ରାତିରେ ଖସୁଚି ପାରଦ, ବଢୁଛି ଶୀତ
ଭୁବନେଶ୍ୱର: ରାଜ୍ୟରେ ଖସୁଛି ପାରଦ । ଧିରେ ଧିରେ ବଢିଲାଣି ଶୀତ । କିଛି ଜିଲ୍ଲାରେ ଶୀତ ଅନୁଭୂତ ହେଲାଣି । ଆଗକୁ ଆହୁରି ଶୀତ ବଢିବାର ସମ୍ଭାବନା ରହିଛି । ଗତକାଲି 15 ଡିଗ୍ରୀ ତଳେ 5 ସହରର ତାପମାତ୍ରା ରହିଥିବା ବେଳେ ଆଜି ପୁଣି ଖସିଛି ପାରଦ ।
କନ୍ଧମାଳରେ ଗତ ତିନି ଚାରି ଦିନ ହେଲା ରାତି ତାପମାତ୍ରା କ୍ରମାଗତ ଭାବେ ଖସିବାରେ ଲାଗିଛି । କନ୍ଧମାଳ ଜିଲ୍ଲାର ଫୁଲବାଣୀ ଏବଂ ଜି ଉଦୟଗିରି ରବିବାର ସର୍ବନିମ୍ନ ତାପମାତ୍ରା 13 ଡିଗ୍ରୀ ସେଲସିୟସ ରେକର୍ଡ କରାଯାଇଛି । ସୁଲୁସୁଲିଆ ପବନ ସାଙ୍ଗକୁ ଚାରିଆଡେ ଘନ କୁହୁଡି ଦେଖିବାକୁ ମିଳୁଛି ।
ସେହିପରି ରାଜଧାନୀ ଭୁବନେଶ୍ୱରରେ ପାରଦ 19.7 ଡିଗ୍ରୀ ସେଲସିୟସକୁ ଖସିଛି । ଚଳିତ ଅକ୍ଟୋବରରେ ପ୍ରଥମ ଥର ପାଇଁ ରାଜଧାନୀର ତାପମାତ୍ରା 20 ଡିଗ୍ରୀ ସେଲସିୟସ ତଳକୁ ଖସି ଆସିଥିବାବେଳେ କଟକ ସର୍ବନିମ୍ନ ତାପମାତ୍ରା 20.2 ଡିଗ୍ରୀ ସେଲସିୟସ ରହିଛି । କୋରାପୁଟ ସର୍ବନିମ୍ନ ତାପମାତ୍ରା 13.8 ଡିଗ୍ରୀ ସେଲସିୟସ ରେକର୍ଡ ହୋଇଛି ।
ଏପରପକ୍ଷରେ ବଙ୍ଗୋପସାଗର ରୁ ପୂର୍ବାଳୀ -ତରଙ୍ଗ ପ୍ରଭାବରେ ଦକ୍ଷିଣ ଓଡ଼ିଶାରେ କିଛି ଜିଲ୍ଲାରେ 1 ରୁ 3 ତାରିଖ ଯାଏଁ ବର୍ଷା ହେବାର ସମ୍ଭାବନା ରହିଛି । ଏ ନେଇ ପୂର୍ବାନୁମାନ କରିଛି ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର । ପାଣିପାଗ ବିଭାଗର ସୂଚନା ଅନୁଯାୟୀ, ପୁରୀର କିଛି ଅଞ୍ଚଳରେ, ଗଜପତି, ଗଞ୍ଜାମ, ମାଲକାନିଗିରି, କୋରାପୁଟ, ଖୋର୍ଦ୍ଧା, କନ୍ଧମାଳ, ରାୟଗଡ଼ାରେ ଆସନ୍ତା ନଭେମ୍ବର 1 ତାରିଖରେ ଘଡ଼ଘଡ଼ି ସହ ବଜ୍ରପାତ ହେବାର ସମ୍ଭାବନା ରହିଛି ।
Click it and Unblock the Notifications
Sign in with Google