ନୂଆ ସଂସଦ ଭବନ ଉଦଘାଟନ ଉତ୍ସବରେ ସାମିଲ ହେବ ବିଜେଡି, ଆଭିମୁଖ୍ୟ ସ୍ପଷ୍ଟ କଲା ଦଳ

Updated: Wednesday, May 24, 2023, 22:23 [IST]

ଭୁବନେଶ୍ୱର: ଆସନ୍ତା ୨୮ତାରିଖରେ ନୂଆ ସଂସଦ ଭବନର ଉଦଘାଟନ ସମାରୋହରେ ବିଜେଡି ସାମିଲ ହେବ । ଦଳର ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଉଦଘାଟନୀ ସମାରୋହରେ ଉପସ୍ଥିତ ରହିବେ । ଏଥି ସହିତ ଦଳର କିଛି ବରିଷ୍ଠ ସାଂସଦ ଏହି ଉଦଘାଟନୀ ସମାରୋହରେ ସାମିଲ ହେବେ।

ଆଜି ନେଇ ବିଜେଡିର ରାଷ୍ଟ୍ରୀୟ ମୁଖପାତ୍ର ସସ୍ମିତ ପାତ୍ର ଏକ ପ୍ରେସ ରିଲିଜ ଜାରି କରିଛନ୍ତି । ଏଥିରେ କୁହାଯାଇଛି, ଭାରତର ରାଷ୍ଟ୍ରମୁଖ୍ୟ ହେଉଛନ୍ତି ରାଷ୍ଟପତି । ଆଉ ପାର୍ଲାମେଣ୍ଟ, ଦେଶ ୧୪୦ କୋଟି ଲୋକଙ୍କୁ ପ୍ରତିନିଧିତ୍ୱ କରୁଛି । ଉଭୟ ଅନୁଷ୍ଠାନ ଭାରତୀୟ ଗଣତନ୍ତ୍ରର ପ୍ରତୀକ । ଏମାନଙ୍କ ସମ୍ମାନ ଓ ଗାରିମା ସବୁଦିନ ସୁରକ୍ଷିତ ରହିବା ଦରକାର । ବିଜେଡି ବିଶ୍ୱାସ କରୁଛି । ଏହି ସାମ୍ବିଧାନିକ ସଂସ୍ଥା କୌଣସି ବିବାଦରୁ ଉଦ୍ଧ୍ୱର୍ରେ ରହିବା ଦରକାର । ଏଭଳି ହେଲେ ସେମାନଙ୍କ ସମ୍ମାନରେ ଆଞ୍ଚ ଆସିପାରେ ।

ଉଲ୍ଲେଖଥାଉ କି, ରାଷ୍ଟ୍ରପତିଙ୍କ ପରିବର୍ତ୍ତେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ନୂଆ ସଂସଦ ଭବନ ଉଦଘାଟନ କରାଯିବାକୁ ବିରୋଧ କରି କଂଗ୍ରେସ ନେତୃତ୍ୱାଧୀନ ୟୁପିଏ ଓ ଅନ୍ୟ ଦଳ ସମେତ ମୋଟ ୧୯ଟି ରାଜନୀତିକ ଦଳ ଏହି ସମାରୋହକୁ ବର୍ଜନ କରିବେ ବୋଲି ଆଜି ମିଳିତ ବିବୃତ୍ତି ଜାରି କରିଛନ୍ତି । ଏହି ସମସ୍ତ ଦଳ ବିଜେପି ନେତୃତ୍ୱାଧୀନ ଏନଡିଏ ବିରୋଧୀ ଓ ଏସବୁ ମଧ୍ୟରୁ କିଛି ତୃତୀୟ ସାମ୍ମୁଖ୍ୟ ଗଠନ ପ୍ରୟାସରେ ରହିଛି ।

ଆପଣଙ୍କୁ କହି ରଖୁଛୁ, ଯେତେବେଳେ ବିଜେପି ଦ୍ରୌପଦୀ ମୁର୍ମୁଙ୍କୁ ରାଷ୍ଟ୍ରପତି ପ୍ରାର୍ଥୀ ନେଇ ଘୋଷଣା କରିଥିଲା, ସେତେବେଳେ ବିଜେଡ଼ି ଏହାର ପୂର୍ଣ୍ଣ ସମର୍ଥନ ଦେଇଥିଲା । ମାଟିର ଝିଅ କହି ବିଜେଡ଼ି ଦ୍ରୌପଦୀ ମୁର୍ମୁଙ୍କ ପକ୍ଷରେ ଭୋଟ୍ ଦେଇଥିଲା । ବର୍ତ୍ତମାନ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ନିମନ୍ତ୍ରଣ ନ କରାଯିବାକୁ ପ୍ରତିବାଦ କରି ଅନ୍ୟ ବିରୋଧୀ ଦଳ ସମାରୋହ ବହିଷ୍କାର କରୁଥିବା ବେଳେ ବିଜେଡି ନିଜର ଆଭିମୁଖ୍ୟ ସ୍ପଷ୍ଟ କରିଛି ।