ରାମ ମନ୍ଦିର ନିର୍ମାଣ ପରେ ମଧ୍ୟ ହାରିଲା ବିଜେପି: ଅଭିନେତା ଅନୁପମ କହିଲେ, ପରିଶ୍ରମି ଲୋକଙ୍କୁ ଅଧିକ କଷ୍ଟ ସହିବା ପାଇଁ ପଡେ

Updated: Wednesday, June 5, 2024, 16:14 [IST]

Anupam Kher Cryptic Post: ଲୋକସଭା ନିର୍ବାଚନର ଫଳାଫଳ ଘୋଷଣା ହୋଇଯାଇଛି । ଏଥର ନିର୍ବାଚନରେ ଏନଡିଏ ଏବଂ ଇଣ୍ଡିଆ ଆଲାଇନ୍ସ ମଧ୍ୟରେ କଡ଼ା ଟକ୍କର ହୋଇଥିଲା । ୟୁପିରେ ବିଜେପି ଜିତିବ ବୋଲି ଆଶା କରାଯାଉଥିଲା, କିନ୍ତୁ ଏହି ରାଜ୍ୟରେ ଚିତ୍ର ସମ୍ପୁର୍ଣ୍ଣ ବଦଳିଯାଇଛି । ୟୁପିର ରେଜଲ୍ଟ ସାରେ ଦେଶକୁ ଆଶ୍ଚର୍ଯ୍ୟ କରିଛି । ବିଶେଷ କରି ଅଯୋଧ୍ୟାରେ ବିଜେପିର ପରାଜୟକୁ କେହି ସହଜରେ ଗ୍ରହଣ କରି ପାରୁ ନାହାଁନ୍ତି ।

ରାମ ମନ୍ଦିର ନିର୍ମାଣ ପରେ ମଧ୍ୟ ବିଜେପି ଏହି ଆସନରୁ ଜିତି ପାରିନାହିଁ । ବିଜେପି ପରିବର୍ତ୍ତେ ସମାଜବାଦୀ ପାର୍ଟିର ପ୍ରାର୍ଥୀ ଅଯୋଧ୍ୟାରୁ ବିଜୟୀ ହୋଇଛି । ଏଭଳି ନିର୍ବାଚନ ଫଳାଫଳ ଦେଖିବା ପରେ ବଲିଉଡ ଅଭିନେତା ଅନୁପମ ଖେର ମଧ୍ୟ ଆଶ୍ଚର୍ଯ୍ୟ ହୋଇଯାଇଛନ୍ତି। ସେ ଏନେଇ ସୋସିଆଲ ମିଡିଆରେ ଏକ ପୋଷ୍ଟ ସେୟାର କରିଛନ୍ତି । ଯାହାକୁ ବେଶ୍ ଚର୍ଚ୍ଚା ହେଉଛି ।

ଅନୁପମ ଖେର ଏହି ପୋଷ୍ଟରେ କାହାର ନାଁ ଉଲ୍ଲେଖ କରି ନାହାଁନ୍ତି ହେଲେ ତାଙ୍କର ଅସନ୍ତୋଷ ସ୍ପଷ୍ଟ ଦେଖାଯାଉଛି। ଅଭିନେତା ଲେଖିଛନ୍ତି- 'ବେଳେବେଳେ ମୁଁ ଭାବୁଛି ଯେ ଜଣେ ସଚ୍ଚୋଟ ବ୍ୟକ୍ତି ଅତ୍ୟଧିକ ସଚ୍ଚୋଟ ହେବା ଉଚିତ ନୁହେଁ। ଜଙ୍ଗଲରେ, କେବଳ ସିଧା ସଳଖ ଗଛ ପ୍ରଥମେ କାଟି ଦିଆଯାଏ ।

ସଚ୍ଚୋଟ ବ୍ୟକ୍ତିକୁ ଅଧିକ ଯନ୍ତ୍ରଣା ଭୋଗିବାକୁ ପଡିଥାଏ । ହେଲେ ସେ ନିଜ ଗୁଣ ଅର୍ଥାତ୍ ସଚ୍ଚୋଟତା ଛାଡନ୍ତି ନଥାଏ । ସେଥିପାଇଁ ସେ କୋଟି କୋଟି ଲୋକଙ୍କ ପାଇଁ ପ୍ରେରଣା ଉତ୍ସ ପାଲଟିଥାଏ । ବିଜୟୀ ହୁଅ...ଏହି ପୋଷ୍ଟ ସେୟାର କରିବାସହ ଅନୁପମ ଖେର 'ସତ୍ୟ' ମଧ୍ୟ ଲେଖିଛନ୍ତି ।

ଅନ୍ୟପକ୍ଷରେ କଙ୍ଗନା ରଣାୱତ ହିମାଚଳ ପ୍ରଦେଶର ମଣ୍ଡିରୁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ। କଙ୍ଗନା ମଣ୍ତି ଆସନରୁ ବିଜୟ ଲାଭ କରିଛନ୍ତି । ଅନୁପମ ଖେର ତାଙ୍କୁ ସୋସିଆଲ ମିଡିଆରେ ଅଭିନନ୍ଦନ ଜଣାଇଛନ୍ତି। କଙ୍ଗନାଙ୍କ ଫଟୋ ଏବଂ ଭିଡିଓ ସେୟାର ସେ ଶୁଭେଚ୍ଛା ଜଣାଇଛନ୍ତି ।