି । ରାଜନୈତିକ ଓ ବ୍ୟବସାୟିକ କାରଣ ଥାଇ ପାରେ । ନିଜ ଦଳର ବି ଶତ୍ରୁ ହୋଇପାରନ୍ତି । ବିଭିନ୍ନ ଦିଗକୁ ନେଇ ତଦନ୍ତ କରିବାକୁ ହାଇକୋର୍ଟ ତତ୍ତ୍ଵାବଧାନରେ ଏସ ଆଇ ଟି ତଦନ୍ତ ଦାବି କରିଥିଲେ ରାଜ୍ୟ ସରକାର କ୍ରାଇମବ୍ରାଞ୍ଚ ତଦନ୍ତ ନିର୍ଦ୍ଦେଶ ଦେଲେ ସରକାର। ଖାକି ତଦନ୍ତ ଖାକି କରୁଛି । ଏହାର ତଦନ୍ତ କାଗଜ କଲମରେ ରହିବ । ପ୍ରକୃତ ଦୋଷୀଙ୍କୁ ଧରି ପାରିବେନି ସରକାର । ବଡ ଲୋକ ସଂପୃକ୍ତ ଅଛନ୍ତି, ବଡ ଷଡ଼ଯନ୍ତ୍ର ଅଛି ।
ସେପଟେ ବିରୋଧୀଙ୍କ ଅଭିଯୋଗ ଉପରେ ପ୍ରତିକ୍ରିୟା ରଖିଛନ୍ତି ବିଜେଡି ନେତା ବ୍ୟୋମକେଶ ରାୟ । ସେ କହିଛନ୍ତି, ମନ୍ତ୍ରୀଙ୍କ ହତ୍ୟା ଘଟଣାରୁ କ୍ରାଇମବ୍ରାଞ୍ଚ ତଦନ୍ତ ଚାଲିଛି । ତଦନ୍ତ ସରିଲେ ସତ ସାମ୍ନାକୁ ଆସିବ । ସମୟ କହିବ କେବେ ଖୋଲିବ ମନ୍ତ୍ରୀଙ୍କ ହତ୍ୟା ଗୁମର ।
Click it and Unblock the Notifications
Sign in with Google