ବାଚସ୍ପତିଙ୍କୁ ଚପଳ ଫିଙ୍ଗା ଘଟଣାରେ ତିନି ବିଜେପି ବିଧାୟକ ନିଲମ୍ବିତ

ବାଚସ୍ପତିଙ୍କୁ ଚପଳ ଫିଙ୍ଗା ଘଟଣାରେ ତିନି ବିଜେପି ବିଧାୟକ ନିଲମ୍ବିତ କରିଛନ୍ତି ବାଚସ୍ପତି

Updated: Saturday, April 3, 2021, 17:56 [IST]

ଭୁବନେଶ୍ୱର : ବାଚସ୍ପତିଙ୍କୁ ଉପରକୁ ଜୋତା ଫୋପାଡିବା ପ୍ରସଙ୍ଗରେ ବିରୋଧୀ ବିଜେପିର ତିନି ଜଣ ବିଧାୟକଙ୍କୁ ନିଲମ୍ବିତ କରିଛନ୍ତି ବାଚସ୍ପତି । ବିଧାୟକ ବିଷ୍ଣୁ ସେଠୀ, ଜୟ ନାରାୟଣ ମିଶ୍ର ଓ ମୋହନ ମାଝୀଙ୍କୁ ନିଲମ୍ବିତ କରିଛନ୍ତି ବାଚସ୍ପତି ସୂର୍ଯ୍ୟନାରାୟଣ ପାତ୍ର । ଏହି ଅଧିବେଶନ ପାଇଁ ଏହି ତିନି ଜଣ ବିଧାୟକଙ୍କୁ ନିଲମ୍ବିତ କରାଯାଇଛି । ଏହାପୂର୍ବରୁ ବାଚସ୍ପତିଙ୍କ ଉପରକୁ ଜୋତା ଫୋପାଡିବା ପ୍ରସଙ୍ଗରେ ଭିଡିଓର ହୋଇଥିଲା ଯାଞ୍ଚ । ବାଚସ୍ପତିଙ୍କ ପ୍ରକୋଷ୍ଠକୁ ସରକାରୀ ଦଳ ମୁଖ୍ୟ ସଚେତକ, ସଂସଦୀୟ ବ୍ୟାପାର ମନ୍ତ୍ରୀ ଏହି ଭିଡିଓକୁ ଯାଞ୍ଚ କରିଥିଲେ । ଜୋତା ଫିଙ୍ଗା ଭିଡିଓ କ୍ଲିପ୍ ମଧ୍ୟ ବାଚସ୍ପତିଙ୍କ ପ୍ରକୋଷ୍ଠକୁ ନିଆଯାଇଥିଲା ।

ଏଠାରେ ସୂଚନାଥାଉକି, ଆଜି ମଧ୍ୟାହ୍ନରେ ସରକାର ସଂଶୋଧିତ ଲୋକାୟୁକ୍ତ ବିଲ୍ 2021 କୁ ଗୃହୀତ କରାଇଥିଲେ । ଏହାର ପ୍ରତିବାଦରେ ବିଜେପି ସଦସ୍ୟମାନେ ଗୃହରେ ହଟ୍ଟଗୋଳ କରିଥିଲେ । ଏପରିକି ଗୃହ ମଧ୍ୟଭାଗକୁ ଆସି ପାଟିତୁଣ୍ଡ କରିବା ସହ ପୋଡିୟମ୍ ଉପରକୁ ଚଢିବାକୁ ଉଦ୍ୟମ କରିଥିଲେ । ପରିସ୍ଥିତି ଏପରି ହୋଇଥିଲା ଯେ ଦୁଇ ବରିଷ୍ଠ ବିଜେପି ବିଧାୟକ ବାଚସ୍ପତିଙ୍କ ଆସନକୁ ଲକ୍ଷ୍ୟ କରି ଚପଲ ଫିଙ୍ଗିଥିବା ଦେଖିବାକୁ ମିଳିଥିଲା । ବରିଷ୍ଠ ବିଜେପି ବିଧାୟକ ଜୟନାରାୟଣ ମିଶ୍ର ଓ ବିଷ୍ଣୁ ସେଠୀ ଚପଲ ଫିଙ୍ଗିଥିବା କୁହାଯାଇଥିଲା । ଆହୁରି ମଧ୍ୟ ବିଜେପି ବିଧାୟକ ମୋହନ ମାଝୀ ବାଚସ୍ପତିଙ୍କୁ ଲକ୍ଷ୍ୟ କରି ପୋଡିୟମ୍ ଉପରକୁ ଇୟରଫୋନ୍ ଓ କାଗଜ ଫିଙ୍ଗିଥିବା ଦେଖିବାକୁ ମିଳିଥିଲା ।